1 Yo ní lelɔ haa nɛ we bɔɔ, se yo kuasia ní peemi níhi ywiaa we.
2 Ke o peeɔ nɔ́ nɛ da a, lɔ ɔ tsɔɔ kaa o yeɔ Yawɛ gbeye. Se ke o yi anɔkuale ɔ, lɔ ɔ tsɔɔ kaa o ngɛ e he guɛ gbee.
3 Kuasia nya mi munyu fiaa lɛ kpa. Ní lelɔ lɛɛ e nya mi munyu jeɔ lɛ kɛ jeɔ haomi mi.
4 He nɛ na be nɛ a kɛ maa gbla na kpakplaa kɛ hu ɔ, blɛfo gba mi fɔɔ si gu. Ke na ngɛ ɔ, lɔ ɔ lɛɛ gba a mi hyiɔ tɔ.
5 Anɔkuale odase yelɔ ngɔɛ nya. Lakpa odase yelɔ lɛɛ lakpa pɛ e yeɔ.
6 Nɔ buili hlaa kaa a maa le ní, se nile bɔɔ mɛ. Nihi nɛ nuɔ nɔ́ sisi ɔ, mɛɛ a leɔ ní mla.
7 O kɛ kuasia ko bɔ; o be nile munyu ko nue kɛ je e nya mi.
8 Ní lelɔ juɛmi tsɔɔ lɛ blɔ nɛ hi. Kuasiahi lɛɛ a juɛmi sisiɔ mɛ.
9 Yayami gba we kuasia nya kulaa. Se nihi nɛ peeɔ nɔ́ nɛ da a, mɛɛ a suɔ kaa a kɛ a he yayami nɛ pa mɛ.
10 Mo nitsɛ nɛ o le o hɛdɔ be, kɛ be nɛ o naa bua jɔmi; nɔ kpa ko li.
11 A maa ku yayami peeli a we kɛ pue si. Se ni kpakpahi lɛɛ a we maa bɔ.
12 ⓠ Blɔ nɛ nɔmlɔ susuɔ kaa e da a, nyagbe ɔ, e kɛ nɔ yaa gbenɔ mi.
13 Muɔmi haa kɔmɔ yemi nɔ; ke bua jɔmi se po ɔ, aywilɛho lɛɛ e tɛ gblegbleegble.
14 A maa gbla yayami peelɔ tue ngɛ e yayamihi a he; nɔmlɔ kpakpa hu ma na e ní kpakpahi a he hiɔwo.
15 Kuasia heɔ nɔ́ tsuaa nɔ́ yeɔ. Ní lelɔ lɛɛ e le e nane nya hyɛmi.
16 Ní lelɔ yeɔ sane gbeye; e hyɛɛ e he nɔ saminya nɛ e ko pee yayami. Kuasia lɛɛ e heɔ e he yeɔ, nɛ e peeɔ e níhi basabasa.
17 Nihi nɛ a mi mi kɛ́ fumi peeɔ a níhi basabasa kaa kuasiahi. Se ní leli lɛɛ a toɔ a tsui si.
18 Nihi nɛ be juɛmi ɔ, biɛmi ji nɔ́ nɛ a naa ngɛ a he. Juɛmitsɛmɛ lɛɛ nile haa a hɛ mi baa nyami.
19 Yayami peeli ma kpla si ha ni nɛmɛ nɛ peeɔ nɔ́ nɛ da, nɛ a ma bi mɛ a hiami níhi.
20 Ohiatsɛ ɔ, e nyɛmi tete po sume lɛ. Se niatsɛ lɛɛ e ngɛ huɛmɛ babauu.
21 Nɔ nɛ gbeɔ e nyɛmi he guɛ ɔ, yayami e ngɛ pee ɔ nɛ. Se nɔ nɛ naa ohiatsɛ mɔbɔ ɔ, a gbaa lɛ.
22 Nihi nɛ toɔ ga yayami ɔ, a hɛ mi ma kpata. Se ni nɛmɛ nɛ susuɔ nɔ́ kpakpa a, a maa na mɛ mɔbɔ, nɛ a blɔ maa da mɛ.
23 Ke o tsu ní ɔ, o ma na nɔ́ ko kɛ je mi. Se ke o hii si nɛ o ngɛ munyu tue puu kɛkɛ ɔ, o maa ye ohia.
24 Ní lelɔ ɔ, e se nami ji ní nami; kuasia lɛɛ e hiɔwo ji biɛmi.
25 Anɔkuale odase yelɔ heɔ nɔ yi wami; lakpa odase yelɔ lɛɛ nɔ se blɔ e tsɔɔ.
26 Nɔ nɛ yeɔ Yawɛ gbeye ɔ, e kɛ e bimɛ tsuo hiɔ si ngɛ he jɔmi mi.
27 Yawɛ gbeye yemi ngɛ kaa nyu vu nɛ haa nɔ wami; e jeɔ nɔ kɛ jeɔ gbenɔ mi.
28 Matsɛ nɛ e we bihi a he hiɛ babauu ɔ, e naa biɛ. Se ganɔ nɛ be nihi ngɛ e sisi ɔ lɛɛ tsa pi nɔ ko kulaa ji lɛ.
29 Nɔ nɛ mi mi fu we mla a, ní lelɔ agbo ji lɛ. Nɔ nɛ be tsui ɔ, e jeɔ kuasia.
30 Tue mi jɔmi haa nɛ nɔmlɔ tso ɔ naa he wami, se kuasia jemi woɔ nɔ hiɔ.
31 Nɔ nɛ waa ohiatsɛ yi mi ɔ, Mawu ɔ nɛ bɔ ohiatsɛ ɔ e ngɛ jɛe ɔ nɛ. Se nɔ nɛ naa ni nɛmɛ nɛ e fi mɛ mɔbɔ ɔ, e ngɛ Mawu hɛ mi nyami woe.
32 Yayami peelɔ ɔ, lɛ nitsɛ e ní yayamihi nɛ ngɔɔ lɛ kɛ woɔ haomi mi. Se nɔmlɔ kpakpa lɛɛ gbenɔ mi tete po e ngɛ hɛ nɔ kami.
33 Nɔ nɛ nuɔ nɔ́ sisi ɔ, ní lelɔ ji lɛ. Kuasia lɛɛ nɔ́ nɛ a tsɛɛ nile tete e li.
34 Dami sane yemi haa nɛ ma yaa nɔ; yayami peemi ɔ, ma hɛ mi si e pueɔ.
35 Tsɔlɔ nɛ le ní ɔ, matsɛ suɔ lɛ. Se tsɔlɔ nɛ tsuɔ zo ní ɔ, lɛɛ matsɛ gblaa e tue.