Mose II, 33

Yawɛ fa Israel bi ɔmɛ ke a si Sinai yo ɔ

1 ⓙ Yawɛ de Mose ke, “Ma a nɛ o kpaka kɛ je Egipt zugba a nɔ ɔ, o kɛ mɛ nɛ je hiɛ ɔ kɛ ho zugba a nɛ i wo Abraham, Isak, kɛ Yakob si ke ma ngɔ kɛ ha a nina a nɔ ya.

2 Ma tsɔ bɔfo ko kɛ nyɛɛ o hɛ mi, nɛ ma fie Kanaan bi, Amor bi, Hit bi, Periz bi, Hiv bi, kɛ Yebus bi ɔmɛ tsuo kɛ je blɔ ɔ nɔ,

3 nɛ bɔfo ɔ ma kpaka nyɛ kɛ ya zugba nɛ hi, nɛ baa ní saminya hulɔ ɔ nɔ. Imi nitsɛ lɛɛ i kɛ nyɛ be yae, bɔ nɛ pee nɛ ma ko ya kpata nyɛ hɛ mi ngɛ blɔ ɔ nɔ, ejakaa ma nɛ kuɛ wa ji nyɛ.”

4 Benɛ ma a nu munyu yobu nɛ ɔmɛ ɔ, a ye kɔmɔ, nɛ nɔ ko nɔ ko wui june ní hu.

5 Yawɛ fa Mose ke e de ma a ke, “Ma nɛ kuɛ wa ji nyɛ; ke i kɛ nyɛ nyɛɛ hɛngmɛfia po, ma kpata nyɛ hɛ mi pɛsɛpɛsɛ. Lɔ ɔ he ɔ, nyɛ je nyɛ june ní ɔmɛ ngɛ nyɛ he, konɛ ma hyɛ bɔ nɛ ma pee nyɛ ha.”

6 Kɛkɛ nɛ Israel bi ɔmɛ kplɔ a he june ní ɔmɛ, nɛ kɛ je Horeb yo ɔ he kɛ yaa a, a ti nɔ ko nɔ ko wui june ní hu.

Kpe he bo tsu ɔ

7 Be tsuaa be nɛ Israel bi ɔmɛ ma ya to si ngɛ he ko ɔ, Mose maa ngɔ bo tsu nɛ ɔ nɛ e wo lɛ biɛ ke kpe he bo tsu ɔ kɛ ya ma ma sito he ɔ se tsitsaa. Nɔ tsuaa nɔ nɛ suɔ kaa e ma ya bi ní ngɛ Yawɛ ngɔ ɔ maa ya kpe he bo tsu ɔ mi ngɛ ma a sito he ɔ se tsitsaa a.

8 Ke e ba mi kaa Mose yaa sɛ kpe he bo tsu ɔ mi ɔ, nɔ tsuaa nɔ maa da si ngɛ lɛ nitsɛ e bo tsu sinya nya, nɛ e maa hi Mose kuɛ se hyɛe kɛ yaa si e maa sɛ bo tsu ɔ mi.

9 Ke Mose sɛ kpe he bo tsu ɔ mi pɛ kɛkɛ bɔku titima a kple si kɛ ba da kpe he bo tsu ɔ sinya a nya. Lɔ ɔ se ɔ, Yawɛ kɛ Mose maa tu munyu.

10 Ke ma a na bɔku titima a nɛ daa si ngɛ kpe he bo tsu ɔ sinya a nya pɛ mɛ tsuo a maa te si, nɛ a ma ja Mawu.

11 Yawɛ kɛ Mose maa tu munyu hɛ mi kɛ hɛ mi kaa bɔ nɛ nɔ kɛ e huɛ tuɔ munyu ɔ. Ke Mose kpale e se kɛ ba ma a sito he ɔ, e tsɔlɔ niheyo wayoo nɛ ji Nun binyumu Yoshua lɛɛ e ji kpe he bo tsu ɔ mi.

Yawɛ wo e ma a si

12 Mose de Yawɛ ke, “Mo kai kaa o de mi ke ma kpaka ma a kɛ ho, se o tsɔɔ we mi nɔ nɛ o maa tsɔ kɛ piɛ ye he. Mo nɔuu nɛ o de ke o le mi saminya, nɛ o bua jɔ ye he.

13 Lɔ ɔ he ɔ, i kpa mo pɛɛ, ke niinɛ nɛ o ngɛ ye he bua jɔmi ɔ, lɛɛ moo tsɔɔ mi o blɔ ɔ, konɛ ma le mo saminya, nɛ ma pee o suɔmi nya ní. Mo kai hu kaa kikɛmɛ a nimli nɛ ɔmɛ ɔ, mo nitsɛ o ma ji mɛ.”

14 Yawɛ he nɔ ke, “Imi nitsɛ i kɛ mo maa nyɛɛ kɛ ya fiafiaafia.”

15 Mose de lɛ ke, “Ke mo nitsɛ o kɛ wɔ be yae ɔ, lɛɛ mo ko ha nɛ waa je hiɛ ɔ.

16 Ke o kɛ wɔ yɛ ɔ nɛɛ, kɛ a maa pee kɛ na kaa o ngɛ i kɛ o ma a wa he suɔmi kɛɛ? Ke o kɛ wɔ nyɛɛ ɔ, lɔ ɔ loko i kɛ o ma a maa je muno ngɛ zugba a nɔ je ma amɛ tsuo a he.”

17 Yawɛ de Mose ke, “Nɔ́ nɛ o bi nɛ ɔ hu ma pee ha mo; ejakaa i le mo saminya, nɛ i ngɛ o he bua jɔmi.”

18 Kɛkɛ nɛ Mose de ke, “I kpa mo pɛɛ, ha ma na o hɛ mi nyami ɔ.”

19 ⓚ Yawɛ de Mose ke, “Ma ha ye hɛ mi nyami ɔ tsuo maa be ngɛ o hɛ mi, nɛ ye biɛ nɛ ji Yawɛ ɔ hu ma wo nɔ ta ngɛ o hɛ mi. Nihi nɛ sa dloomi ɔ, ma dloo mɛ; nɛ ni nɛmɛ nɛ sa mɔbɔ nami ɔ, ma na mɛ mɔbɔ.”

20 E ya nɔ nɛ e de ke, “Se ye hɛ mi lɛɛ i be hae nɛ o na; ejakaa nɔmlɔ adesa ko be nyɛe nɛ e na ye hɛ mi nɛ e yi ma na wami.”

21 Yawɛ de lɛ ke, “Hyɛ, blɔ ngɛ ye kasa nya ngɛ hiɛ ɔ nɛ o maa da tɛ sa nɔ.

22 Ke be nɛ ye hɛ mi nyami ɔ bee ɔ, ma ngɔ mo ngɔ wo tɛ puɔ mi ngɛ tɛ sa nɛ ɔ mi. I kɛ ye nine maa ha o nɔ kɛ yaa si ma be.

23 Lɔ ɔ se ɔ, ma je ye nine ngɛ o nɔ, nɛ o maa na ye kuɛ se, se pi ye hɛ mi.”