Matsɛmɛ II, 24

1 ⓔ Benɛ Yehoyakim ngɛ tsɛ yee ɔ, Babilonia matsɛ, Nebukadnezar hia ta ba tua Yuda. Yehoyakim sɔmɔ lɛ jeha etɛ, nɛ lɔ ɔ se ɔ, e tsɔ atuã.

2 Yawɛ tsɔ Babilonia, Siria, Moab, kɛ Amon ta buli kɛ ho Yehoyakim ngɔ ya, konɛ a ya kpata Yuda zugba a hɛ mi kaa bɔ nɛ Yawɛ gu e tsɔli gbali ɔmɛ a nɔ de to ke e maa pee ɔ.

3 Yawɛ lɛ ha nɔ́ nɛ ɔ ba mi, bɔ nɛ pee nɛ e je Yuda ma a we ngɛ yayamihi nɛ Manase pee ɔ a he,

4 titli ɔ, kaa e pue nihi babauu nɛ pee we nɔ́ yayami ko a muɔ si ngɛ Yerusalem. Yawɛ kɛ nɔ́ nɛ Manase pee nɛ ɔ pɛ́ lɛ.

5 Yehoyakim he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

6 Yehoyakim ba gbo, nɛ e binyumu Yehoyakin ba ye matsɛ ngɛ e se.

7 Jehanɛ Egipt matsɛ ɔ pa nyɛ we nɛ e hia ta kɛ je Egipt hu, ejakaa Babilonia matsɛ ɔ kpɔ zugba amɛ tsuo ngɛ e dɛ, kɛ je Egipt Taku ɔ nya hluu kɛ ya si Yufrate pa a nya.

Yuda matsɛ, Yehoyakin

(<x>140 36:9-10</x>)

8 Yehoyakin ye jeha nyɔngma kɛ kpaanyɔ benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ nyɔhiɔ etɛ. E nyɛ biɛ ji Nehushta. Elnatan nɛ je Yerusalem ɔ biyo ji lɛ.

9 Yehoyakin ya wo e tsɛ nane, nɛ e pee yayami kɛ si Yawɛ.

10 E yi nɔ ɔ, Babilonia matsɛ, Nebukadnezar tsɔli ɔmɛ hia ta kɛ ya Yerusalem nɛ a ya sa ma a yi.

11 Benɛ a sa ma a yi ɔ, Nebukadnezar nitsɛ ya Yerusalem,

12 ⓕ nɛ Yuda matsɛ, Yehoyakin nyɛ ngɔ lɛ nitsɛ e he, e tsɔli ɔmɛ, e ma nimeli ɔmɛ, kɛ matsɛ we ɔ ní tsuli ɔmɛ ngɔ ha Babilonia matsɛ ɔ. Nebukadnezar yi nɔ jeha nɛ ji kpaanyɔ ɔ mi ɔ, e nu Yehoyakin nyɔguɛ,

13 nɛ e muɔ junehi tsuo nɛ ngɛ Yawɛ we ɔ, kɛ matsɛ we ɔ kɛ ho Babilon ya. Nɛ kaa bɔ nɛ Yawɛ de to momo ɔ, sika tsu kãhi nɛ Israel matsɛ, Salomo pee nɛ a kɛ tsu ní ngɛ Yawɛ we ɔ, Nebukadnezar ywia mɛ dukuduku.

14 Nebukadnezar ngɔ Yerusalem ma mi bi ɔmɛ, ganɔ ɔmɛ, kɛ katsɛmɛ ɔmɛ tsuo nyɔguɛ kɛ je; mɛ tsuo pɛpɛɛpɛ a yibɔ ji akpe nyɔngma. E nuu ga ní tsuli, kɛ sɔli tsuo kɛ je; nimli gu ɔmɛ nɛ be nɔ́ ko mi ɔ pɛ ji ni nɛmɛ nɛ piɛ ngɛ Yuda.

15 ⓖ Nebukadnezar ngɔ Yehoyakin, kɛ e nyɛ, e yi ɔmɛ, e tsɔli ɔmɛ, kɛ Yuda ma nimeli ɔmɛ nyɔguɛ kɛ ho Babilon ya.

16 Jehanɛ, Babilonia matsɛ ɔ ngɔ ta buli kpakpahi akpe kpaago, kɛ ga ní tsuli, kɛ sɔli hu akpe kɛ ho. Katsɛmɛ kɛ nihi nɛ su ta yami nya ji nimli nɛ ɔmɛ tsuo kulaa.

17 ⓗ Nebukadnezar wo Yehoyakin tsɛko Matania matsɛ ngɛ Yehoyakin nane mi; nɛ e tsake e biɛ ngɔ pee Zedekia.

Yuda matsɛ, Zedekia

(<x>140 36:11-12</x>; <x>300 52:1-3</x>)

18 ⓘ Zedekia ye jeha nyingmi enyɔ kɛ kake benɛ e ba bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kake. E nyɛ biɛ ji Hamutal. Yeremia nɛ je Libna a biyo ji lɛ.

19 Matsɛ Zedekia pee yayami kɛ si Yawɛ kaa bɔ nɛ Yehoyakin pee ɔ pɛpɛɛpɛ.

20 ⓙ Yawɛ mi mi fu Yuda ma a, kɛ nihi nɛ ngɛ Yerusalem ɔ wawɛɛ nitsɛ kɛ ya si e je e hɛ ngɛ a nɔ.