Nyɛ je Mawu Ope ɔ yi
1 Nyɛ je Yawɛ yi! E hi kaa a la kɛ je wa Mawu ɔ yi; ejakaa dloolɔ ji lɛ, nɛ e sa kaa a la kɛ je e yi.
2 Yawɛ ngɛ Yerusalem sisi toe ekohu; e ngɛ Israel bi ɔmɛ nɛ gbɛ fĩa a a nya buae kɛ ba.
3 Ni nɛmɛ nɛ a tsui ku ɔ, e ngɛ mɛ tsae, nɛ e ngɛ a pa amɛ a nɔ fie.
4 E le dodoe ɔmɛ tsuo a yibɔ, nɛ e kɛ a biɛhi tsɛɔ mɛ kakaaka.
5 Nyɔmtsɛ ɔ kle; e ngɛ he wami babauu, nɛ e nile hu a li nya.
6 Yawɛ piɛɔ nihi nɛ a waa mɛ yi mi a he; se yiwutsotsɛmɛ lɛɛ e sakee mɛ ngɔ fiaa si.
7 Nyɛ la sina la ha Yawɛ; nyɛɛ fia saku nɛ nyɛ la kɛ je wa Mawu ɔ yi!
8 Lɛ nɛ e ngɔɔ bɔku kɛ haa hiɔwe, nɛ e haa hiɔmi nɛɛ kɛ pueɔ zugba a nɔ, nɛ nga mumu puɛɔ ngɛ yo ɔmɛ a nɔ.
9 Lɛ nɛ e haa nga mi lohwehi niye ní, nɛ ke kuakualabite bihi ngɛ pɛe hu, lɛ nɛ e haa mɛ ní.
10 Okpɔngɔ nɛ he wa tete po e bui; fo tulɔ kpanaa hu pi nɔ́ ko kulaa ngɛ e hɛ mi.
11 Se nihi nɛ yeɔ lɛ gbeye, nɛ ngɔɔ a hɛ kɛ fɔɔ e nɔ kaa e maa na mɛ mɔbɔ daa a, mɛɛ e naa a he bua jɔmi.
12 Yerusalem, mo je Yawɛ yi! Zion, mo je o Mawu ɔ yi!
13 Ejakaa e peeɔ o we agbo ɔmɛ a se lami ní ɔmɛ kpɛii, nɛ e gbaa o bimɛ ɔmɛ.
14 E haa tue mi jɔmi baa o zugba a nɔ, nɛ niye ní buu tɔ.
15 Ke e wo gbi ɔ, a nuɔ ngɛ zugba a nɔ, nɛ a yeɔ nɔ nɔuu.
16 E haa nɛ snoo nɛɔ kaa doti, nɛ e gbɛɔ bɔ́ nɛ fi ɔ kɛ fĩaa kaa la zu.
17 E haa gbiɛ ngo ngu nɛɔ kaa dongo tɛ. Mɛnɔ ma nyɛ maa da e fĩɛ ɔ nya?
18 Ke e fa a, gbiɛ ngo ngu ɔmɛ sileɔ; e haa kɔɔhiɔ fiaa, kɛkɛ nyu ɔ bɔni nyɛɛmi.
19 E wo Israel mlaa, nɛ e tsɔɔ mɛ bɔ nɛ a ja Mawu ha.
20 E pee we kikɛ nɛ ɔ ha we ma ko ma ko hyɛ, nɛ e mlaa amɛ hu, ma kpa ko li. Nyɛ je Yawɛ yi!