Mose II, 18

Yetro ba slaa Mose

1 Mose ngatsɛ Yetro, Midian osɔfo ɔ nu níhi tsuo nɛ Mawu pee ha Mose kɛ e ma Israel ɔ he, kɛ bɔ nɛ Yawɛ je mɛ kɛ je Egipt.

2 ⓥ Benɛ ní nɛ ɔmɛ na we nɛ a ba a, Mose wo e yo Zipora blɔ kɛ ho e ngatsɛ Yetro ngɔ ya.

3 ⓦ E kɛ e binyumuwi enyɔ ɔmɛ ho. A tsɛɛ nɔ kake ke Gershon; e sisi ji, “I ya to nubwɔ ngɛ ma se.”

4 Nɔ kake hu biɛ ji Eliezer; e sisi ji “Tsaatsɛ e Mawu nɛ doo ha mi; lɛ nɛ je mi kɛ je Farao ɔ ta a nya.”

5 Mose ngatsɛ Yetro kpaka Mose yo ɔ, kɛ e binyumuwi enyɔ ɔmɛ kɛ ba nga a nɔ he nɛ Mose ba to si ngɛ ɔ, ngɛ Mawu yo ɔ he.

6 Nɛ e tsɔ ya de lɛ ke, “Imi, o ngatsɛ Yetro, kɛ o yo ɔ, kɛ o binyumuwi enyɔ ɔmɛ wa ma o ngɔ.”

7 Mose je kpo nɛ e kɛ e ngatsɛ ɔ ya kpe; e ba e he si nɛ e fua lɛ atuu. Nɛ benɛ a nga a he ta a, a sɛ bo tsu ɔ mi.

8 Mose bɔ e ngatsɛ ɔ a blɔ hiami ɔ mi sanehi tsuo: níhi nɛ Yawɛ pee Farao ɔ kɛ Egipt bi ɔmɛ nɛ e kɛ kpɔ Israel bi ɔmɛ, a blɔ hiami ɔ mi pɔtɔ kɛ dengme, kɛ bɔ nɛ Yawɛ je mɛ kɛ je kulaa mi.

9 Benɛ Yetro nu kpakpa nɛ Yawɛ pee Israel bi ɔmɛ, kɛ bɔ nɛ e he a yi wami kɛ je Egipt bi ɔmɛ a dɛ mi ɔ, e bua jɔ e he nɛ e nya,

10 nɛ e de ke, “A je Yawɛ, nɔ nɛ je nyɛ kɛ je Farao ɔ kɛ Egipt bi ɔmɛ a dɛ mi ɔ yi.

11 Kpaako loko i ná le paa kaa Yawɛ kle pe mawu ɔmɛ kulaa; ejakaa e he ma a yi wami kɛ je Egipt bi ɔmɛ a dɛ mi, benɛ a ngɛ mɛ nisɛ ní pee ɔ.”

12 Mose ngatsɛ Yetro ngɔ sami bɔ, kɛ bɔ kpa komɛ ba ha Yawɛ, nɛ Aaron kɛ Israel ma nimeli ɔmɛ tsuo ba, nɛ a kɛ Mose ngatsɛ ɔ ba bla kɛ ye bɔ sami ní ɔ ngɛ Mawu hɛ mi, nɛ a kɛ ja Mawu.

A hla kojoli komɛ

(<x>50 1:9-18</x>)

13 E nɔ jena a, Mose he sɛ, nɛ a kɛ ma sanehi ba e hɛ mi nɛ e kojo. E kojo kɛ je mɔtu kɛ ya si du bubui nɛ ni ɔmɛ daa si.

14 Benɛ Mose ngatsɛ ɔ na níhi tsuo nɛ Mose ngɛ tsue ngɛ ma a mi ɔ, e bi lɛ ke, “Mɛni o ngɛ pee nɛ ɔ? Mɛni he je o ngɔ ní tsumi nɛ ɔ ngɔ fɔ mo nɔ kake too o nɔ, nɛ ma a tsuo daa si ngɛ o kuɛ nɔ mɔtumɔtu kɛ ya si du bubui kikɛ nɛ ɔ?”

15 Mose he nɔ ke, “Ye ní tsumi ji nɛ ɔ nɛ, ejakaa ma a baa ye ngɔ ba biɔ Mawu ga womi.

16 Ke nɔ ko kɛ e nyɛmi na sane ɔ, a kɛ baa ye ngɔ nɛ i hyɛɛ mi, nɛ i tsɔɔ mɛ Mawu kita amɛ, kɛ Mawu blɔ nya tomi ɔmɛ.”

17 Kɛkɛ nɛ Mose ngatsɛ ɔ de lɛ ke, “O blɔ nya tomi ɔ piɛ bɔɔ.

18 Pɔ maa tɔ o kɛ ma a tsuo; ejakaa ma a tlomi ɔ jiɔ tsɔ, nɛ mo nɔ kake o be nyɛe tloomi.

19 Lɔ ɔ he ɔ, moo bu mi tue nɛ ma wo mo ga; Mawu nɛ piɛ o he. Moo lɛɛ moo da ma a nane mi ngɛ Mawu hɛ mi, nɛ o ngɔ a sane ɔmɛ kɛ ba fɔ Mawu hɛ mi.

20 Moo lɛɛ moo tsɔɔ mɛ Mawu mlaa amɛ, kɛ e suɔmi nya ní ɔmɛ. Moo tsɔɔ mɛ bɔ nɛ sa nɛ a ba a je mi, kɛ níhi nɛ sa nɛ a peeɔ.

21 Se ngɛ enɛ ɔmɛ a se ɔ, o kɛ o hɛngmɛ nɛ wo ma a mi nɛ o hla nihi nɛ a nine si wa kɛ ní tsumi, nihi nɛ ye ɔ Mawu gbeye, nihi nɛ yeɔ anɔkuale, nɛ a sume nyɔ mi ní. Ngɔɔ kikɛmɛ a nimli ngɔ to ma a nya. Ni komɛ nɛ a hyɛ nimli nyɔngma nɔ; ni komɛ nɛ a hyɛ nimli nyingmi enuɔ nɔ; ni komɛ nɛ a hyɛ nimli lafa nɔ, konɛ ni komɛ hu nɛ a hyɛ nimli akpe nɔ.

22 Ha nɛ mɛɛ a pee kojoli ngɛ ma a mi. Sanehi nɛ a he wa pe mɛ ɔ, ha a kɛ ba o hɛ mi; se sane tsɔwitsɔwihi lɛɛ mɛ nitsɛmɛ a ye. Ke o pee jã a, lɛɛ a maa kpee mo kɛ tloo ma a tlomi ɔ, nɛ pɔ be mo tɔe tsɔ.

23 Ke o pee enɛ ɔ kaa bɔ nɛ Mawu fa mo ɔ, lɛɛ pɔ be mo tɔe, nɛ ni ɔmɛ tsuo maa kpale kɛ ho a wehi a mi ya kɛ tue mi jɔmi.”

24 Mose bu e ngatsɛ ɔ ga womi ɔ tue, nɛ e pee kaa bɔ nɛ e de lɛ ɔ.

25 Mose hla nyumuhi nɛ a nine si wa kɛ je Israel bi ɔmɛ a kpɛti, nɛ e wo mɛ nikɔtɔmahi ngɛ ma a nya. Ni komɛ hyɛɛ nimli nyɔngma nɔ, ni komɛ hyɛɛ nimli nyingmi enuɔ nɔ; ni komɛ hyɛɛ nimli lafa nɔ, nɛ ni komɛ hu hyɛɛ nimli akpe nɔ.

26 Mɛ ji ni nɛmɛ nɛ kojoɔ ma a sanehi daa be tsuaa be. Mɛ nitsɛmɛ nɛ a buá sane tsɔwitsɔwihi a he; se sanehi nɛ a he wa lɛɛ a kɛ baa Mose ngɔ.

27 Pee se ɔ, Mose wo e ngatsɛ ɔ blɔ, nɛ Yetro kpale kɛ ho e ma mi ya.