Kronika II, 2

Salomo dla ní kɛ ha Yawɛ we ɔ mami

(<x>110 5:1-18</x>)

1 Jehanɛ, Matsɛ Salomo to e yi mi kaa e maa po we kɛ ha Yawɛ nɛ a ja lɛ ngɛ lejɛ ɔ, konɛ e ma matsɛ we kɛ ha lɛ nitsɛ e he.

2 E hla nihi akpe nyingmi kpaago nɛ a maa tloo tlomi, kɛ nihi akpe nyingmi kpaanyɔ nɛ a ma gba tɛ. Nihi nɛ maa hyɛ ní tsumi ɔ nɔ ji akpe etɛ kɛ e nya lafa ekpa.

3 Salomo tsɔ nɛ a kɛ sɛ gbi ya ha Tiro matsɛ, Hiram ke, “Kaa bɔ nɛ o kɛ tsaatsɛ David hi si, nɛ o ha lɛ seda tsohi nɛ e kɛ po we nɛ e hi mi ɔ, o kɛ mi nɛ hi si ja nɔuu.

4 I yaa po we kɛ wo Yawɛ, ye Mawu ɔ hɛ mi nyami. We nɛ ɔ maa pee he klɔuklɔu nɛ a hla kɛ to ha Yawɛ. Lejɛ ɔ i kɛ ye ma a ma sɔmɔ Yawɛ ngɛ. Wa maa sã tsopa kɛ e he via, nɛ waa kɛ abolo klɔuklɔu ɔ maa ma Yawɛ hɛ mi daa ngɛ lejɛ ɔ. Daa mɔtu kɛ gbɔkuɛ ɔ, wa maa sã sami bɔhi ngɛ lejɛ ɔ. Wa maa sã sami bɔhi Hejɔɔmi ligbi, Nyɔhiɔhe nyami be, kɛ nyami be kpahi hu ngɛ lejɛ ɔ kɛ wo Yawɛ, wa Mawu ɔ hɛ mi nyami. Blɔ nya nɛ Yawɛ to kɛ ha Israel kɛ yaa neneene ji nɛ ɔ nɛ.

5 We nɛ ma po nɛ ɔ maa kle agbo; ejakaa wa Mawu ɔ kle pe mawu ɔmɛ tsuo.

6 ⓕ Se mɛnɔ ma nyɛ maa po we nɛ sa ha Mawu? Hiɔwe lokoo ɔ nitsɛ po klee we ha lɛ. Lɛɛ mɛnɔ ji mi mɔ nɛ ma po we ha Yawɛ, kaa ja he nɛ a maa sã tsopa kɛ e he via kɛ ha lɛ ngɛ kɛkɛ.

7 Lɔ ɔ he ɔ, moo wo nyumu ko nɛ ga ngɛ e hɛ mi blɔ kɛ ba ha mi. E pee nɔ ko nɛ le sika tsu, sika hiɔ, akɔblee, kɛ dade he ga ní tsumi, nɛ e ma nyɛ maa ngma ní ngɛ nɔ hulɔ. Jehanɛ, e pee nɔ ko nɛ le bo bluu, bo he jua wawɛ nɛ hɛɛ alamua tu su, kɛ bo tsu lomi. Nyumu nɛ ɔ ma ba piɛ ga ní tsuli nɛ ngɛ Yuda kɛ Yerusalem nɛ tsaatsɛ David hla mɛ kɛ to ɔ a he kɛ tsu ní.

8 I le kaa o tsɔli nɛ ngɛ Lebanon ɔ le tso hɛmi saminya. Lɔ ɔ he ɔ, ha nɛ a hɛ seda, sɛsɛo, kɛ algum tsohi ha mi. Ye tsɔli ɔmɛ ma ba piɛ o tsɔli ɔmɛ a he

9 kɛ gba tso babauu ha mi; ejakaa we nɛ i to nɛ ma po nɛ ɔ maa kle agbo, nɛ e maa hi fɛu saminya.

10 Ma mane o ní tsuli ɔmɛ ngma nɛ jiɔmi ji tɔn akpe enyɔ, akoko nɛ jiɔmi ji tɔn akpe enyɔ, wai lita akpe lafa eywiɛ, kɛ oliv nu hu lita akpe lafa eywiɛ.”

11 Matsɛ Hiram ngma womi kɛ mane Salomo ke, “Akɛnɛ Yawɛ suɔ e ma a he je ɔ, e wo mo matsɛ ngɛ a nɔ.

12 Á je Yawɛ, Israel Mawu nɛ bɔ hiɔwe kɛ zugba a yi! E ha Matsɛ David bi ní lelɔ; nɔ nɛ hɛ mi ka si, nɛ e ngɛ juɛmi; nɔ nɛ ma ba po we ha Yawɛ, nɛ e maa ma lɛ nitsɛ hu e we.

13 I ngɛ ga ní tsulɔ ko nɛ hɛ mi ka si saminya tsɔe kɛ ma o ngɔ; e biɛ ji Huram.

14 E nyɛ je Dan wɛtso ɔ mi, se e tsɛ lɛɛ Tiro no ji lɛ. E le sika tsu, sika hiɔ, akɔblee, dade, tɛ, kɛ tso a he ní tsumi. E tsuɔ bo bluu, bo he jua wawɛ nɛ hɛɛ alamua tu su, kɛ bo tsu he ní. E nyɛɔ nɛ e ngmaa ní kɛ woɔ níhi a mi, nɛ níhi a he foni tsuaa foni nɛ a kɛ maa tsɔɔ lɛ ɔ, e nyɛɔ tsuɔ he ní. Ha nɛ e piɛ o ga ní tsuli ɔmɛ, kɛ o tsɛ David ga ní tsuli ɔmɛ a he kɛ tsu ní.

15 Lɔ ɔ he ɔ, ngma a, akoko ɔ, wai ɔ, kɛ oliv nu ɔ nɛ o wo ta a, kɛ mane wɔ jehanɛ.

16 Wa maa hɛ seda tsuo nɛ o ngɛ hlae ɔ ngɛ Lebanon yo ɔmɛ a nɔ. Wa maa fi mɛ kɛ bla, nɛ waa kɛ maa gu wo nɔ kɛ ya pue Yopa, konɛ o ha nɛ a ya muɔ ngɛ lejɛ ɔ kɛ ya Yerusalem.”

A je Yawɛ we ɔ pomi sisi

(<x>110 6:1-38</x>)

17 Enɛ ɔ se ɔ, Matsɛ Salomo ha a kane nibwɔhi tsuo nɛ ngɛ Israel zugba a nɔ kaa bɔ nɛ e tsɛ David pee ɔ; nɛ a na nibwɔhi akpe lafa kɛ nyingmi enuɔ kɛ etɛ kɛ e nya lafa ekpa.

18 E dla ní tsumi nɛ ɔmɛ kɛ ha mɛ: nihi akpe nyingmi kpaago maa tloo tlomi, akpe nyingmi kpaanyɔ ma gba tɛ, nɛ akpe etɛ kɛ e nya lafa ekpa maa hyɛ ni ɔmɛ a nɔ, konɛ a tsu ní ɔ saminya.