Je ɔ tsuo nɛ je Mawu yi
1 Nyɛ je Yawɛ yi! Nyɛ je Yawɛ yi kɛ je hiɔwe. Nyɛ je e yi ngɛ hiɔwe lokoo!
2 Nyɛ Mawu bɔfohi tsuo, nyɛ je e yi! Nyɛ e ta a tsuo, nyɛ je e yi!
3 Pu, kɛ nyɔhiɔ, nyɛ je e yi! Nyɛ dodoehi tsuo nɛ kpɛɔ, nyɛ je e yi!
4 Nyɛ hiɔwe tsuo, nyɛ je e yi! Nyu nɛ ngɛ hiɔwe yi mi, mo je e yi!
5 Ní nɛ ɔmɛ tsuo nɛ a je Yawɛ yi; ejakaa lɛ nɛ e fa nɛ a bɔ mɛ.
6 E ngɔ mɛ ngɔ ma si kɛ yaa neneene. E wo huzu ha mɛ, nɛ a be hanee.
7 Nyɛ nihi nɛ ngɛ zugba a nɔ tsuo, nyɛ je Yawɛ yi! Nyɛ wo mi lo nguanguahi, kɛ muɔ voovoohi tsuo, nyɛ je e yi!
8 La, gbiɛ ngo ngu, snoo, bɔ nɛ fi, kɛ ahumi nɛ nyɛ ngɛ Yawɛ tsɔmi nɔ, nyɛ je e yi!
9 Yo nguanguahi, kɛ yo wawi tsuo, tsohi nɛ woɔ yiblii, kɛ seda tsohi tsuo,
10 nga mi lohwehi, kɛ we mi lohwehi tsuo, lohwehi nɛ sãã si, kɛ lohwe pɛlitsɛmɛ, nyɛ je e yi!
11 Zugba a nɔ matsɛmɛ, kɛ ma amɛ tsuo, ganɔhi, kɛ ma nɔ yeli tsuo,
12 nihewi kɛ yihewi tsuo, nikɔtɔmahi kɛ jokuɛwi tsuo pɛpɛɛpɛ, nyɛ je e yi!
13 Nimli nɛ ɔmɛ tsuo nɛ a je Yawɛ yi, ejakaa lɛ nɔ kake too lɛ ngɛ biɛ nɛ kle agbo; e hɛ mi nyami ha zugba a nɔ tsuo kɛ be hiɔwe tete he.
14 E to e ma a sisi kɛ he wami saminya. lɔ ɔ he ɔ, e ma a tsuo ngɛ e yi jee; e ma a ji Israel, nɛ e he jua wa ha lɛ kaa nɔ́ ko. Nyɛ je Yawɛ yi!