1 Bi ní lelɔ buɔ e tsɛ tsɔsemi tue. Bi nɔ builɔ lɛɛ e kplɛɛ we nɛ a kaa e hɛ mi.
2 Nɔmlɔ kpakpa naa munyu nɛ jeɔ lɛ nitsɛ e nya mi ɔ he se. Nɔmlɔ yayami lɛɛ nɔ́ nɛ e suɔ kɛkɛ ji yi mi wami.
3 Nɔ nɛ hyɛɛ e lilɛ nɔ saminya a, e yi naa wami. Nɔ nɛ tuɔ munyu puu ɔ, e hɛ mi kpataa.
4 Hejɔtsɛ ma hla kaa e na nɔ́ ko, se e nine be nɔ sue. Se nɔ nɛ tsuɔ ní lɛɛ nɔ́ tsuaa nɔ́ nɛ e ngɛ hlae ɔ, e naa.
5 Nɔ nɛ peeɔ nɔ́ nɛ da a, e sume lakpa. Se nɔmlɔ yayami lɛɛ hɛ mi si puemi níhi e peeɔ kɛ bɔɔ lɛ nitsɛ e he ahlua.
6 Nɔ nɛ peeɔ nɔ́ nɛ da a, a yeɔ dami sane ha lɛ. Se yayami peemi kpataa yiwutsotsɛ hɛ mi.
7 Ni komɛ peeɔ a he niatsɛmɛ, pohu nɔ́ ko be a dɛ. Ni komɛ hu peeɔ a he ohiatsɛmɛ, se a ngɛ ní babauu.
8 Niatsɛ kɛ sika faa e he. Ohiatsɛ ɔ, a wui e he gbeye.
9 Nihi nɛ peeɔ nɔ́ nɛ da a, a ngɛ kaa kane nɛ ngɛ kpɛe. Se yayami peeli lɛɛ a ngɛ kaa kane nɛ miɔ nɛ e ma gbo.
10 Nɔ buimi ɔ, haomi kɛkɛ e kɛ baa. Ní leli ji ni nɛmɛ nɛ buɔ ga womi tue.
11 Ní nɛ a naa esɔesɔ ɔ, e taa mla. Nɔ nɛ buaa nɔ́ nya bɔɔbɔɔbɔɔ ɔ, e naa babauu.
12 Ke o ngɛ nɔ́ ko blɔ hyɛe, nɛ nɔ́ ɔ se kɛ ɔ, o yeɔ o tsui. Se ke nɔ́ ɔ ba mi ɔ, o naa bua jɔmi babauu.
13 Nɔ nɛ bui ga womi tue ɔ, lɛ nitsɛ e hɛ mi lɛ ma kpata. Nɔ nɛ yeɔ mlaa gbeye ɔ, e maa ye e he.
14 Ní leli a tsɔɔmi ngɛ kaa nyu vu nɛ haa nɔ wami. E ma ha nɛ o maa na gbenɔ nɛ ma, konɛ o tu nya fo.
15 Juɛmi nɛ mi kuɔ woɔ nɔ hɛ mi nyami. Nihi nɛ sisiɔ nɔ ɔ, mɛɛ lɛɛ hɛ mi kpatami blɔ nɔ a ngɛ.
16 Ní lelɔ peeɔ e ní kɛ juɛmi, se kuasia lɛɛ e jeɔ e biɛmi kpo ngɛ ma hɛ mi.
17 Tsɔlɔ nɛ yi anɔkuale kɛ nɔ woɔ haomi mi. Se tsɔlɔ anɔkualetsɛ lɛɛ tue mi jɔmi e kɛ baa.
18 Nɔ nɛ sume tsɔsemi ɔ, e yeɔ ohia, nɛ e hɛ mi pueɔ si. Se nɔ nɛ kplɛɛɔ nɛ a kaa e hɛ mi ɔ, a buɔ lɛ.
19 Ke o ngɛ nɔ́ ko hlae, nɛ o nine su nɔ ɔ, hyɛ bɔ nɛ o bua jɔɔ ha. Kuasia lɛɛ nɔ́ nɛ e hiɔ ji kaa e kpa yayami peemi.
20 Nɔ nɛ kɛ ní leli nyɛɛɔ ɔ, e leɔ ní. Se nɔ nɛ kɛ kuasiahi bɔɔ ɔ, haomi lɛ baa e nɔ.
21 Haomi nyɛɛɔ yayami peeli a se. Se nihi nɛ peeɔ nɔ́ nɛ da lɛɛ a ma na hiɔwo kpakpa.
22 Nɔmlɔ kpakpa siɔ gbosi ní kɛ haa e bibimɛ. Se yayami peeli a ní ɔ, dali lɛ a bua nya ha.
23 Ohiatsɛmɛ a zugba nɛ fɔɔ si gu ɔ ma nyɛ ba ní babauu. Se yayami peeli tsiɔ nya.
24 Nɔ nɛ sume kaa e maa gbla e bi tue ɔ, e sume e bi ɔ. Nɔ nɛ suɔ e bi ɔ, e tsɔseɔ lɛ.
25 Nihi nɛ peeɔ nɔ́ nɛ da a, a yeɔ ní nɛ a tɔɔ. Se yayami peeli lɛɛ mi mi hwɔ yeɔ mɛ.