Matsɛmɛ II, 25

Yerusalem hɛ mi kpatami

(<x>140 36:13-21</x>; <x>300 52:3</x>-11)

1 ⓚ Zedekia tsɔ atuã kɛ wo Babilonia matsɛ, Nebukadnezar. Enɛ ɔ he je ɔ, Zedekia yi nɔ jeha nɛ ji nɛɛ ɔ, nyɔhiɔ nɛ ji nyɔngma a we ligbi nɛ ji nyɔngma a nɔ ɔ, Nebukadnezar kɛ e tabo ɔ tsuo ba tua Yerusalem. A sa ma a yi, nɛ a fia kpokuhi kɛ bɔle ma a kɛ kpe.

2 A sa ma a yi hluu kɛ ya si Matsɛ Zedekia yi nɔ jeha nɛ ji nyɔngma kɛ kake ɔ.

3 Nyɔhiɔ nɛ ji eywiɛ ɔ we ligbi nɛ ji nɛɛ ɔ, benɛ hwɔ ɔ nya ba wa nɛ ma mi bi ɔmɛ na we ní nɛ a ye ɔ,

4 ⓛ a ywia gbogbo ɔ nɛ a fia kɛ wo ma a he ɔ. Jamɛ a be ɔ mi ɔ, Babilonia bi ɔmɛ bɔle ma a kɛ kpe mohu, se matsɛ ɔ, kɛ ta buli ɔmɛ tsuo tu fo nyɔ ɔ mi. A gu matsɛ abɔɔ ɔ mi kɛ ya be ngɛ agbo ɔ nɛ ngɛ gbogbo enyɔ ɔmɛ a kpɛti ɔ nya; nɛ a ngɔ a yi ngɔ ka Yordan kɔ̃ ɔ mi blɔ.

5 Babilonia tabo ɔ nyɛɛ Zedekia se nɛ a ya nu lɛ ngɛ Yeriko nga a nɔ; e ta buli ɔmɛ tsuo gbɛ fĩa kɛ je e he.

6 A ngɔ Zedekia ya ha Matsɛ Nebukadnezar ngɛ Ribla; nɛ lejɛ ɔ Nebukadnezar kojo lɛ nɛ e bu lɛ fɔ ngɛ.

7 ⓜ A gbe Zedekia binyumu ɔmɛ ngɛ e hɛ mi. Lɛ nitsɛ lɛɛ a ta e hɛngmɛhi, nɛ a bɔ lɛ pã; nɛ a ngɔ lɛ kɛ ho Babilon ya.

A sã Yawɛ we ɔ

(<x>300 52:12-23</x>)

8 Babilonia matsɛ, Nebukadnezar yi nɔ jeha nyɔngma kɛ nɛɛ ɔ mi, nyɔhiɔ nɛ ji enuɔ ɔ we ligbi nɛ ji kpaago ɔ nɔ ɔ, Nebukadnezar tatsɛ kɛ tsɔlɔ nɛ a tsɛɛ lɛ Nebuzaradan ya Yerusalem.

9 E ya sã Yawɛ we ɔ, kɛ matsɛ we ɔ, kɛ nimli nguahi tsuo nɛ ngɛ Yerusalem ɔ a wehi,

10 nɛ e ta buli ɔmɛ hule gbogbo nɛ a fia kɛ wo ma a he ɔ.

11 Ni nɛmɛ nɛ piɛ ngɛ ma a mi, kɛ ni nɛmɛ nɛ kú nigii kɛ ho Babilonia matsɛ ɔ ngɔ ya a, Nebuzaradan ngɔ mɛ tsuo kɛ ho Babilonia ya.

12 Se e si nimli gu komɛ nɛ be nɔ́ ko mi ɔ ngɛ Yuda, konɛ a hu ngmɔ, nɛ a tsu ní ngɛ wai abɔɔ ɔmɛ a mi.

13 ⓝ Babilonia bi ɔmɛ ywia akɔblee titima amɛ nɛ ngɛ Yawɛ we ɔ, kɛ akɔblee nyu nɔ́ agbo ɔ kɛ e sisi daka amɛ; nɛ a muɔ akɔblee ɔ kɛ ho Babilonia ya.

14 ⓞ A muɔ buɛ ɔmɛ, sofi ɔmɛ, la gbemi ní ɔmɛ, tsopa kɛ e he via kã amɛ, kɛ akɔblee ní ɔmɛ nɛ a kɛ sɔmɔɔ ngɛ Yawɛ we ɔ hu kɛ ho.

15 A muɔ nɔ́ tsuaa nɔ́ nɛ a kɛ sika tsu, loo sika hiɔ pee ɔ, ngɛyu ɔmɛ, kɛ kã wawi ɔmɛ.

16 Akɔblee níhi nɛ Matsɛ Salomo pee kɛ wo Yawɛ we ɔ mi, nɛ ji titima enyɔ ɔmɛ, kɛ nyu nɔ́ agbo ɔ kɛ e sisi daka amɛ lɛɛ a nyɛ we nɛ a ngmɛ, ejakaa akɔblee ɔ jiɔ tsɔ.

17 Titima enyɔ ɔmɛ tsuo sɔ fiee; kake kami ji nine mi blimi nyingmi etɛ kɛ ekpa, nɛ akɔblee kpɔ ngɛ eko tsuaa eko yi mi. Kpɔ kake hiɔwe yami ji nine mi blimi ekpa, nɛ a kɛ akɔblee pee ya kɛ e mi nɔ́ ko kaa tso yiblii nɛ ngɔɔ tsɔwitsɔwihi kɛ mimlaa akɔblee kpɔ ɔmɛ.

A nuu Yuda bi ɔmɛ kɛ ho Babilonia ya

(<x>300 52:24-27</x>)

18 Tatsɛ ɔ ngɔ osɔfo nɔkɔtɔma Seraya kɛ e setsɔ, nɛ ji osɔfo Zefania, kɛ Yawɛ we ɔ buli etɛ ɔmɛ hu nyɔguɛ.

19 Jehanɛ, nimli nɛ e ngɔ kɛ je ma a mi ji nɛ ɔmɛ nɛ: asafoatsɛ ɔ nɛ hyɛɛ ta buli ɔmɛ a nɔ ɔ, matsɛ ga woli enuɔ nɛ ngɛ ma a mi kɛ mwɔɔ ɔ, asafoatsɛ ɔ setsɔ ɔ nɛ ji womi ngmalɔ nɛ buaa ma mi bi ɔmɛ a nya kɛ yaa ta a, kɛ ma mi bi kpahi nyingmi ekpa.

20 Nebuzaradan ngɔ mɛ ya ha Babilonia matsɛ ɔ ngɛ Ribla.

21 Babilonia matsɛ ɔ fia mɛ ní nɛ e gbe ngɛ Ribla, ngɛ Hamat zugba a nɔ. Bɔ nɛ a pee kɛ ngɔ Yuda bi ɔmɛ nyɔguɛ kɛ je a zugba a nɔ ji nɛ ɔ nɛ.

Yuda amlaalo, Gedalia

(<x>300 40:7-9</x>; <x>300 41:1-3</x>)

22 Babilonia matsɛ, Nebukadnezar wo Ahikam binyumu Gedalia, Shafan bibi ɔ amlaalo ngɛ Yuda; nɛ e ngɔ lɛ ngɔ to nihi nɛ a si ngɛ lejɛ ɔ, nɛ a ngɔɛ mɛ kɛ yɛ Babilonia a a nya.

23 Benɛ Yuda asafoatsɛmɛ ɔmɛ, kɛ ta buli ɔmɛ nɛ mɛɛ a ngɔɛ a he ngɔ ha we ɔ nu kaa Babilonia matsɛ ɔ wo Gedalia amlaalo ɔ, mɛ tsuo pɛpɛɛpɛ a ba nɛ a ba piɛ Gedalia he ngɛ Mizpa. Mɛ ji nɛ ɔmɛ nɛ: Netania binyumu Ishmael, Karea binyumu Yohanan, Tanhumet binyumu Seraya nɛ je Netofa a, kɛ Yezania nɛ je Maaka a.

24 Gedalia ka asafoatsɛmɛ ɔmɛ, kɛ a we bi ɔmɛ kita, nɛ e de mɛ ke, “Nyɛ ko ye Babilonia bi ɔmɛ gbeye. Nyɛɛ lɛɛ nyɛ ba hi zugba a nɔ nɛ nyɛ sɔmɔ Babilonia matsɛ ɔ; nɛ nɔ́ tsuaa nɔ́ maa hi ha nyɛ.”

25 Se nyɔhiɔ nɛ ji kpaago ɔ, Netania binyumu Ishmael, Elishama bibi ɔ nɛ je matsɛ weku ɔ mi ɔ, ngɔ nyumuhi nyɔngma kɛ ho ya tua Gedalia ngɛ Mizpa; nɛ a gbe lɛ, kɛ nihi nɛ e kɛ mɛ ngɛ lejɛ ɔ, Israel bi, kɛ Babilonia bi tsuo.

26 ⓟ Enɛ ɔ se ɔ, Israel bi ɔmɛ tsuo, ohiatsɛmɛ, niatsɛmɛ, kɛ asafoatsɛmɛ ɔmɛ je kɛ ho Egipt ya; ejakaa a ngɛ Babilonia bi ɔmɛ gbeye yee.

A je Yehoyakin

(<x>300 52:31-34</x>)

27 Jeha mi nɛ Evilmerodak ba bɔni tsɛ yemi ngɛ Babilonia ma a nɔ ɔ, e na Yuda matsɛ, Yehoyakin mɔbɔ, nɛ e je lɛ ngɛ tsu mi. Nɛ́ a nu Yehoyakin kɛ ya wo tsu ngɛ ma se ɔ, jeha nyingmi etɛ kɛ kpaagone ɔ we nyɔhiɔ nyɔngma kɛ enyɔ ɔ we ligbi nyingmi enyɔ kɛ kpaago ɔ nɔ nɛ a je lɛ.

28 Evilmerodak kɛ Yehoyakin hi si saminya, nɛ e ha lɛ blɔ nya nɛ pe bɔ nɛ e pee matsɛmɛ kpa amɛ nɛ a ngɔ mɛ nyɔguɛ kɛ piɛ e he ngɛ Babilonia a.

29 Enɛ ɔ he je ɔ, a ngmɛ Yehoyakin blɔ nɛ e je pã mi tade ɔmɛ ngɛ e he ngɔ pue si, nɛ e ya yeɔ ní ngɛ matsɛ okplɔɔ ɔ he daa ligbi kɛ ya si benɛ e gbo.

30 Jehanɛ se hu, matsɛ ɔ haa lɛ yemi kɛ buami sika ko daa ligbi kɛ ya si e gbenɔ be.