Ezra 9

Ezra na le kaa Yuda bi kɛ ni kpahi sɛ gba si himi mi

1 Ní nɛ ɔmɛ tsuo a se ɔ, ma nimeli ɔmɛ a ti ni komɛ ba ye ngɔ nɛ a ba de mi ke, “Israel ma a, osɔfo ɔmɛ, kɛ Levi bi ɔmɛ tsɔ we a he kɛ ji nihi nɛ ngɛ zugba a nɔ ɔ a he. Ní hiemi níhi nɛ a ngɛ peeɔ, a kɛ mɛ lɛ peeɔ. Kikɛmɛ a zugba amɛ, kɛ ma amɛ ji Kanaan, Hit, Periz, Yebus, Amon, Moab, Egipt, kɛ Amor.

2 Yuda nyumuhi kɛ a binyumuhi tsuo ya ngɔ zugba a nɔ yihi; nɛ Mawu ma klɔuklɔu ɔ kɛ nɔ́ nɛ ɔ ble a he. Ma tsɔli kɛ ma ní tsuli titli ji nihi nɛ yeɔ fɔ ngɛ kikɛmɛ a nɔ́ nɛ ɔ mi.”

3 Benɛ i nu nɔ́ nɛ ɔ, i hía ye he tade sisi nɔ́, kɛ nɔha nɔ́ ɔ tsuo. I bɔni ye yi bwɔmi, kɛ ye kpɛni fami, nɛ i pee basaa kɛ hii si.

4 Nɔ́ nɛ Israel Mawu ɔ de ngɛ yayami nɛ nihi nɛ kpale kɛ je ma se kɛ ba a pee ɔ he ɔ, nihi babauu nu he. A kɛ he domi blibliibli ba bɔle mi kɛ kpe be mi nɛ i pee basaa kɛ hii si ɔ, hluu kɛ ya si gbɔkuɛ nya si bɔ sami be.

5 Gbɔkuɛ bɔ sami be ɔ, i gbe ye hwɔ hami ɔ nya, nɛ i te si ngɛ zugba kɛ ye he tade sisi nɔ́ ɔ, kɛ nɔha nɔ́ ɔ nɛ i hía a. I kplã si, nɛ i wo ye nine nɔ kɛ ha Yawɛ, ye Mawu ɔ.

6 I fa kue ke, “Ye Mawu lee, ye hɛ mi pue si; e ngɛ mi zo pee kaa ma wo ye yi nɔ nɛ ma hyɛ mo. Wa he yayami pee kaa tlomi nɛ a to glegleegle kɛ be wa yi he kɛ ya su hiɔwe lokoo.

7 Kɛ je wa nɛmɛ a yi nɔ kɛ ba su mwɔnɛ ɔ, wɔ o ma a, wa pee yayami gbegbeegbe. Wa yayami ɔmɛ a he ɔ, ma je li ɔmɛ a matsɛmɛ ɔmɛ ba nuu wɔ, wa matsɛmɛ ɔmɛ, kɛ wa osɔfo ɔmɛ tsuo. A gbe wɔ, a kpɔ wa níhi ngɛ wa dɛ, nɛ a nuu wɔ kɛ ho ma se ya ngɛ pã mi kaa nyɔguɛhi. A ha wa hɛ mi pue si kulaa; nɛ wa ngɛ zo ɔ mi kɛ mwɔɔ.

8 Jehanɛ Yawɛ, wa Mawu, pee se ɔ, o na wɔ mɔbɔ, nɛ wa ti ni komɛ kɛ̃ ngɛ je mi, nɛ o ha wa ba ngɛ o ma klɔuklɔu ɔ mi, konɛ wa hɛ mi nɛ tsɔ wɔ nɛ waa ye wa he kɛ je nyɔguɛ yemi mi.

9 A pee wɔ nyɔguɛhi, se ngɛ wa nyɔguɛ si himi ɔ mi ɔ, o je o suɔmi nɛ ngɛ daa a kpo kɛ tsɔɔ wɔ. O ngmɛɛ we wa he, nɛ o ha Persia matsɛmɛ ɔmɛ na wɔ mɔbɔ, nɛ a ha wa nɔ gbagba te ekohu, bɔ nɛ pee nɛ Mawu we ɔ nɛ ku kɛ pue si ɔ, waa ma lɛ ekohu, nɛ waa hi hiɛmɛ nɛ ɔ ngɛ Yuda kɛ Yerusalem ngɛ tue mi jɔmi mi.

10 “Mawu, jehanɛ lɛɛ ní nɛ ɔmɛ tsuo a se ɔ, mɛni ma kpale de? Mlaahi nɛ o wo wɔ ɔ, wa tɔ̃ lɛ tsuo.

11 O de wɔ kɛ gu gbali nɛ ji o tsɔli ɔmɛ a nɔ ke zugba a nɛ wa yaa ngɔ kɛ pee wa nɔ́ ɔ, a ble zugba a. Bɔ nɛ e ba ji kaa nihi nɛ hi zugba a nɔ ɔ, yayami sɔuu a peeɔ. A pee níhi nɛ a hiee babauu ngɛ zugba a nɔ tsuo, kɛ je zugba a nyagbe he kake kɛ ya si e nyagbe he kake.

12 ⓢ Lɔ ɔ he ɔ, wa kó ha wa biyi ɔmɛ ya gba ma je li ɔmɛ a binyumu ɔmɛ, nɛ wa kó ngɔ a biyi ɔmɛ kɛ ha wa binyumu ɔmɛ. Wa ko ha mɛ tue mi jɔmi, nɛ wa ko ngmɛ mɛ blɔ nɛ a plɔke kɔkɔɔkɔ. Kɛkɛ wa ma na he wami; wa maa ye zugba a nɔ niba ní, nɛ wa ma si ha wa nina kɛ maa ya neneene.

13 Níhi nɛ ba wa nɔ ɔ ji yayami nɛ wa pee, kɛ tɔmihi nɛ wa tɔ̃ ɔ a he tue gblami. Se kɛ̃ ɔ, wa na kaa o na wɔ mɔbɔ; o gbla we wa tue bɔ nɛ sa wɔ, nɛ o ha wa ti ni komɛ ngɛ je mi kɛ mwɔɔ.

14 Anɛ wa ma gbo tue ekohu nɛ waa kɛ nihi nɛ peeɔ musu bɔmi ní nɛ ɔmɛ nɛ sɛ gba si himi mi lo? Anɛ o mi mi be la woe wawɛɛ kɛ yaa si o ma kpata wɔ tsuo wa hɛ mi pɛsɛpɛsɛ nɛ nɔ kake po be piɛe lo?

15 Yawɛ, Israel Mawu, moo lɛɛ dalɔ ji mo, se kɛ̃, o ha wa yi na wami kɛ ba si mwɔnɛ ɔ. Wa ngɛ jajee ngɛ o hɛ mi kaa wa yeɔ fɔ, nɛ e sɛ́ kulaa kaa waa ba o hɛ mi.”