Sina la
1 ⓑ Nyɛɛ na Yawɛ si; ejakaa Yawɛ hi, nɛ e suɔmi ɔ ngɛ kɛ yaa neneene!
2 Nyɛɛ na mawu ɔmɛ a Mawu ɔ si; ejakaa e suɔmi ɔ ngɛ kɛ yaa neneene!
3 Nyɛɛ na nyɔmtsɛmɛ a Nyɔmtsɛ ɔ si; ejakaa e suɔmi ɔ ngɛ kɛ yaa neneene!
4 Lɛ nɔ kake too lɛ e peeɔ nyakpɛ ní; ejakaa e suɔmi ɔ ngɛ kɛ yaa neneene!
5 ⓒ Lɛ nɛ e ngɔ nile kɛ pee hiɔwe kɛ zugba; ejakaa e suɔmi ɔ ngɛ kɛ yaa neneene!
6 ⓓ Lɛ nɛ e ngɔ zugba a kɛ ha nyu ɔ hɛ mi; ejakaa e suɔmi ɔ ngɛ kɛ yaa neneene!
7 ⓔ Lɛ nɛ e pee kane nguanguahi; ejakaa e suɔmi ɔ ngɛ kɛ yaa neneene!
8 Lɛ nɛ e haa nɛ pu tsoɔ piani; ejakaa e suɔmi ɔ ngɛ kɛ yaa neneene!
9 Lɛ nɛ e haa nyɔhiɔ, kɛ dodoehi kpɛɔ nyɔ mi; ejakaa e suɔmi ɔ ngɛ kɛ yaa neneene!
10 ⓕ Lɛ nɛ e gbe Egipt bi ɔmɛ a kekleekle bimɛ; ejakaa e suɔmi ɔ ngɛ kɛ yaa neneene!
11 ⓖ Nɛ e je Israel bi ɔmɛ kɛ je Egipt bi ɔmɛ a dɛ mi; ejakaa e suɔmi ɔ ngɛ kɛ yaa neneene!
12 Lɛ nɛ e ngɔ e he wami kpetekpleenyɛ ɔ kɛ tsu nɔ́ nɛ ɔ; ejakaa e suɔmi ɔ ngɛ kɛ yaa neneene!
13 ⓗ Lɛ nɛ e gba Wo Tsu ɔ mi; ejakaa e suɔmi ɔ ngɛ kɛ yaa neneene!
14 Nɛ e ha e ma, Israel nyɛɛ wo ɔ mi kɛ be; ejakaa e suɔmi ɔ ngɛ kɛ yaa neneene!
15 Se Egipt matsɛ ɔ kɛ e ta a lɛɛ e kpata a hɛ mi ngɛ Wo Tsu ɔ mi; ejakaa e suɔmi ɔ ngɛ kɛ yaa neneene!
16 Lɛ nɛ e hɛɛ e ma a kɛ gu nga kplanaa a nɔ; ejakaa e suɔmi ɔ ngɛ kɛ yaa neneene!
17 Nɛ e gbe matsɛmɛ nguanguahi; ejakaa e suɔmi ɔ ngɛ kɛ yaa neneene!
18 Lɛ nɛ e gbe matsɛmɛ nɛ he biɛ nɛ ɔmɛ hulɔ, ejakaa e suɔmi ɔ ngɛ kɛ yaa neneene!
19 ⓘ Amor matsɛ, Sihon; ejakaa e suɔmi ɔ ngɛ kɛ yaa neneene!
20 ⓙ Bashan matsɛ, Og; ejakaa e suɔmi ɔ ngɛ kɛ yaa neneene!
21 Lɛ nɛ e ngɔ a zugba amɛ kɛ ha e ma a kaa a weto ní; ejakaa e suɔmi ɔ ngɛ kɛ yaa neneene!
22 Lɛ nɛ e ngɔ zugba amɛ kɛ ha e tsɔlɔ, Israel kaa e weto ní; ejakaa e suɔmi ɔ ngɛ kɛ yaa neneene!
23 Benɛ wa yi fi wawɛɛ ɔ, lɛ nɛ e kai wɔ; ejakaa e suɔmi ɔ ngɛ kɛ yaa neneene!
24 Lɛ nɛ e je wɔ kɛ je wa he nyɛli a dɛ mi; ejakaa e suɔmi ɔ ngɛ kɛ yaa neneene!
25 Lɛ nɛ e haa nibɔ ní tsuo niye ní; ejakaa e suɔmi ɔ ngɛ kɛ yaa neneene!
26 Nyɛɛ na Mawu nɛ ngɛ hiɔwe ɔ si; ejakaa e suɔmi ɔ ngɛ kɛ yaa neneene!