Yi jemi la
1 Nyɛ je Yawɛ yi! Nyɛ je Yawɛ biɛ ɔ yi! Nyɛ Yawɛ tsɔli tsuo, nyɛ je e yi!
2 Nyɛ nihi nɛ nyɛ daa si ngɛ Yawɛ we ɔ, ngɛ wa Mawu ɔ he klɔuklɔu ɔ, nyɛ je e yi!
3 Nyɛ je Yawɛ yi, ejakaa Yawɛ hi; nyɛ la kɛ je e biɛ ɔ yi, ejakaa e mi mi hi.
4 Yawɛ nitsɛ lɛ hla Yakob kɛ ha e he; e hla Israel kɛ pee e ma.
5 Imi lɛɛ i le kaa Yawɛ kle; Yawɛ kle pe mawu ɔmɛ tsuo kulaa.
6 Hiɔwe ɔ jio, zugba a nɔ jio, wo ɔ mi jio, muɔ voovoo ɔmɛ a mi jio, nɔ́ tsuaa nɔ́ nɛ́ Yawɛ suɔ ɔ, lɔ ɔ e peeɔ.
7 Lɛ nɛ e haa bɔku teɔ si ngɛ je ɔ nyagbe he; e pee oslabai kɛ ha hiɔmi, nɛ e jeɔ kɔɔhiɔ kpo kɛ jee e to he ɔmɛ.
8 Lɛ nɛ e gbe kekleekle bimɛ tsuo ngɛ Egipt, nimli adesahi a bimɛ, kɛ lohwehi a bimɛ.
9 Lɛ nɛ tsu nyakpɛ ní nguanguahi kɛ gbla Egipt matsɛ ɔ, kɛ e tsɔli ɔmɛ a tue.
10 Lɛ nɛ kpata je mahi babauu a hɛ mi, nɛ e gbe matsɛmɛ nguangua nɛ ɔmɛ:
11 Sihon, Amor bi a matsɛ ɔ, Og, Bashan matsɛ ɔ, kɛ Kanaan matsɛmɛ ɔmɛ tsuo;
12 nɛ e ngɔ a zugba a kɛ ha e ma, Israel kaa a weto ní.
13 Yawɛ, o biɛ ngɛ kɛ yaa neneene; Yawɛ, yi nɔhi tsuo ma kai mo.
14 Yawɛ ma fa e ma a he; e maa na e tsɔli ɔmɛ mɔbɔ.
15 ⓐ Je ma amɛ a we amaga amɛ ɔ, sika hiɔ kɛ sika tsu sɔuu, nimli adesahi a nine nya ní tsumi ji mɛ.
16 A ngɛ nya, se a tu we munyu; a ngɛ hɛngmɛ, se a hyɛ we nɔ́.
17 A ngɛ tue, se a nui nɔ́; mumi ko hu be a gugwɔ mi nɛ a woɔ.
18 I ná nɛ nihi nɛ pee mɛ, kɛ nihi nɛ ngɔ a hɛ kɛ fɔ a nɔ ɔ tsuo pee kaa amaga amɛ nɛ a pee ɔ nɔuu!
19 Nyɛ Israel ma, nyɛ je Yawɛ yi! Nyɛ Mawu we osɔfohi, nyɛ je Yawɛ yi!
20 Nyɛ Levi bi, nyɛ je e yi; nyɛ nihi tsuo nɛ nyɛ yee Yawɛ gbeye, nyɛ je e yi!
21 Nyɛ je Yawɛ yi ngɛ Zion; nyɛ je e yi ngɛ e we ɔ mi ngɛ Yerusalem. Nyɛ je Yawɛ yi!