Mose II, 16

Mana kɛ hɔne

1 Israel ma a tsuo hia kɛ je Elim, nɛ a ba su Sin nga a nɔ, ngɛ Elim kɛ Sinai a kpɛti. Nɛ́ a je Egipt ɔ se nyɔhiɔ enyɔne ɔ ligbi nɛ ji nyɔngma kɛ enuɔ ɔ nɛ a hia a nɛ.

2 Israel ma kpekpemi ɔ tsuo tu munyu huitihuiti kɛ si Mose kɛ Aaron ngɛ nga a nɔ,

3 nɛ a de ke, “Wa ná nɛ Yawɛ gbe wɔ mohu ngɛ Egipt zugba a nɔ, he nɛ wa hii si ngɛ pɔ buɛhi a he, nɛ wa yeɔ ní wa tɔɔ ɔ. Hyɛ kaa nyɛ ngɔ wɔ kɛ ba nga nɛ ɔ nɔ, konɛ nyɛ ba gbe asafo nɛ ɔ tsuo kɛ mi mi hwɔ.”

4 ⓝ Kɛkɛ nɛ Yawɛ de Mose ke, “Hyɛ, ma ha abolo maa nɛ kɛ je hiɔwe pue si ha nyɛ. Daa ligbi ɔ, ma a maa ya nɛ a ya bua nɔ́ nɛ maa su mɛ ligbi kake yemi nya, nɛ ma kɛ ka mɛ ma hyɛ kaa a maa ye ye mlaa amɛ a nɔ lo.

5 Ligbi nɛ ji ekpa a lɛɛ a bua ligbi enyɔ yeye nya, nɛ a dla kɛ to.”

6 Kɛkɛ nɛ Mose kɛ Aaron de Israel bi ɔmɛ tsuo ke, “Gbɔkuɛ nɛ ɔ, nyɛ ma na maa le kaa Yawɛ ji nɔ nɛ jé nyɛ kɛ je Egipt zugba a nɔ ɔ nɛ.

7 Mɔtu ɔ, nyɛ maa na Yawɛ hɛ mi nyami ɔ; ejakaa e nu nyɛ munyu huitihuiti nɛ nyɛ tu kɛ si lɛ ɔ. Wɔɔ lɛɛ wa pi ni komɛ nɛ ke nyɛ hɔɔ nya si wo wa he nɛ e peeɔ nɔ́ ko.”

8 Mose de mɛ ke, “Yawɛ ma ha nyɛ lo nɛ nyɛɛ ye gbɔkuɛ, kɛ abolo nɛ maa tɔ nyɛ mɔtu; ejakaa e nu nya si nɛ nyɛ hɔɔ kɛ wo e he ɔ. Nyɛ munyu huitihuiti ɔmɛ ɔ, pi wɔ nɛ nyɛ tu kɛ si, se Yawɛ mohu.”

9 Mose de Aaron ke, “De Israel ma a kulaa ke a hɛ mɛ kɛ su Yawɛ he, ejakaa e nu a munyu huitihuiti ɔmɛ.”

10 Benɛ Aaron kɛ Israel ma a ngɛ munyu ɔ tue nɛ a plɛ nɛ a maa hyɛ nga a nɔ blɔ ɔ, né Yawɛ hɛ mi nyami nɛ je kpo ngɛ bɔku ɔ mi.

11 Yawɛ de Mose ke,

12 “I nu Israel bi ɔmɛ a nya si hɔɔmi ɔ. De mɛ ke gbɔkuɛ nya si nɛ ɔ, nyɛ ma na lo maa ye, nɛ mɔtu ɔ, nyɛ ma na abolo maa ye nɛ nyɛ maa tɔ, kɛkɛ nyɛ maa le kaa imi ji Yawɛ, nyɛ Mawu ɔ nɛ.”

13 Gbɔkuɛ ɔ, hɔnehi fuu ba ba ha a sito he ɔ; nɛ mɔtu ɔ, bɔ́ nɛ kɛ bɔle ma a.

14 Benɛ bɔ́ ɔ gbli ɔ, ní komɛ pue si ngɛ nga a nɔ pɛtɛpɛtɛ futafuta kaa ngo kpɔhi ngɛ zugba.

15 ⓞ Benɛ Israel bi ɔmɛ na a, a li nɔ́ nɛ ji. Enɛ ɔ he je ɔ, a de ngɛ a je gbi mi ke, “Mana.” E sisi ji, “Mɛni ji nɛ ɔ?” Mose de mɛ ke, “Abolo nɛ Yawɛ ha nyɛ nɛ nyɛɛ ye ɔ ji nɛ ɔ nɛ.

16 Mlaa nɛ e wo ngɛ he ji nɛ ɔ nɛ: ‘Nyɛ ti nɔ tsuaa nɔ nɛ muɔ bɔ nɛ e ma nyɛ maa ye. Nyɛɛ muɔ bɔ nɛ maa su nihi abɔ nɛ ngɛ we tsuaa we mi ɔ nya, bɔ nɛ nɔ kake ma na lita enyɔ hiɛmi.’ ”

17 Israel bi ɔmɛ pee ja; ni komɛ muɔ fuu, nɛ ni komɛ hu muɔ bɔɔ pɛ.

18 ⓟ Se benɛ a susu ɔ, a na kaa ni nɛmɛ nɛ muɔ fuu ɔ, a nɔ́ ɔ, pi kaa e hiɛ tsɔ. Ni nɛmɛ nɛ muɔ bɔɔ pɛ ɔ, mɛ hu a nɔ́ ɔ ngɛ bɔ nɛ sa; lɔ ɔ ji nɔ tsuaa nɔ muɔ bɔ nɛ maa su lɛ yemi nya pɛpɛɛpɛ.

19 Mose de mɛ ke, “Nɔ ko nɔ ko kó to eko nɛ je nɛ na yi.”

20 Se a ti ni komɛ bui nɔ́ nɛ Mose de ɔ tue, nɛ a to. Benɛ je na a, e sa nɛ e wo gɔgɔ kɛ e he fu gbii. Nɛ eko kɛ ya si je na Mose mi mi fu mɛ.

21 Daa mɔtu ɔ, nɔ tsuaa nɔ yaa nɛ e ya buaa bɔ nɛ maa su lɛ yemi nya; se ke pu nya wa pɛ e sile.

22 Ligbi nɛ ji ekpa a lɛɛ a bua ligbi enyɔ yemi hiɛmi nya, nɛ nɔ tsuaa nɔ ná lita eywiɛɛywiɛ. Nɛ benɛ ma nimeli ɔmɛ tsuo ba bɔ Mose amaniɛ ɔ,

23 ⓠ Mose de mɛ ke, “Bɔ nɛ Yawɛ de ji nɛ ɔ nɛ: ‘Hwɔɔ ji he jɔɔmi ligbi, Yawɛ Hejɔɔmi ligbi klɔuklɔu. Nyɛɛ sã nɔ́ tsuaa nɔ́ nɛ nyɛ ngɛ sami, nɛ nyɛɛ hoo nɔ́ tsuaa nɔ́ nɛ nyɛ ngɛ hoomi, nɛ nɔ́ nɛ maa piɛ ngɛ se ɔ, nyɛ ngɔ to si kɛ yaa si mɔtu.’ ”

24 Lɔ ɔ he ɔ, kaa bɔ nɛ Mose fa mɛ ɔ, a kɛ nɔ́ nɛ piɛ ɔ to si kɛ ya si mɔtu; nɛ e sa we, nɛ e wui gɔgɔ hulɔ.

25 Mose de mɛ ke, “Nyɛɛ ye enɛ ɔ mwɔnɛ ɔ, ejakaa mwɔnɛ ɔ ji Yawɛ Hejɔɔmi ligbi; mwɔnɛ ɔ, nyɛ be eko nae ngɛ nga a nɔ.

26 Nyɛ ma bua nya ligbi ekpa; se ligbi nɛ ji kpaago ɔ, nɛ ji Hejɔɔmi ligbi ɔ, nyɛ be eko nae.”

27 Ligbi nɛ ji kpaago ɔ, a ti ni komɛ je kpo nɛ a ya bua niye ní nya, se a nɛ eko.

28 Nɛ Yawɛ de Mose ke, “Kɛ yaa si mɛni be nɛ nyɛ maa ya nɔ ma gbo mi tue nɛ nyɛ ma kua ye mlaa amɛ a nɔ yemi?

29 Nyɛɛ hyɛ, imi Yawɛ, i ha nyɛ Hejɔɔmi ligbi; nɛ lɔ ɔ he ɔ, ligbi nɛ ji ekpa a nɔ ɔ, i haa nyɛ ligbi enyɔ nya ní. Nɔ tsuaa nɔ nɛ hi si ngɛ he nɛ e ngɛ; nɔ ko nɔ ko kó je kpo kɛ ya he ko ngɛ ligbi nɛ ji kpaago ɔ nɔ.”

30 Lɔ ɔ he ɔ, ma a jɔɔ a he ngɛ ligbi nɛ ji kpaago ɔ nɔ.

31 ⓡ Israel bi ɔmɛ tsɛ niye ní ɔ ke mana. E ngɛ kaa tso yiblii mi wu nyafii; e hiɛ futafuta, nɛ e ngɔɔmi ngɛ kaa akpɔɔnɔɔ nɛ hwo ngɛ mi.

32 Mose de ke, “Bɔ nɛ Yawɛ fa ji nɛ ɔ nɛ: ‘A susu mana lita enyɔ hiɛmi nya ngɔ to si ha nyɛ nina, konɛ a ba na niye ní nɛ i kɛ lɛ nyɛ ngɛ nga a nɔ benɛ i je nyɛ kɛ je Egipt zugba a nɔ ɔ.’ ”

33 ⓢ Mose de Aaron ke, “Hla buɛ ko, nɛ o kɛ mana lita enyɔ hiɛmi nya nɛ wo mi, nɛ o kɛ ma Yawɛ hɛ mi, nɛ a kɛ to si ha nyɛ nina.”

34 Nɛ kaa bɔ nɛ Yawɛ fa Mose ɔ, Aaron ngɔ kɛ ma somi daka a hɛ mi.

35 ⓣ Israel bi ɔmɛ ye mana a jeha nyingmi eywiɛ kɛ ya si a ya su zugba nɛ nihi ngɛ nɔ, nɛ ji Kanaan zugba a huzu nya.

36 (Ngɛ Hebri bi ɔmɛ a nɔ́ susumi mi ɔ, lita nyingmi enyɔ ji jua nɛ a po kɛ ha ní gbigbli).