Ezra 8

Nihi nɛ kpale kɛ je ma se kɛ ba

1 We puɔ nya dali nɛ kɛ Ezra kpale kɛ je Babilonia kɛ ba Yerusalem ngɛ Matsɛ Artaherhes yi nɔ ɔ ji nɛ ɔmɛ nɛ:

2 Gershom, Finehas we puɔ nya. Daniel, Itama we puɔ nya. Shekania bi Hatush, David we puɔ nya. Zakaria, kɛ nihi 150, Parosh we puɔ nya (womihi ngɛ nɛ tsɔɔ a powu). Zerahia bi Eliehoenai, kɛ nihi 200, Pahat Moab we puɔ nya. Yahaziel bi Shekania kɛ nihi 300, Zatu we puɔ nya. Yonatan Ebed, kɛ nihi 50, Adin we puɔ nya. Atalia bi Yeshaya, kɛ nihi 70, Elam we puɔ nya. Mikael bi Zebadia, kɛ nihi 80, Shefatia we puɔ nya. Yehiel bi Obadia, kɛ nihi 218, Yoab we puɔ nya. Yosifia bi Shelomit, kɛ nihi 160, Bani we puɔ nya. Bebai bi Zakaria, kɛ nihi 28, Bebai we puɔ nya. Hakatan bi Yohanan, kɛ nihi 110, Azgad we puɔ nya Elifelet, Yeuel, Shemaya, kɛ nihi 60, Adonikan we puɔ nya (mɛɛ lɛɛ pee se loko a kpale kɛ ba). Utai, Zakur, kɛ nihi 70, Bigvai we puɔ nya.

3

4

5

6

7

8

9

10

11

12

13

14

Ezra hla Levi bi nɛ a sɔmɔ ngɛ Mawu we ɔ

15 I bua ni ɔmɛ tsuo a nya kɛ ho pa nɛ bee kɛ yaa Ahava ma a mi ɔ nya ya. Wa hi lejɛ ɔ ligbi etɛ. I na osɔfohi ngɛ lejɛ ɔ, se Levi bi ɔmɛ lɛɛ a ti nɔ ko nɔ ko be a kpɛti.

16 Lɔ ɔ he ɔ, i tsɔ nɛ a ya tsɛ ma nimeli nɛ ɔmɛ kɛ ba: Eliezer, Ariel, Shemaya, Elnatan, Yarib, Elnatan, Natan, Zakaria, kɛ Meshulam. Yoyarib kɛ Elnatan nɛ a juɛmi mi kuɔ saminya a hu piɛ a he.

17 I tsɔ mɛ Yuda bi ɔmɛ a nyatsɛ Ido ngɔ ngɛ Kasifia ma a mi. Sɛ gbi nɛ i ha mɛ kɛ ho ji kaa a ya de lɛ, Ido ɔ, kɛ e nyɛmimɛ ɔmɛ nɛ tsuɔ ní ngɛ Mawu we ɔ ke a ha wɔ sɔmɔli nɛ a ba tsu ní ngɛ Mawu we ɔ ngɛ Yerusalem.

18 Mawu dloomi nya a, a ha wɔ Sherebia, nyumu ko nɛ hɛ mi ka si. E je Mahli we puɔ nya. E tsɛ ji Levi, nɛ e nɛ̃ biɛ ji Israel. E kɛ e binyumuhi, kɛ e nyɛminyumuhi nɛ piɛ e he kɛ ba a, a yibɔ ji nyɔngma kɛ kpaanyɔ.

19 A ha wɔ Hashabia, kɛ jehanɛ Yeshaya nɛ je Merari we puɔ nya a hulɔ, nɛ a nyɛmimɛ kɛ a bimɛ nyingmi enyɔ kɛ mɛ ba.

20 Nimli nɛ ɔmɛ a se ɔ, Mawu we ɔ ní tsuli lafa enyɔ kɛ nyingmi enyɔ hu ba. Matsɛ David kɛ e tsɔli ɔmɛ nɛ a hla nimli nɛ ɔmɛ ngɔ to kaa a piɛ Levi bi ɔmɛ a he kɛ sɔmɔ. Nɛ a wo mɛ tsuo a biɛ ta ngɛ womi ɔ mi.

Ezra kɛ ma a ha hwɔ nɛ a fa kue

21 Benɛ wa ngɛ Ahava pa a nya a, i fa ke nɔ tsuaa nɔ nɛ ha hwɔ, nɛ́ wɔ tsuo waa ba wa he si ngɛ wa Mawu ɔ hɛ mi, konɛ waa fa kue ha lɛ ke e fia blɔ mi tso ha wɔ, nɛ́ e baa wɔ, wa bimɛ, kɛ wa weto ní tsuo yi.

22 Kaa pe i ya bi matsɛ ɔ ke e ha wɔ ta buli nɛ hi okpɔngɔhi a nɔ nɛ a bu wa he kɛ je he nyɛli a dɛ mi ngɛ blɔ ɔ nɔ ɔ, jinɛ e ko pee mi zo; ejakaa i ha nɛ e nu sisi momo kaa nɔ tsuaa nɔ nɛ ngɔɔ e hɛ ngɔ fɔɔ wa Mawu ɔ nɔ ɔ, e gbaa lɛ; se nɔ tsuaa nɔ nɛ kuaa lɛ wa Mawu ɔ, lɛ hu e bua jɔɛ jamɛatsɛ he; e gblaa nɔ ɔ tue wawɛɛ mohu.

23 Lɔ ɔ he ɔ, wa ha hwɔ, nɛ wa fa kue kɛ tsɛ wa Mawu ɔ ke e bu wa he, nɛ niinɛ, e bu wa kue fami ɔ tue.

Níhi nɛ a kɛ ke Mawu we ɔ

24 I hla Sherebia, Hashabia, kɛ a nyɛmimɛ nyɔngma kɛ je osɔfo ɔmɛ a hɛ mi nyɛɛli ɔmɛ a kpɛti.

25 Kɛkɛ nɛ i ngmɛ sika tsu ɔ, sika hiɔ ɔ, kɛ ní ɔmɛ nɛ matsɛ ɔ, kɛ e ga woli ɔmɛ, e tsɔli ɔmɛ, kɛ Israel ma a tsuo ngɔ kɛ ba ke ɔ; lɔ ɔ se ɔ, i ngɔ ní ɔmɛ tsuo ngɔ wo osɔfo ɔmɛ a dɛ, konɛ a kɛ tsu ní ngɛ Mawu we ɔ.

26 Níhi nɛ i ngɔ ha mɛ ɔ ji: sika hiɔ nɛ jiimi ji tɔn 22 sika hiɔ kplu lafa nɛ jiimi ji kilo 70 sika tsu nɛ jiimi ji kilo 3,400 sika tsu kã nyingmi enyɔ nɛ jiimi ji kilo 8.4 kã enyɔ nɛ a kɛ akɔblee kpakpa pee, se a he jua wa kaa nɔ́ nɛ sika tsu a kɛ pee.

27

28 I de nihi nɛ i hla a ke, “Yawɛ, nyɛ nɛmɛ a Mawu ɔ nimli klɔuklɔuhi ji nyɛ. Sika tsu, kɛ sika hiɔ kpluhi nɛ ma a kɛ ba ha Mawu kaa nike ní nɛ je a tsui mi faa a, lɔ ɔmɛ hu ngɛ klɔuklɔu jã nɔuu.

29 Nyɛɛ hyɛ ní ɔmɛ a nɔ saminya kɛ ya su Mawu we ɔ ngɛ Yerusalem. Ke nyɛ su lejɛ ɔ, nyɛɛ ngmɛ ní ɔmɛ ngɛ osɔfo ɔmɛ a tsu ɔ mi ngɛ osɔfo nikɔtɔma amɛ, Levi bi ɔmɛ, kɛ Israel ma nimeli ɔmɛ a hɛ mi, konɛ nyɛɛ tu ngɔ wo a dɛ.”

30 Kɛkɛ nɛ osɔfo ɔmɛ, kɛ Levi bi ɔmɛ muɔ sika tsu, sika hiɔ, kɛ ní ɔmɛ tsuo nɛ a ngɔ wo wa dɛ mi ɔ, konɛ a hyɛ nɔ kɛ ya su Mawu we ɔ ngɛ Yerusalem.

Wa kpale kɛ ba Yerusalem

31 Kekleekle nyɔhiɔ ɔ we ligbi nyɔngma kɛ enyɔ ɔ, wa je Ahava pa a nya, nɛ wa pue nɔ kɛ yaa Yerusalem. Wa Mawu ɔ piɛ wa he, nɛ he nyɛli, kɛ nihi nɛ wo wɔ ká tsuo nyɛ we nɛ a pee wɔ nɔ́ ko.

32 Benɛ wa ba su Yerusalem ɔ, wa jɔɔ wa he ligbi etɛ.

33 Ligbi eywiɛne ɔ, wa ya Mawu we ɔ, nɛ wa ya ngmɛ sika tsu ɔ, sika hiɔ ɔ, kɛ ní kpa amɛ; nɛ wa tu mɛ kɛ wo osɔfo Meremot, Uria bi ɔ dɛ. Nihi nɛ piɛ e he ji Finehas bi Eleazar, kɛ Levi bi enyɔ, Yozabad, Yeshua bi ɔ, kɛ Noadia, Binui bi ɔ.

34 A kane ní ɔmɛ tsuo nɛ a ngmɛ, nɛ a ngma kɛ fɔ si.

35 Jamɛ a be ɔ, nihi tsuo nɛ a nuu mɛ nyɔguɛ kɛ ho ma se ya nɛ kpale kɛ ba a ba sã sami bɔ ha Israel Mawu ɔ. A sã na ku nyɔngma kɛ enyɔ ngɛ Israel ma a tsuo nane mi, nɛ a sã agbosu nyingmi nɛɛ kɛ ekpa, kɛ jijɔ nyingmi kpaago kɛ kpaago hulɔ. Lɔ ɔ se ɔ, a sã akpakpo nyɔngma kɛ enyɔ kɛ kpa mɛ nitsɛmɛ a he yayamihi a he pɛɛ.

36 Jehanɛ se hu, a ngɔ matsɛ ɔ nine nya womi ba ha amlaalo ɔmɛ, kɛ ma nimeli nɛ a ngɛ Yufrate pa a se ɔ. Nɛ enɛ ɔ he je ɔ, a piɛ ma a he, nɛ a tsu Mawu we ɔ ní tsumi hulɔ.