Ezra 7

Ezra ba su Yerusalem

1 Ní nɛ ɔmɛ a se benɛ Artaherhes ngɛ tsɛ yee ngɛ Persia zugba a nɔ ɔ, nyumu ko ba hi si. E biɛ ji Ezra. E tsɔɔ e weku kpa hluu kɛ ya pi osɔfo nɔkɔtɔma Aaron kikɛ nɛ ɔ: Ezra tsɛ ji Seraya, Seraya tsɛ ji Azaria, Azaria tsɛ ji Hilkia.

2 Hilkia tsɛ ji Shalum, Shalum tsɛ ji Zadok, nɛ Zadok hu tsɛ ji Ahitub.

3 Ahitub tsɛ ji Amaria, Amaria tsɛ ji Azaria, nɛ lɛ hu e tsɛ ji Merayot.

4 Merayot tsɛ ji Zerahia, Zerahia tsɛ ji Uzi, nɛ Uzi tsɛ ji Buki.

5 Buki tsɛ ji Abishua, Abishua tsɛ ji Finehas, Finehas tsɛ ji Eleazar, nɛ Eleazar tsɛ ji Aaron.

6 Ezra nɛ ɔ, womi ngmalɔ ji lɛ, nɛ mlaa a nɛ Yawɛ, Israel Mawu ɔ ngɔ ha Mose ɔ, e le lɛ tsuo fitsofitso. Akɛnɛ Yawɛ, Mawu ɔ nɛ Ezra jaa lɛ ɔ, gbaa Ezra he je ɔ, e nine su nɔ́ tsuaa nɔ́ nɛ e bi matsɛ ɔ nɔ. Matsɛ Artaherhes tsɛ yemi ɔ we jeha kpaagone ɔ mi ɔ, Ezra kɛ Israel bi komɛ hia blɔ kɛ je Babilonia kɛ ba Yerusalem. Nimli nɛ ɔmɛ ji osɔfohi, Levi bi, Mawu we ɔ lali, Mawu we ɔ buli, kɛ ní tsuli.

7

8 A je Babilonia kekleekle nyɔhiɔ ɔ we kekle ligbi ɔ, nɛ Mawu dloomi nya a, a ba su Yerusalem nyɔhiɔ enuɔne ɔ we kekle ligbi ɔ.

9

10 Ezra ngɔ e wami tsuo ngɔ ha kaa e maa kase Yawɛ mlaa a nɛ e tsu he ní. E suɔ hu kaa e maa tsɔɔ Israel ma a Mawu mlaa a, kɛ blɔ nya tomi ɔmɛ tsuo.

Matsɛ Artaherhes ha Ezra womi ko

11 Womi nɛ Matsɛ Artaherhes ngɔ ha Ezra nɛ ji osɔfo, kɛ womi ngmalɔ nɛ le Yawɛ mlaa amɛ, kɛ blɔ nya tomi ɔmɛ fitsofitso kɛ ha Israel ma a ní tsɔɔmi ɔ mi munyu ji nɛ ɔ nɛ:

12 “Osɔfo Ezra, mo womi ngmalɔ nɛ o le Mawu nɛ ngɛ hiɔwe ɔ mlaa a saminya; imi Matsɛ Artaherhes nɛ i ngɛ mo womi nɛ ɔ ngmae. Mo he manye!

13 “Israel bi nɛ ngɛ ye nɔ yemi he ɔmɛ tsuo, a we osɔfohi, kɛ Levi bi nɛ a suɔ kaa a maa ya Yerusalem ɔ, i ngɛ fae ke a kɛ mo nɛ ya faa.

14 I kɛ ye ga woli kpaago ɔmɛ wa ngɛ mo tsɔe kɛ yaa Yerusalem kɛ Yuda nɛ o ya slaa lejɛ ɔmɛ, konɛ o Mawu ɔ mlaa nɛ ngɛ o dɛ ɔ, o hyɛ bɔ nɛ a ngɛ nɔ yee ha.

15 Sika tsu, kɛ sika hiɔ nike ní nɛ ɔmɛ ɔ, ngɔɔ kɛ ya. Nike ní nɛ ɔmɛ ɔ, i kɛ ye ga woli ɔmɛ wa je wa tsui mi faa wa ngɔ ke Israel Mawu ɔ nɛ e hi he ji Yerusalem ɔ.

16 Ngɔɔ ní nɛ ɔmɛ hu kɛ piɛ he: sika hiɔ, sika tsu tsuo nɛ o ma bua nya ngɛ Babilonia zugba a nɔ, kɛ nike níhi nɛ Israel ma a, kɛ osɔfo ɔmɛ wo si kaa a ma ha kɛ je a tsui mi faa a; nɛ o ngɔ lɛ tsuo kɛ ya Mawu we ɔ nɛ ngɛ Yerusalem ɔ.

17 “Hyɛ sika nɛ ɔ nɔ saminya, konɛ o kɛ he na kuhi, agbosuhi, jijɔhi, blɛfo, kɛ wai, nɛ o kɛ ya sã bɔ ngɛ bɔ sami la tɛ ɔ nɔ ngɛ nyɛ Mawu ɔ we ɔ ngɛ Yerusalem.

18 Sika tsu, kɛ sika hiɔ nɛ maa piɛ ngɛ ní nɛ ɔmɛ a hemi se ɔ, nɔ́ tsuaa nɔ́ nɛ sa o kɛ o nyɛmimɛ ɔmɛ nyɛ hɛ mi kaa nyɛɛ kɛ maa pee, nɛ maa sa Mawu hɛ mi ɔ, nyɛɛ pee.

19 Níhi tsuo nɛ a ngɔ ha mo nɛ a kɛ sɔmɔ ngɛ O Mawu we ɔ, ngɔɔ kɛ ya ha Mawu ngɛ Yerusalem.

20 Enɛ ɔmɛ a se ke ní kpa komɛ a he maa hia nɛ a kɛ ma tsu ní ngɛ o Mawu ɔ we ɔ, yaa ngɔ sika ngɛ matsɛ ɔ nito he ɔ nɛ a kɛ pee.

21 “Imi Matsɛ Artaherhes, i ngɛ nyɛ matsɛ nito he ɔ nɔ hyɛli tsuo nɛ ngɛ Yufrate pa a se ɔ mlaa woe ke nɔ́ tsuaa nɔ́ nɛ osɔfo Ezra, Mawu nɛ ngɛ hiɔwe ɔ mlaa tsɔɔlɔ ɔ ma bi nyɛ ɔ, nyɛ ha lɛ esɔ.

22 Níhi nɛ e ma bi nyɛ ɔ, nyɛ ha lɛ kɛ yaa su kaa kikɛ nɛ ɔ: sika hiɔ kilo 3,400; ngma kilo 10,000; wai tɔ nyingmi enuɔ oliv nu tɔ nyingmi enuɔ kɛ ngo bɔ tsuaa bɔ.

23 “Nɔ́ tsuaa nɔ́ nɛ Mawu nɛ ngɛ hiɔwe ɔ ma fa nyɛ ke nyɛ tsu ngɛ we ɔ he ɔ, nyɛɛ pee pɛpɛɛpɛ, bɔ nɛ pee nɛ e mi mi ko ba fu imi, loo nihi nɛ ma ba ye tsɛ ngɛ ye se ɔ.

24 I ngɛ hae nɛ nyɛɛ le hu kaa mlaa ngmɛ́ blɔ kaa nyɛ heɔ tó ko kulaa ngɛ nimli nɛ ɔmɛ a dɛ: osɔfohi, Levi bi, Mawu we ɔ lali, agbo nya buli, sɔmɔli ngɛ Mawu we ɔ, loo tsɔli kpahi ngɛ Mawu we ɔ.

25 “Mo Ezra, ngɔɔ nile nɛ Mawu ha mo ɔ kɛ tsu nɔ́ nɛ ɔ; moo hla ma a nɔ hyɛli, kɛ kojoli, nihi nɛ le o Mawu ɔ mlaa a, nɛ́ a hyɛ ye nɔ yemi he ɔ nɔ ngɛ pa a se. Ni nɛmɛ nɛ li mlaa a, tsɔɔ mɛ.

26 Nɔ tsuaa nɔ nɛ ma tɔ̃ o Mawu ɔ mlaa a, aloo imi matsɛ, ye mlaa a, a gbla e tue nɔuu; a gbe lɛ, loo a je lɛ we, loo a kpɔ e níhi ngɛ e dɛ, aloo a wo lɛ tsu.”

Ezra je Mawu yi

27 Ezra la kɛ je Mawu yi ke, “Á je Yawɛ, wa nɛmɛ a Mawu ɔ yi. Lɛ nɛ e kɛ susumi kpakpa wo matsɛ ɔ yi mi kaa e pee nɔ́ ko kaa kikɛ nɛ ɔ kɛ wo Mawu we ɔ nɛ ngɛ Yerusalem ɔ hɛ mi nyami.

28 Mawu dloomi nya a, matsɛ ɔ, kɛ e ga woli ɔmɛ, kɛ e ma ní tsuli kpanaa amɛ tsuo ná ye he bua jɔmi. Yawɛ, ye Mawu ɔ wo mi kã, nɛ i bua Israel ma nimeli ɔmɛ a nya, konɛ i kɛ mɛ tsuo waa kpale kɛ ya Yerusalem.”