Mose II, 34

Mlaa tɛ tɛtlɛɛ enyɔne ɔmɛ

(<x>50 10:1-5</x>)

1 Yawɛ de Mose ke, “Mo kó tɛ tɛtlɛɛ enyɔ kaa kekle ní ɔmɛ, konɛ ma ngma munyuhi nɛ ngɛ kekle tɛ ɔmɛ nɛ o ywia a a nɔ ɔ kɛ fɔ nɔ.

2 Dla o he nɛ hwɔɔ mɔtu ɔ o kuɔ Sinai yo ɔ kɛ ba, nɛ o kɛ mi ba kpe ngɛ yo ɔ yi mi.

3 “Nɔ ko nɔ ko nɛ ko piɛ o he kɛ ba; a ko na nɔ ko ngɛ yo ɔ nɔ he ko, nɛ to, loo na kó ba ye ní ngɛ yo ɔ sisi.”

4 Kɛkɛ nɛ Mose kó tɛ tɛtlɛɛ enyɔ kaa kekle ní ɔmɛ. E te si mɔtu mla, nɛ e ngɔ tɛ tɛtlɛɛ enyɔ ɔmɛ ngɔ ma e dɛ, nɛ e kuɔ kɛ ho Sinai yo ɔ nɔ ya kaa bɔ nɛ Yawɛ fa lɛ ɔ. Benɛ e yaa a, e hɛɛ tɛ tɛtlɛɛ enyɔ ɔmɛ ngɛ e dɛ mi.

5 Yawɛ kple si kɛ ba ngɛ bɔku mi nɛ e ba da si ngɛ Mose kasa nya, nɛ e pale lɛ nitsɛ e biɛ nɛ ji Yawɛ ɔ.

6 ⓛ Lɔ ɔ se ɔ, Yawɛ ba be ngɛ Mose hɛ mi, nɛ e de kɛ gbi wawɛɛ ke, “Imi Yawɛ ɔ, Mawu mɔbɔ nalɔ, kɛ dloolɔ ji mi; ye mi mi fu we mla, nɛ ye suɔmi kɛ anɔkuale yemi hiɛ babauu.

7 I yeɔ ye si womi nɔ kɛ haa nimli akpeakpe, nɛ i ngɔɔ a he yayami kɛ tɔmi ngɔ paa mɛ. Se kɛ̃ i gblaa bimɛ kɛ bibimɛ a tue hluu kɛ ya siɔ yi nɔ etɛne kɛ eywiɛne bimɛ ngɛ a tsɛmɛ kɛ a nɛmɛ a yayamihi a he.”

8 Mose kɛ he sɔmi kpla si nɛ e ja Mawu.

9 E de ke, “Yawɛ, ke niinɛ nɛ o ngɛ ye he bua jɔmi ɔ, lɛɛ i kpa mo pɛɛ nɛ o kɛ wɔ nɛ ya. E ngɛ mi kaa ma nɛ ɔ kuɛ wa mohu, se moo ngɔ wa tɔmi ɔmɛ, kɛ wa he yayami ɔmɛ kɛ pa wɔ, nɛ o ngɔ wɔ kɛ pee mo nitsɛ o ma.”

A pee somi ɔ ehe ekohu

(<x>20 23:14-19</x>; <x>50 7:1-5</x>; <x>50 16:1-17</x>)

10 Yawɛ de Mose ke “Hyɛ i kɛ Israel ma a ngɛ soe. Ma pee nyakpɛ níhi ngɛ a kpɛti nɛ eko bɛ hyɛ ngɛ je nɛ ɔ mi he ko he ko, aloo ngɛ ma ko ma ko mi. Je ma amɛ tsuo nɛ bɔle mo ɔ maa na ní nguahi nɛ imi Yawɛ, i ngɛ tsue; ejakaa nɔ́ nɛ i yaa pee ha mo ɔ he ngɛ gbeye.

11 Mlaa nɛ i ngɛ mo woe mwɔnɛ ɔ, moo ye nɔ. Ma fie Amor bi, Kanaan bi, Hit bi, Periz bi, Hiv bi, kɛ Yebus bi ɔmɛ kɛ je blɔ mi ha mo.

12 Hyɛ saminya nɛ o kɛ ma he nɛ nyɛ yaa a mi bi ɔmɛ kó so somi ko, nɛ lɔ ɔ ba plɛ klama nɛ a tsɔ mo.

13 ⓜ Dɛbi, nyɛɛ hule a bɔ sami la tɛ ɔmɛ; nyɛɛ gbɛ a wɔ piɛ ɔmɛ, nɛ nyɛɛ ywia a yo wɔ ɔ nɛ a tsɛɛ lɛ Ashera a we amaga amɛ.

14 “Mo ko ja mawu kpa ko, ejakaa imi Yawɛ Mawu ɔ, a kɛ mi plee we nɔ́ he.

15 O kɛ nihi nɛ ngɛ zugba a nɔ ɔ kó so somi ko. Ke pi ja a, ke a ngɛ a mawu ɔmɛ jae nɛ a ngɛ bɔ sãe kɛ ngɛ mɛ hae ɔ, a ti nɔ ko kɛ̃ ma tsɛ mo ní yemi, nɛ o ma ya ye ní nɛ a kɛ sã bɔ ha a mawu ɔmɛ ɔ eko.

16 Jehanɛ hu, nyɛ ma ya ngɔ a biyi ɔmɛ ekomɛ ba ha nyɛ binyumu ɔmɛ. Nɛ ke a biyi ɔmɛ ngɛ a mawu ɔmɛ jae ɔ, a maa gbla nyɛ binyumu ɔmɛ kɛ ya piɛ a he kɛ ja a mawu ɔmɛ.

17 ⓝ “Mo ko ngɔ nɔ́ ko nɛ a sile kɛ pee mawu nɛ o ja.

18 ⓞ “Moo ye Abolokplolo nyami be ɔ. Kaa bɔ nɛ i fa mo ɔ, moo ye abolo kplolo ligbi kpaago ngɛ Abib nyɔhiɔ ɔ mi be nɛ a to ɔ pɛpɛɛpɛ; ejakaa Abib nyɔhiɔ ɔ mi o je Egipt kɛ ba a nɛ.

19 ⓟ “Bitɛte tsuaa bitɛte, kɛ o we mi lohwehi a kpɛti kekleekle eku tsuaa eku ɔ, ye nɔ ji lɛ; na jio, to jio.

20 ⓠ O teji kekleekle bi ɔ, o maa ngɔ jijɔ kɛ dani lɛ. Ke o be suɔe nɛ o dani lɛ ɔ, lɛɛ o maa ku e kuɛ. O ma dani o bitɛte tsuaa bitɛte. Nɔ ko nɔ ko nɛ ko ba ye hɛ mi kɛ e dɛ gu.

21 ⓡ “Mo tsu ní ligbi ekpa, se ligbi nɛ ji kpaago ɔ lɛɛ moo jɔɔ o he; ní gbami be tete jio, ní kpami be tete jio.

22 ⓢ “Moo ye Ngmakpami be ɔ be mi nɛ a ngɛ kpokploku kpɔe; nɛ o ye Gbasisihimi nyami be ɔ jeha a nyagbe.

23 “Daa jeha a, o ma a mi nyumu ɔmɛ tsuo nɛ a ba bua si etɛ ngɛ imi Yawɛ, Israel Mawu ɔ, ye hɛ mi.

24 Ma fie je ma amɛ kɛ je o blɔ ɔ nɔ, nɛ ma bli o huzu ɔmɛ a mi. Nɛ ke o ba Yawɛ, o Mawu ɔ hɛ mi si etɛ ngɛ jeha mi ɔ, nɔ ko hɛ be o zugba a nɔ kɔe.

25 ⓣ “Koo ngɔ abolo nɛ a kɛ masa sã a ngɔ piɛ lohwe nɛ o kɛ ngɛ bɔ sãe ha mi ɔ he. Lohwe nɛ a gbe Hetsɔmi nyami be ɔ hu, je nɛ ko na yi.

26 ⓤ “Daa jeha a, ngɔɔ o zugba a nɔ kekleekle yiblii kɛ ba imi Yawɛ, o Mawu ɔ, ye we ɔ. Koo hoo apletsi bi ngɛ e nyɛ nyɔ nyu mi.”

27 Yawɛ de Mose ke, “Ngmaa munyu nɛ ɔmɛ kɛ fɔ si; ejakaa somi nɛ i kɛ mo, kɛ Israel ngɛ soe ɔ daa si ngɛ kikɛmɛ a munyu nɛ ɔmɛ a nɔ.”

28 Mose kɛ Yawɛ hi lejɛ ɔ nyɔ kɛ pia ligbi nyingmi eywiɛ; e yi nɔ́ ko ɔ, nyu hu e nui. Nɛ e ngma somi munyu ɔmɛ nɛ ji mlaa nyɔngma amɛ ngɔ fɔ tɛ tɛtlɛɛ ɔmɛ a nɔ.

Mose kple si kɛ je Sinai yo ɔ nɔ

29 ⓥ Benɛ Mose kple si kɛ je Sinai yo ɔ nɔ kɛ ma a, e hɛɛ tɛ tɛtlɛɛ enyɔ ɔmɛ nɛ mlaa amɛ ngɛ a nɔ ɔ ngɛ e dɛ mi. E hɛ mi ngɛ kpɛe, ejakaa e kɛ Yawɛ ya tu munyu; se mohu lɛ nitsɛ e li enɛ ɔ.

30 Aaron kɛ Israel bi ɔmɛ tsuo na kaa Mose hɛ mi ngɛ kpɛe, nɛ a ye gbeye kaa a maa su e he.

31 Se Mose tsɛ mɛ, nɛ Aaron kɛ ma nikɔtɔma amɛ tsuo ba e ngɔ, nɛ Mose kɛ mɛ tu munyu.

32 Lɔ ɔ se ɔ, Israel ma mluku ɔ tsuo hɛ mɛ kɛ ba e ngɔ, nɛ e wo mɛ mlaa amɛ tsuo nɛ Yawɛ ha lɛ ngɛ Sinai yo ɔ nɔ ɔ.

33 Benɛ Mose kɛ mɛ tu munyu gbe nya a, e ngɔ nɔ́ kɛ ha e hɛ mi.

34 Be tsuaa be nɛ Mose ma ya sɛ kpe he bo tsu ɔ mi nɛ e kɛ Yawɛ ma ya tu munyu ɔ, e jeɔ hɛ mi hami nɔ́ ɔ ngɛ e hɛ mi kɛ ya siɔ be nɛ e miɔ nɛ e maa je kpo. Ke e je kpo kɛ ba nɛ e ba de Israel bi ɔmɛ nɔ́ tsuaa nɔ́ nɛ Yawɛ fa lɛ ke e de ɔ,

35 a naa kaa e hɛ mi ngɛ kpɛe. Lɔ ɔ se ɔ, Mose kpaleɔ ngɔɔ nɔ́ kɛ haa e hɛ mi kɛ ya siɔ be nɛ e maa ya nɛ e kɛ Yawɛ ma ya tu munyu ekohu.