Matsɛmɛ II, 15

Yuda matsɛ, Uzia

(<x>140 26:1-23</x>)

1 Israel matsɛ, Yeroboam yi nɔ jeha nɛ ji nyingmi enyɔ kɛ kpaago ɔ mi ɔ, Yuda matsɛ, Uzia, Amazia binyumu ɔ bɔni tsɛ yemi ngɛ Yuda ma a nɔ.

2 Jamɛ a be ɔ, e ye jeha nyɔngma kɛ ekpa, nɛ e hi Yerusalem kɛ ye matsɛ jeha nyingmi enuɔ kɛ enyɔ. E nyɛ biɛ ji Yekolia, nɛ e je Yerusalem.

3 E pee Yawɛ suɔmi nya ní kaa bɔ nɛ e tsɛ Amazia pee ɔ pɛpɛɛpɛ.

4 Se mohu wɔ jami he ɔmɛ lɛɛ e puɛ we mɛ; lɔ ɔ he ɔ, ma a sã bɔ, kɛ tsopa kɛ e he via ngɛ lejɛ ɔmɛ kɛ mwɔɔ.

5 Yawɛ ha nɛ matsɛ ɔ nu he womi nɔ hiɔ yaya; nɛ hiɔ nɛ ɔ ngɛ e he kɛ ya si e gbenɔ ligbi. Enɛ ɔ he je ɔ, e klɛ̃ kɛ ya hi we kpa mi, nɛ e binyumu Yotam ba hi matsɛ we ɔ, nɛ e kɛ hyɛ ma a nɔ.

6 Uzia he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

7 ⓩ Uzia ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Yotam ba ye matsɛ ngɛ e se.

Israel matsɛ, Zakaria

8 Yuda matsɛ, Uzia yi nɔ, jeha nɛ ji nyingmi etɛ kɛ kpaanyɔ ɔ mi ɔ, Yeroboam binyumu Zakaria ba ye tsɛ ngɛ Israel ma a nɔ. E hi Samaria kɛ ye matsɛ nyɔhiɔ ekpa.

9 E pee yayami kɛ si Yawɛ kaa bɔ nɛ matsɛmɛ ɔmɛ nɛ nyɛɛ e hɛ mi ɔ pee ɔ pɛpɛɛpɛ. Yayamihi nɛ Nebat binyumu Yeroboam ha nɛ Israel pee ɔ, e ngmɛɛ we he.

10 Yabesh binyumu Shalum so Matsɛ Zakaria yi nɔ, nɛ e fia lɛ nɔ́ nɛ e gbe ngɛ Ibleam; nɛ e ye matsɛ ngɛ e se.

11 Ní kpahi tsuo nɛ Zakaria pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

12 ⓐ Lɔ ɔ he ɔ, si nɛ Yawɛ wo Matsɛ Yehu ɔ ba mi. Yawɛ de lɛ ke, “O bimɛ maa ye matsɛ ngɛ Israel kɛ yaa si yi nɔ nɛ ji eywiɛ ɔ.”

Israel matsɛ, Shalum

13 Yuda matsɛ, Uzia yi nɔ jeha nɛ ji nyingmi etɛ kɛ nɛɛ ɔ mi ɔ, Yabesh binyumu Shalum ba ye tsɛ ngɛ Israel ma a nɔ. E hi Samaria kɛ ye matsɛ nyɔhiɔ kake.

14 Menahem, Gadi binyumu ɔ je Tirza kɛ ya Samaria nɛ e ya fia Yabesh binyumu Shalum nɔ́ nɛ e gbe ngɛ lejɛ ɔ; nɛ e ye matsɛ ngɛ e se.

15 Ní kpahi tsuo nɛ Shalum pee, kɛ bɔ nɛ e so Zakaria yi nɔ ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

16 Benɛ Menahem je Tirza kɛ yaa a, e kpata Tapua ma a, ma mi bi ɔmɛ, kɛ zugbahi nɛ bɔle Tapua ma a a hɛ mi. Yihɔyihi nɛ ngɛ ma a mi po, e ta bimɛ ɔmɛ ngɛ mɛ tsuo pɛpɛɛpɛ a mi mi. Menahem pee nɔ́ nɛ ɔ, ejakaa ma a he we lɛ atuu.

Israel matsɛ, Menahem

17 Yuda matsɛ, Uzia yi nɔ jeha nɛ ji nyingmi etɛ kɛ nɛɛ ɔ mi ɔ, Gadi binyumu Menahem bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyɔngma.

18 E pee yayami kɛ si Yawɛ. E wami be ɔ tsuo ɔ, yayamihi nɛ Nebat binyumu Yeroboam ha nɛ Israel pee ɔ, e ngmɛɛ we a he.

19 Asiria matsɛ, Tiglat Pileser ba tua Israel; nɛ Menahem ha lɛ sika hiɔ kilo akpe nyingmi etɛ kɛ eywiɛ, bɔ nɛ pee nɛ Tiglat Pileser nɛ e piɛ e he, nɛ e matsɛ yemi ɔ nɛ da si.

20 Menahem he sika nɛ ɔ kɛ je Israel niatsɛmɛ ɔmɛ a dɛ; e tsu niatsɛ tsuaa niatsɛ sika hiɔ yi nyingmi enuɔ. Kɛkɛ nɛ Asiria matsɛ ɔ kpale kɛ ho e ma mi ya.

21 Menahem he sane kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

22 Menahem ba gbo, nɛ a pu lɛ, nɛ e binyumu Pekahia ba ye matsɛ ngɛ e se.

Israel matsɛ, Pekahia

23 Yuda matsɛ, Uzia yi nɔ jeha nɛ ji nyingmi enuɔ ɔ mi ɔ, Menahem binyumu Pekahia ba bɔni tsɛ yemi ngɛ Israel ma a nɔ. E hi Samaria kɛ ye matsɛ jeha enyɔ.

24 E pee yayami kɛ si Yawɛ. Yayamihi nɛ Nebat binyumu Yeroboam ha nɛ Israel pee ɔ, e ngmɛɛ we he.

25 Pekahia we asafoatsɛ Peka, Remalia binyumu ɔ, kɛ Gilead bi nyingmi enuɔ so Pekahia yi nɔ, nɛ a gbe lɛ ngɛ matsɛ we ɔ mɔ ɔ mi ngɛ Samaria; nɛ Peka ye matsɛ ngɛ e se.

26 Pekahia he sane kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

Israel matsɛ, Peka

27 Yuda matsɛ, Uzia yi nɔ jeha nɛ ji nyingmi enuɔ kɛ enyɔ ɔ mi ɔ, Remalia binyumu Peka bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nyingmi enyɔ.

28 E pee yayami kɛ si Yawɛ. Yayamihi tsuo nɛ Yeroboam, Nebat binyumu ɔ ha nɛ Israel pee ɔ, e ngmɛɛ we he.

29 Israel matsɛ, Peka yi nɔ ɔ, Asiria matsɛ, Tiglat Pileser ba ngɔ Iyon, Abel Bet Maaka, Yanoa, Kedesh, Hazor, Gilead, kɛ Galilea-Naftali zugba a tsuo; nɛ e ngɔ nimli nɛ ɔmɛ nyɔguɛ kɛ ho Asiria ya.

30 Yuda matsɛ, Yotam, Uzia binyumu ɔ yi nɔ jeha nɛ ji nyingmi enyɔ ɔ mi ɔ, Ela binyumu Hoshea so Matsɛ Peka yi nɔ nɛ e fia lɛ nɔ́ nɛ e gbe; nɛ e ye matsɛ ngɛ e se.

31 Peka he sanehi kpahi, kɛ níhi tsuo nɛ e pee ɔ, a ngma ngɛ Israel Matsɛmɛ ɔmɛ a Yi nɔ Sanehi Womi ɔ mi.

Yuda matsɛ, Yotam

(<x>140 27:1-9</x>)

32 Israel matsɛ, Peka, Remalia binyumu ɔ yi nɔ jeha enyɔne ɔ mi ɔ, Uzia binyumu Yotam ba bɔni tsɛ yemi ngɛ Yuda ma a nɔ.

33 Jamɛ a be ɔ, e ye jeha nyingmi enyɔ kɛ enuɔ, nɛ e hi Yerusalem kɛ ye matsɛ jeha nyɔngma kɛ ekpa. E nyɛ ji Zadok biyo Yerusha.

34 E ya wo e tsɛ nane, nɛ e pee Yawɛ suɔmi nya ní.

35 Se jami he ɔmɛ lɛɛ e puɛ we mɛ; lɔ ɔ he ɔ, ma a ya nɔ sã bɔ, kɛ tsopa kɛ e he via ngɛ lejɛ ɔmɛ kɛ mwɔɔ. Yotam ji nɔ nɛ ma Yawɛ we ɔ omleyi je agbo ɔ nɛ.

36 Yotam he sane kpahi, kɛ níhi tsuo nɛ e pee ɔ, a ngma ngɛ Yuda Matsɛmɛ ɔmɛ a Yi nɔ Sanehi Womi ɔ mi.

37 Benɛ Yotam ngɛ matsɛ yee ɔ ji be nɛ Yawɛ bɔni Siria matsɛ, Rezin, kɛ Israel matsɛ, Peka tsɔmi ke a ya tua Yuda.

38 Yotam ba gbo, nɛ a pu lɛ ngɛ Yuda matsɛmɛ ɔmɛ a yɔkɔ ɔ mi ngɛ David ma a mi; nɛ e binyumu Ahaz ba ye matsɛ ngɛ e se.