Kronika II, 1

Matsɛ Salomo bi nile

(<x>110 3:1-15</x>)

1 Matsɛ David bi Salomo tsɛ yemi ɔ ya nɔ wawɛɛ nitsɛ. Yawɛ, e Mawu ɔ gbaa lɛ, nɛ e pee lɛ nɔmlɔ ngua.

2 Matsɛ Salomo kɛ Israel ma kpekpemi ɔ tsuo tu munyu: asafoatsɛmɛ ɔmɛ nɛ ngɛ nihi akpehi kɛ lafahi a nya a, kojoli, ma nikɔtɔmahi, kɛ we puɔ nya dali ɔmɛ tsuo.

3 Nɛ Salomo kɛ ma a tsuo pue nɔ kɛ ho jami he ɔ ya ngɛ Gibeon. A ya lejɛ ɔ, ejakaa kpe he bo tsu ɔ nɛ Yawɛ tsɔlɔ Mose pee ngɛ nga a nɔ ɔ, Gibeon ji he nɛ e ngɛ.

4 ⓐ (Somi daka a lɛɛ benɛ David ya ngɔ lɛ kɛ je Kiriat Yearim kɛ ba Yerusalem ɔ, e pee bo tsu ha lɛ, nɛ e kɛ lɛ ma mi ngɛ lejɛ ɔ.)

5 ⓑ Akɔblee bɔ sami la tɛ ɔ nɛ Uri bi Bezalel, Hur bibi ɔ pee ɔ hu maa si ngɛ kpe he bo tsu ɔ hɛ mi ngɛ Gibeon. Matsɛ Salomo kɛ ma a tsuo ya ja Yawɛ ngɛ lejɛ ɔ.

6 Salomo gbe lohwe akpe nɛ e kɛ sã sami bɔ ngɛ he nɛ a jaa Yawɛ ngɛ ɔ, ngɛ akɔblee bɔ sami la tɛ ɔ nɔ, ngɛ kpe he bo tsu ɔ hɛ mi.

7 Jamɛ a nyɔ ɔ mi ɔ, Mawu je e he kpo ngɔ tsɔɔ Salomo, nɛ e bi lɛ ke, “Mɛni o suɔ nɛ ma ha mo?”

8 Salomo he nɔ ke, “O je suɔmi agbo kpo ngɔ tsɔɔ tsaatsɛ David; nɛ mwɔnɛ ɔ, o ha nɛ i ba ngɛ tsɛ yee ngɛ e se.

9 ⓒ Yawɛ Mawu lee, si nɛ o wo tsaatsɛ ɔ, moo ye nɔ koo. O wo mi matsɛ ngɛ ma nɛ a he hiɛ babauu kaa zugba zu nɛ ɔ a nɔ,

10 lɔ ɔ he ɔ, ha mi nile, kɛ nɔ́ sisi numi nɛ ma kɛ ye ma nɛ ɔ a nɔ. Ke pi ja a, lɛɛ kɛ ma pee kɛ ye o ma kpetekpleenyɛ nɛ ɔ nɔ kɛɛ?”

11 Mawu he nɔ nɛ e de Salomo ke, “O bi nɔ́ nɛ sa pɛ. O bi we ní nami, aloo june, aloo biɛ. O bi we ke a gbe o he nyɛli ha mo, aloo a ha nɛ o wami se nɛ kɛ. Mohu ɔ, o bi nile, kɛ nɔ́ sisi numi nɛ o kɛ ye ye ma a nɛ i wo mo matsɛ ngɛ a nɔ ɔ nɔ.

12 Enɛ ɔ he je ɔ, i ha mo nile, kɛ nɔ́ sisi numi. Jehanɛ, ma wo mo ní, nɛ ma ha mo june, kɛ biɛ nɛ matsɛ ko matsɛ ko na we hyɛ. O se hu matsɛ ko matsɛ ko be nae kɛ mo maa sɔ.”

Matsɛ Salomo he wami kɛ e ní nami

(<x>110 10:26-29</x>)

13 Kɛkɛ nɛ Salomo je jami he ɔ ngɛ Gibeon, he nɛ kpe he bo tsu ɔ ngɛ ɔ, nɛ e kpale kɛ ba Yerusalem. E hi lejɛ ɔ kɛ ye matsɛ ngɛ Israel ma a nɔ.

14 ⓓ Salomo bua ta zugba lɛhi, kɛ ta okpɔngɔhi a nya, nɛ e na ta zugba lɛ akpe kɛ e nya lafa eywiɛ, kɛ ta okpɔngɔ akpe nyɔngma kɛ enyɔ. Ní nɛ ɔmɛ ekomɛ ngɛ e ngɔ ngɛ Yerusalem, nɛ e ngɔ ekomɛ hu ya to ma kpa komɛ a mi.

15 Salomo yi nɔ ɔ, sika hiɔ kɛ sika tsu hiɛ babauu ngɛ Yerusalem kaa tɛ; seda tso hu pɔ he kaa sikamore tso.

16 ⓔ Matsɛ Salomo tsɔli ya heɔ okpɔngɔ ngɛ Musri kɛ Kilikia kɛ ba haa lɛ.

17 A ya heɔ ta zugba lɛhi hu ngɛ Egipt. Mɛ kɛ̃ a ya heɔ okpɔngɔhi, kɛ ta zugba lɛhi, nɛ a ya juaa kɛ haa Hit, kɛ Siria matsɛmɛ ɔmɛ. A juaa ta zugba lɛ kake sika hiɔ yi lafa ekpa, kɛ okpɔngɔ kake sika hiɔ yi lafa kɛ nyingmi enuɔ.