Mose II, 32

Sika tsu na bi ɔ

(<x>50 9:6-29</x>)

1 ⓓ Benɛ ma a na kaa Mose se ya fia si ngɛ yo ɔ nɔ, nɛ e kple we si kɛ bɛ ɔ, ma a bua a he nya kɛ ba na Aaron, nɛ a ba de lɛ ke, “Kikɛmɛ a Mose nɛ ɔ nɛ je wɔ kɛ je Egipt zugba a nɔ ɔ, wa li sane nɛ ya ba e nɔ. Lɔ ɔ he ɔ, moo pee mawu ha wɔ nɛ e nyɛɛ wa hɛ mi.”

2 Aaron de mɛ ke, “Nyɛ je sika tsu tue nya ní ɔmɛ ngɛ nyɛ yi ɔmɛ, kɛ nyɛ binyumu ɔmɛ, kɛ nyɛ biyi ɔmɛ a tue mi kɛ ba ha mi.”

3 Kɛkɛ nɛ ma a tsuo je sika tsu tue nya ní ɔmɛ ngɛ a tue mi, nɛ a ngɔ kɛ ba ha Aaron.

4 ⓔ E he tue nya ní ɔmɛ ngɛ a dɛ nɛ e sile, nɛ e plɛ sika tsu nyu ɔ kɛ wo tso nɛ a kpɛ́ mi, nɛ e kɛ pee sika tsu na bi. Kɛkɛ nɛ ma a de ke, “Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!”

5 Benɛ Aaron na nɔ́ nɛ ɔ, e puɛ bɔ sami la tɛ ngɛ sika tsu na bi ɔ hɛ mi, nɛ e fiɛ ke, “Hwɔɔ ɔ, a maa ye nyami ligbi ha Yawɛ.”

6 ⓕ E nɔ jena makɛ mla a, ma a te si nɛ a sã sami bɔhi, nɛ a kɛ tue mi jɔmi bɔhi hu ba. Ma a pue si, nɛ a ye ní, nɛ a nu ní; nɛ lɔ ɔ se ɔ, a fiɛ yo kɛ nyumu yakayaka fiɛmihi.

7 Yawɛ de Mose ke, “Mo kple si esɔesɔ; ejakaa o ma nɛ ji ni ɔmɛ nɛ o kpaka kɛ je Egipt zugba a nɔ kɛ ba a, a ble a he.

8 Blɔ nɛ i fa mɛ ke a nyɛɛ nɔ ɔ, a gba kɛ je nɔ momo; a puɛ na bi amaga nɛ a ja lɛ, nɛ a sã bɔ ha lɛ nɛ a de ke, ‘Israel, o mawu ɔ nɛ je mo kɛ je Egipt zugba a nɔ ɔ, lɛ ji nɛ ɔ nɛ!’ ”

9 Yawɛ ya nɔ nɛ e de Mose ke, “I kpa si nɛ i na kaa ma nɛ ɔ ji nimli komɛ nɛ a kuɛ wa saminya!

10 Lɔ ɔ he ɔ, moo hɛ mo kɛ ya se; i kɛ mɛ maa to ní nɛ ma kpata a hɛ mi; se moo lɛɛ ma ha o kɛ o weku kɛ nina maa bɔ kɛ pee ma kpetekpleenyɛ.”

11 ⓖ Se Mose kpa Yawɛ, e Mawu ɔ pɛɛ, nɛ e de ke, “Yawɛ, mɛni he je o mi mi fu o ma a nɛ o kɛ he wami kpetekpleenyɛ, kɛ kɔni si wami kpaka mɛ kɛ je Egipt zugba a nɔ ɔ?

12 Mɛni he je nɛ o ma ha nɛ Egipt bi ɔmɛ ma de ke, ‘E to yi mi yaya kaa e ma kpata e ma a hɛ mi ngɛ yo ɔmɛ a nɔ; lɔ ɔ he je nɛ e ya je mɛ kɛ je Egipt ɔ nɛ.’ Ha nɛ o mi mi fumi ɔ nya nɛ ba si, nɛ o kpale o nya se ngɛ yayami nɛ jinɛ o to kaa o maa pee o ma a he.

13 ⓗ Mo kai o tsɔli Abraham, Isak, kɛ Yakob. Mo kai mo nitsɛ o kita nɛ o ka ke, ‘Ma ha nɛ nyɛ nina maa hiɛ babauu kaa hiɔwe dodoehi, nɛ ma ngɔ zugba nɛ ɔ tsuo nɛ i wo nyɛ e he si ɔ kɛ ha mɛ, nɛ e maa pee a nɔ kɛ ya neneene ɔ.’ ”

14 Kɛkɛ nɛ Yawɛ kpale e nya se, nɛ yayami nɛ jinɛ e to kaa e maa ba ma a nɔ ɔ bɛ a nɔ hu.

15 Kɛkɛ nɛ Mose plɛ e he nɛ e kple si kɛ je yo ɔ nɔ kɛ ma, nɛ e hɛɛ tɛ tɛtlɛɛ enyɔ ɔmɛ nɛ a ngma mlaa amɛ ngɔ fɔ a nɔ ɔ ngɛ e dɛ mi; a ngma mlaa amɛ ngɛ hɛ mi kɛ se tsuo.

16 Mawu nitsɛ nɛ kpɛ́ tɛ tɛtlɛɛ ɔmɛ; nɛ mlaa amɛ nɛ a ngma ngɛ a nɔ ɔ hu, Mawu nitsɛ nɛ ngma.

17 Benɛ ma a hwɔ lele nɛ Yoshua nu he ɔ, e de Mose ke, “Moo bu tue! A ngɛ ta hwue ngɛ ma a sito he ɔ.”

18 Se Mose he nɔ nɛ e de ke, “Dɛbi, pi ni nɛmɛ nɛ ye manye ngɛ ta mi a lele hwɔmi, nɛ pohu pi ni nɛmɛ nɛ a ye a nɔ a bubuubui, kɛ ngmlaa ji nɛ ɔ; se mohu lali a gbi i ngɛ nue nɛ ɔ nɛ.”

19 Benɛ Mose miɔ nɛ e maa su ma a sito he ɔ, nɛ́ e na na bi ɔ, kɛ ni ɔmɛ nɛ a ngɛ doe ɔ, e mi mi fu; nɛ e kɛ tɛ tɛtlɛɛ ɔmɛ nɛ e hɛɛ ngɛ e dɛ mi ɔ fia si ngɛ yo ɔ sisi, nɛ e ywia mɛ.

20 E wo na bi ɔ nɛ a pee ɔ, nɛ e mɛ he la, nɛ e sile. Lɔ ɔ se ɔ, e wɛɛ lɛ nɛ e pee mamu bukɔbukɔ, nɛ e ngɔ fĩa nyu hɛ mi, nɛ e ngɔ ha Israel bi ɔmɛ nɛ a nu.

21 Mose bi Aaron ke, “Mɛni ma nɛ ɔ pee mo loko o ha nɛ a pee yayami agbo kaa kikɛ nɛ ɔ?”

22 Aaron he nɔ ke, “Ye nyɔmtsɛ, o mi mi nɛ ko fu mi. Mo nitsɛ o le nimli nɛ ɔmɛ kaa nɔ́ yaya peemi he a nyaa.

23 Mɛ nitsɛmɛ nɛ a ba de mi ke, ‘Moo pee mawu ha wɔ nɛ e nyɛɛ wa hɛ mi; ejakaa kikɛmɛ a Mose nɛ ɔ nɛ je wɔ kɛ je Egipt zugba a nɔ ɔ, wa li nɔ́ nɛ ya ba e nɔ.’

24 I de mɛ ke, ‘Nɔ tsuaa nɔ nɛ ngɛ sika tsu ɔ, e ngɔ kɛ ba.’ A ngɔ kɛ ba, nɛ i sake kɛ fɔ la mi, nɛ nɔ́ nɛ je mi kɛ ba ji kikɛmɛ a na bi nɛ ɔ nɛ!”

25 Benɛ Mose na kaa Aaron nine kpi ma a he, nɛ ma a ngɛ basabasa pee kɛ ngɛ a hɛ mi si puee ngɛ a he nyɛli ɔmɛ a hɛ mi ɔ,

26 e ho nɛ e ya da si ngɛ ma a sito he ɔ agbo ɔ nya, nɛ e de ke, “Nɔ tsuaa nɔ nɛ ngɛ Yawɛ se ɔ, nɔ ɔ nɛ ba ye ngɔ!” Kɛkɛ nɛ Levi bi ɔmɛ tsuo bua a he nya ngɛ he kake, nɛ a bu kɛ ba e ngɔ.

27 Nɛ e de mɛ ke, “Bɔ nɛ Yawɛ, Israel Mawu ɔ de ji nɛ ɔ nɛ: ‘Nyɛ ti nɔ tsuaa nɔ nɛ mia kɛ klaate, nɛ nyɛɛ kpa ma a sito he ɔ tsuo kɛ ya kɛ ba; kɛ je agbo kake nya kɛ yaa si agbo kpa nya, nɛ nyɛɛ gbe nɔ tsuaa nɔ nɛ nyɛ maa na; nyɛmi jio, huɛ jio, nɔ lele jio!’ ”

28 Levi bi ɔmɛ pee kaa bɔ nɛ Mose fa mɛ ɔ pɛpɛɛpɛ; nɛ jamɛ a ligbi ɔ, a gbe nimli maa pee akpe etɛ.

29 Mose de mɛ ke, “Mwɔnɛ ligbi nɛ ɔ, nyɛ je nyɛ he ngɔ to kaa Yawɛ sɔmɔli, ejakaa nyɛ ti nɔ tsuaa nɔ gbe lɛ nitsɛ e binyumu, kɛ lɛ nitsɛ e nyɛminyumu. Lɔ ɔ he ɔ, Yawɛ hu maa gbaa nyɛ.”

He piami

30 E nɔ jena a, Mose de ma a ke, “Nyɛ pee yayami agbo. Se kɛ̃, ma kuɔ yo ɔ kɛ ya Yawɛ ngɔ, kaa alini e maa nu ye gbi, nɛ e maa ngɔ nyɛ he yayami ɔ ngɔ pa nyɛ lo.”

31 Lɔ ɔ he ɔ, Mose kpale e se kɛ ho Yawɛ ngɔ ya nɛ e ya de lɛ ke, “Anɔkuale, ma nɛ ɔ pee yayami agbo kaa a ngɔ sika tsu kɛ pee mawu kɛ ha a he.

32 ⓘ Ke e maa hi ɔ, moo ngɔ a he yayami ɔ ngɔ pa mɛ. Se ke o kɛ a he yayami ɔ be mɛ pae ɔ, lɛɛ i kpa mo pɛɛ nɛ o gbe ye biɛ ngɛ womi ɔ nɛ o ngmaa o ni ɔmɛ a biɛ ngɛ mi ɔ mi mɔ.”

33 Yawɛ he nɔ ke, “Nihi nɛ pee yayami kɛ si mi ɔ, mɛ pɛ a biɛ ma gbe ngɛ ye womi ɔ mi ɔ nɛ.

34 Moo lɛɛ yaa nɛ o ya kpaka ye ma a kɛ ya he nɛ i de mo ɔ. Ye bɔfo ɔ maa nyɛɛ o hɛ mi. Se be ma nɛ ma wo ma a hiɔ ngɛ a he yayami ɔ he.”

35 Lɔ ɔ he ɔ, Yawɛ kɛ gbenɔ hiɔ gbla ma a tue; ejakaa a nyɛ Aaron nɔ nɛ e pee sika tsu na bi ha mɛ.