Mose II, 17

Nyu je tɛ sa mi

(<x>40 20:1-13</x>)

1 Israel ma mluku ɔ tsuo hia kɛ je Sin nga a nɔ bɔɔ bɔɔ bɔɔ kaa bɔ nɛ Yawɛ fa mɛ ɔ, nɛ a ya to si ngɛ Refidim; se nyu be lejɛ ɔ nɛ ma a maa nu.

2 Lɔ ɔ he ɔ, ma a pia Mose, nɛ a de lɛ ke, “Ha wɔ nyu nɛ waa nu!” Mose de mɛ ke, “Mɛni he je nyɛ ngɛ mi piae? Mɛni he je nɛ nyɛ ngɛ Yawɛ kae ɔ?”

3 Se kuma ngɛ ma a yee, nɛ a tu munyu huitihuiti kɛ si Mose, nɛ a de ke, “Mɛni he je o je wɔ kɛ je Egipt nɛ o ma ha nɛ kuma ba gbe wɔ, wa bimɛ, kɛ wa lohwehi tsuo nɛ ɔ?”

4 Lɔ ɔ he ɔ, Mose kɛ hɛdɔ fa kue ha Yawɛ ke, “Kɛ ma pee ma nɛ ɔ kɛɛ? A miɔ nɛ a maa fia mi tɛ.”

5 Yawɛ de Mose ke, “Moo nyɛɛ ma a hlami kɛ ho. O kɛ Israel ma nimeli ɔmɛ ekomɛ nɛ ya, nɛ o hɛɛ tso ɔ nɛ o kɛ fia Nilo pa a ngɛ o dɛ mi.

6 O nɛ, ma da o hɛ mi ngɛ tɛ sa a nɔ ngɛ Sinai yo ɔ nɔ. Ngɔɔ tso ɔ kɛ fia tɛ sa a, nɛ nyu maa je mi kɛ ba ha ma a nɛ a nu.” Nɛ Mose pee ja ngɛ Israel ma nimeli ɔmɛ a hɛ mi.

7 Mose wo lejɛ ɔ biɛ ke Masa kɛ Meriba, nɛ e de ke, “I wo kikɛmɛ a biɛ nɛ ɔ, ejakaa lejɛ ɔ nɛ Israel bi ɔmɛ pia Yawɛ ngɛ, nɛ lejɛ ɔ nɔuu a ka lɛ ngɛ benɛ a bi ke, ‘Anɛ Yawɛ ngɛ wa kpɛti, aloo e be?’ ɔ.”

Israel kɛ Amalek hwu ta

8 Benɛ Israel bi ɔmɛ ngɛ Refidim ɔ, Amalek bi ɔmɛ hia ta ba tua mɛ ngɛ lejɛ ɔ.

9 Mose de Yoshua ke, “Moo hla nyumu ɔmɛ ekomɛ, nɛ hwɔɔ a kɛ Amalek bi ɔmɛ ya hwu. Imi lɛɛ ma ya da yoku ɔ yi mi kɛ Mawu tso ɔ ngɛ ye dɛ mi.”

10 Yoshua pee kaa bɔ nɛ Mose de lɛ ɔ, nɛ e ho nɛ e kɛ Amalek bi ɔmɛ ya hwu. Nɛ Mose, Aaron, kɛ Hur kuɔ yoku ɔ kɛ ho e yi mi ya.

11 Nɛ e ba mi kaa ke Mose wo e nine nɔ pɛ Israel bi ɔmɛ a nine gu Amalek bi ɔmɛ a nɔ. Ke e nine ba si pɛ kɛkɛ Amalek bi ɔmɛ a nine bɔni Israel bi ɔmɛ a he ngɔmi.

12 Se Mose kɔni ba gbo, nɛ Aaron kɛ Hur ya hla tɛ ba wo sisi. Nɔ kake da e kasa nya hiɛ, nɛ nɔ kake hu da e kasa nya hiɛ, nɛ a hɛɛ e kɔni ɔmɛ a mi ngɛ hiɔwe kɛ ya si pu nɔ si.

13 Nɛ Yoshua ye Amalek bi ɔmɛ a nɔ butuu.

14 ⓤ Yawɛ de Mose ke, “Ngmaa nɔ nɛ ɔ kɛ wo womi mi nɛ e pee kaimi nɔ́. Ha nɛ e su Yoshua kaa ma kpata Amalek bi ɔmɛ a hɛ mi, nɛ a be mɛ kaie hu ngɛ zugba a nɔ.”

15 Mose ma bɔ sami la tɛ ko nɛ e wo lɛ ke, “Yawɛ ji ye we aflangaa.”

16 E de ngɔ piɛ he ke, “Yawɛ hɛɛ e we aflangaa a ngɛ e dɛ mi. Yawɛ kɛ Amalek bi ɔmɛ maa hwu kɛ maa ya neneene!”