Matsɛmɛ II, 16

Yuda matsɛ, Ahaz

(<x>140 28:1-27</x>)

1 Israel matsɛ Peka, Remalia binyumu ɔ yi nɔ jeha nɛ ji nyɔngma kɛ kpaago ɔ mi ɔ, Yuda matsɛ, Yotam binyumu Ahaz ba bɔni tsɛ yemi ngɛ Yuda ma a nɔ.

2 Jamɛ a be ɔ, e ye jeha nyingmi enyɔ, nɛ e hi Yerusalem kɛ ye matsɛ jeha nyɔngma kɛ ekpa. E pee we Yawɛ, e Mawu ɔ suɔmi nya ní kaa bɔ nɛ e nɛ̃ David pee ɔ;

3 ⓑ se mohu e ya wo Israel matsɛmɛ ɔmɛ a nane. E ngɔ lɛ nitsɛ e binyumu po kɛ sã sami bɔ kaa bɔ nɛ je ma amɛ nɛ Yawɛ fie kɛ je Israel bi ɔmɛ a blɔ ɔ nɔ ɔ a kusumi yayami ɔmɛ ngɛ ɔ.

4 Ahaz sã bɔ, kɛ tsopa kɛ e he via ngɛ jami he ɔmɛ, ngɛ yoku ɔmɛ a nɔ, kɛ tsohi nɛ bɔ kusuu ɔ a sisi.

5 ⓒ Jamɛ a be ɔ mi ɔ, Siria matsɛ, Rezin, kɛ Israel matsɛ, Peka, Remalia binyumu ɔ ya tua Yerusalem, nɛ a sa Ahaz yi kɛ wo ma a mi; se a nyɛ we lɛ.

6 Jamɛ a be ɔ mi nɔuu ɔ, Edom[4] matsɛ ɔ ya kpɔ Elat kɛ ha Edom, nɛ e fie Yuda bi ɔmɛ kɛ je Elat ma a mi. Edom bi ɔmɛ ba dumɔ Elat, nɛ a ngɛ lejɛ ɔ kɛ ba si mwɔnɛ ɔ.

7 Ahaz tsɔ ya de Asiria matsɛ, Tiglat Pileser ke, “O tsɔlɔ kɛ o binyumu ji mi. Siria matsɛ, kɛ Israel matsɛ ba tua mi, lɔ ɔ he ɔ, ba nɛ o ba je ngmlaa ha mi.”

8 Ahaz ya ngɔ sika hiɔ, kɛ sika tsu ngɛ Yawɛ we ɔ, kɛ matsɛ we nito he ɔmɛ; nɛ e tsɔ nɛ a kɛ ya ke Asiria matsɛ ɔ.

9 Asiria matsɛ ɔ bu lɛ tue, nɛ e hia kɛ ya tua Damasko. E ngɔ ma a, nɛ e gbe Matsɛ Rezin; se ma a mi bi ɔmɛ lɛɛ e nuu mɛ nyɔguɛ kɛ ho Kir ya.

10 Benɛ Matsɛ Ahaz, kɛ Asiria matsɛ, Tiglat Pileser ya kpe ngɛ Damasko ɔ, e na bɔ sami la tɛ ɔ ngɛ lejɛ ɔ. Matsɛ Ahaz ngɔ bɔ sami la tɛ ɔ henɔ pɛpɛɛpɛ kɛ mane osɔfo Uria.

11 Nɛ loko Matsɛ Ahaz je Damasko kɛ ba a, osɔfo Uria puɛ bɔ sami la tɛ nɛ henɔ ngɛ kaa nɔ́ nɛ Matsɛ Ahaz ngɔ kɛ mane lɛ kɛ je Damasko ɔ pɛpɛɛpɛ.

12 Benɛ Matsɛ Ahaz je Damasko kɛ ba a, e na kaa a puɛ bɔ sami la tɛ ɔ ta.

13 E sã sami bɔ, kɛ niye ní bɔ ngɛ nɔ. E sã wai bɔ, nɛ lohwe ɔ nɛ e kɛ sã tue mi jɔmi bɔ ɔ, e fĩa e muɔ kɛ pue bɔ sami la tɛ ɔ nɔ.

14 ⓓ Lɔ ɔ se ɔ, e je akɔblee bɔ sami la tɛ momo ɔ nɛ maa Yawɛ hɛ mi ɔ kɛ je e ma he ɔ ngɛ Yawɛ we ɔ, kɛ e bɔ sami la tɛ he ɔ a kpɛti ɔ, nɛ e kɛ ya ma e bɔ sami la tɛ he ɔ we omleyi je.

15 Kɛkɛ nɛ Matsɛ Ahaz fa osɔfo Uria ke, “Moo sã mɔtu sami bɔ, gbɔkuɛ niye ní bɔ, matsɛ sami bɔ, e niye ní bɔ, kɛ zugba a nɔ bimɛ tsuo a sami bɔ ɔmɛ, kɛ a niye ní bɔ ɔmɛ ngɛ bɔ sami la tɛ ngua nɛ ɔ nɔ. Moo sã wai bɔ ngɛ lejɛ ɔ, nɛ o ngɔ lohwehi nɛ a kɛ ba sã sami bɔ, kɛ bɔ kpa amɛ a muɔ kɛ fĩa nɔ. Se akɔblee bɔ sami la tɛ ɔ lɛɛ mo si ha mi nɛ ma bi ní ngɛ lejɛ ɔ.”

16 Osɔfo Uria pee kaa bɔ nɛ Matsɛ Ahaz fa lɛ ke e pee ɔ pɛpɛɛpɛ.

17 ⓔ Matsɛ Ahaz pee sisi daka amɛ a nɔ dami ní ɔmɛ, nɛ e je tsesi ɔmɛ ngɛ a nɔ. Jehanɛ, e je akɔblee nyu nɔ́ ngua a kɛ je akɔblee na ku ɔmɛ a se mi kɛ ma tɛ nɔ ngɛ zugba.

18 Ahaz je nɔ́ ɔ nɛ a kɛ matsɛ sɛ ɔ maa nɔ ɔ ngɛ Yawɛ we ɔ hulɔ. E pee nɔ́ nɛ ɔ nɛ e kɛ sa Asiria matsɛ ɔ hɛ mi.

19 Ahaz he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

20 ⓕ Ahaz ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Hezekia ba ye matsɛ ngɛ e se.