1 Ke o kɛ gbi blɛuu ha munyu heto ɔ, e tsiɔ abofu nya. Se munyu gegeege haa nɔ mi mi woɔ la.
2 Ní leli a ní sɛɛmi ngɔɔ ngɛ tue mi; kuasiahi lɛɛ munyu nɛ jeɔ a nya mi ɔ, juɛmi be mi.
3 Yawɛ hɛngmɛ ngɛ he tsuaa he; e naa kpakpa peeli, kɛ yayami peeli tsuo.
4 Munyu blɛuu kɛ he jɔmi baa; se ke sisimi ba je mi pɛ e gbeɔ nɔ mumi.
5 Kuasia kplɛɛ we nɛ e tsɛ tsɔseɔ lɛ; se bi nɛ baa e he si nɛ a tsɔseɔ lɛ ɔ, ní lelɔ ji lɛ.
6 Nɔmlɔ kpakpa naa e ní he se babauu. Yiwutsotsɛ lɛɛ haomi ji nɔ́ nɛ e ní nɛ e na a kɛ baa e nɔ.
7 Ní leli a nya lɛ gbɛɔ nile kɛ fĩaa; pi kuasiahi a juɛmi.
8 Yayami peelɔ bɔ sami ɔ, Yawɛ sume kulaa; se ke nɔmlɔ kpakpa fa kue ɔ, e naa he bua jɔmi.
9 Yayami peelɔ je mi bami sɛ Yawɛ hɛ mi kulaa; se nɔ nɛ peeɔ nɔ nɛ da a, Yawɛ suɔ lɛ.
10 Nɔ nɛ pee we nɔ́ nɛ da a, a maa gbla e tue wawɛɛ; nɔ nɛ sume nɛ a ka e hɛ mi ɔ, e ma gbo.
11 Gbeje kɛ e muɔ voo ɔ po fɔɔ si paa ngɛ Yawɛ hɛ mi; nɛ nɔmlɔ adesa tsui mi lɛɛ e be nae lo?
12 He fɛu yelɔ ngɛ nɛ ɔ, e sume kaa nɔ ko kaa e hɛ mi; nɛ e ya bi we ga womi ngɛ ní leli a ngɔ hulɔ.
13 Bua jɔmi haa nɔ tsɔɔ e hɛ mi; tsui yemi haa nɔ peeɔ vii.
14 Ní leli hlaa kaa a maa hi ní kasee kɛ ya nɔ. Kuasiahi lɛɛ nɔ́ nɛ a suɔ ji a hi biɛmi munyu tue kpamisa.
15 Ohiatsɛ wami be tsuo ɔ, haomi sɔuu; se nɔ nɛ e tsui nɔɔ e mi ɔ, daa nɛ ɔ, e ngɛ bua jɔmi.
16 Nɔ́ ko bɔbɔyoo nɛ Yawɛ gbeye yemi piɛ he ɔ, e hi hluu pe weto ní babauu kɛ e mi haomi gidiglɛmɛɛ.
17 E hi mohu kaa o maa ye ba flɔɔ ngɛ he nɛ suɔmi ngɛ, pe nɛ o maa ye na nɛ tu zɔ ngɛ he nɛ ninyɛ ngɛ.
18 Nɔ nɛ woɔ e mi mi la a, e tleɔ pɛ si; se nɔ nɛ mi mi fu we mla a, e kpataa pɛ, nɛ tue mi jɔmi baa.
19 Hejɔtsɛ kɛ haomi kpee ngɛ he tsuaa he; se nɔ nɛ yeɔ anɔkuale ɔ, e na we nyagba.
20 Bi ní lelɔ haa e tsɛ naa bua jɔmi. Kuasia lɛɛ e gbeɔ e nyɛ he guɛ.
21 Nɔ nɛ be juɛmi nyaa kuasia jemi he; se nɔ nɛ ngɛ juɛmi ɔ, e baa e je mi saminya.
22 He nɛ ga womi be ɔ, yi mi tomi peeɔ yaka; se he nɛ ga woli hiɛ ngɛ ɔ, níhi yaa nɔ pɛpɛɛpɛ.
23 E ji bua jɔmi sane kaa a ma ha munyu heto pɛpɛɛpɛ. Munyu nɛ a tu ngɛ be nɛ sa mi ɔ, hyɛ bɔ nɛ e hi ha!
24 Blɔ nɛ ní lelɔ nyɛɛɔ nɔ ɔ, e kɛ lɛ yaa wami mi. Blɔ nɛ kɛ nɔ yaa gbeje ɔ, e nyɛɛ we nɔ.
25 Yawɛ kuɔɔ he woli a wehi, se e haa yalɔyo e buna maa si kpɛii.
26 Yiwutsotsɛmɛ a yi mi susumi ɔ, Yawɛ sume; se nihi nɛ a tsui mi tsɔ ɔ, a munyu saa e hɛ mi.
27 Nɔ nɛ peeɔ jiklɔɔ konɛ e na se yaka a, haomi mohu nya e ngɛ buae ha e weku li. Nɔ nɛ he we nyɔ mi ní ɔ, e se kɛɔ ngɛ je mi.
28 Ke dalɔ ma ha munyu heto ɔ, e susuɔ he saminya. Yiwutsotsɛ lɛɛ munyu yaya lɛ jeɔ e nya mi.
29 Yawɛ kɛ yayami peeli a kpɛti kɛ; se e buɔ dali a kue fami tue.
30 Hɛ mi muɔ jɛɛ haa nɔ bua jɔɔ; jã kɛ̃ manye munyu haa nɔ nɔ gbagba tee.
31 Nɔ nɛ buɔ ga womi tue ɔ, e kɛ ní leli maa hi si.
32 Nɔ nɛ kplɛɛ we nɛ a tsɔseɔ lɛ ɔ, e ngɛ lɛ nitsɛ e he awi yee. Se nɔ nɛ buɔ tue ɔ, e naa nile.
33 Yawɛ gbeye yemi ji tsɔsemi nɛ haa nɔ leɔ ní nitsɛnitsɛ. Nɔ nɛ baa e he si ɔ, a maa wo e hɛ mi nyami.