Matsɛmɛ II, 17

Israel matsɛ, Hoshea

1 Yuda matsɛ, Ahaz yi nɔ jeha nɛ ji nyɔngma kɛ enyɔ ɔ, Ela binyumu Hoshea ba bɔni tsɛ yemi ngɛ Israel ma a nɔ. E hi Samaria kɛ ye matsɛ jeha nɛɛ.

2 E pee yayami kɛ si Yawɛ, se e yayami ɔ sui Israel matsɛmɛ ɔmɛ nɛ nyɛɛ e hɛ mi ɔ a nɔ́ ɔ.

3 E ba mi kaa Asiria matsɛ, Shalmaneser ba tua lɛ, nɛ Hoshea ba pee e sɔmɔlɔ, nɛ e tsuɔ tó kɛ haa lɛ.

4 Jeha ko mi ɔ, Hoshea tsu we tó kɛ ha Asiria matsɛ ɔ kaa bɔ nɛ e peeɔ daa jeha a; mohu ɔ, e tsɔ ya bi yemi kɛ buami ngɛ Egipt matsɛ, So ngɔ. Asiria matsɛ ɔ ngɔ nɔ́ nɛ ɔ kaa atuã tsɔmi, nɛ e nu Hoshea ngɔ wo tsu.

A ye Samaria nɔ kunimi

5 Enɛ ɔ se ɔ, Asiria matsɛ ɔ ya tua Israel zugba a tsuo; nɛ benɛ e su Samaria a, e sa ma a yi jeha etɛ.

6 Hoshea yi nɔ jeha nɛ ji nɛɛ ɔ mi ɔ, Asiria matsɛ ɔ ngɔ Samaria, nɛ e muɔ Israel bi ɔmɛ kɛ ho Asiria ya. E ngɔ ni komɛ ya to Hala, e ngɔ ni komɛ ya to Habor pa a nya ngɛ Gozan zugba a nɔ, nɛ e ngɔ ni komɛ hu ya to Media bi ɔmɛ a ma amɛ a mi.

7 Nɔ́ nɛ kɛ nɔ́ nɛ ɔ ba ji, Israel ma a pee yayami kɛ si Yawɛ, a Mawu ɔ, nɔ nɛ kpɔ mɛ ngɛ Egipt matsɛ ɔ dɛ, nɛ e je mɛ kɛ je Egipt zugba a nɔ ɔ. A ya ja mawu kpahi.

8 Jehanɛ, je ma amɛ nɛ Yawɛ fie kɛ je a blɔ ɔ nɔ ɔ, Israel bi ɔmɛ bɔni a kusumi níhi peemi; slo ma se kusumi kpahi nɛ Israel matsɛmɛ ɔmɛ ngɔ kɛ ba a hulɔ.

9 Israel bi ɔmɛ pee níhi nɛ dɛ blɔ ngɛ laami mi kɛ si Yawɛ, a Mawu ɔ. A ma jami hehi ngɔ ha a he ngɛ kɔpekɔpe ɔmɛ, kɛ ma ngua amɛ tsuo a mi.

10 ⓖ A puɛ amagahi kɛ ha yo mawu Ashera a ngɛ yokuhi tsuo a nɔ, kɛ tsohi nɛ bɔ kusuu tsuo a sisi;

11 nɛ a sã tsopa kɛ e he via ngɛ jami he ɔmɛ tsuo, kaa bɔ nɛ je ma amɛ nɛ Yawɛ fie kɛ je a blɔ ɔ nɔ ɔ pee ɔ pɛpɛɛpɛ. A pee ní yayamihi kɛ wo Yawɛ mi mi la.

12 A ja amagahi nɛ Yawɛ wo mɛ mlaa ke a ko ja mɛ ɔ.

13 Yawɛ gu gbali, kɛ ní nali a nɔ nɛ e kɛ slɔ Israel kɛ Yuda ke, “Nyɛɛ kpale kɛ je nyɛ blɔ yayami ɔmɛ a nɔ. Nyɛɛ ye ye mlaa amɛ nɛ i wo nyɛ nɛmɛ ɔmɛ, kɛ blɔ nya tomi ɔmɛ a nɔ. I ngɔ ní nɛ ɔmɛ ngɔ ha nyɛ kɛ gu ye tsɔli gbali ɔmɛ a nɔ.”

14 Se a bui tete; a kuɛ wa kaa a nɛmɛ ɔmɛ nɛ he we Yawɛ, a Mawu ɔ yi ɔ pɛpɛɛpɛ.

15 A kua e blɔ nya tomi ɔmɛ, kɛ somi nɛ e kɛ a nɛmɛ ɔmɛ so ɔ, kɛ slɔmihi nɛ e slɔ mɛ ɔ. A ya nyɛɛ yakayaka amagahi a se, nɛ mɛ nitsɛmɛ a plɛ pee yakayaka nimli. Je ma amɛ nɛ bɔle mɛ kɛ kpe, nɛ Yawɛ wo mɛ mlaa ngɛ a he ke a ko pee a níhi kaa mɛ ɔ, a ya nyɛɛ jamɛatsɛmɛ ɔmɛ mohu a se.

16 ⓗ Mlaahi nɛ Yawɛ, a Mawu ɔ wo mɛ ɔ, a yi ekoeko nɔ; se mohu a ngɔ dade nɛ a sle kɛ pee na bi enyɔ kɛ ha a he. A pee Ashera, nɛ a ja hiɔwe níhi tsuo; a ja Baal hulɔ.

17 ⓘ A ngɔ a binyumuhi, kɛ a biyihi kɛ sã sami bɔhi, kɛ ha wɔhi. A kla, a ye kunya, nɛ a je blɔ pee yayami nɛ a kɛ wo Yawɛ mi mi la.

18 Enɛ ɔ he je ɔ, Yawɛ mi mi fu Israel wawɛɛ nitsɛ, nɛ e je e hɛ ngɛ mɛ tsuo pɛpɛɛpɛ a nɔ, ja Yuda wɛtso ɔ pɛ.

19 Yuda wɛtso ɔ nitsɛ po yi Yawɛ, a Mawu ɔ mlaa amɛ a nɔ. Ma se kusumihi nɛ Israel kɛ ba a, lɔ ɔmɛ a he ní mɛ hu a tsuɔ.

20 Yawɛ kua Israel nina amɛ tsuo. E ha nɛ a na amanehlu, nɛ e ngɔ mɛ kɛ wo ní hali a dɛ mi kɛ ya si e je e hɛ ngɛ a nɔ kulaa.

21 Benɛ Yawɛ tsɔ́ Israel kɛ je David we ɔ he ɔ, Israel bi ɔmɛ wo Nebat binyumu Yeroboam matsɛ. Yeroboam ha nɛ Israel kpa Yawɛ se nyɛɛmi, nɛ e ngɔ mɛ ya wo yayami agbo mi.

22 Israel bi ɔmɛ ya nyɛɛ Yeroboam se, nɛ a pee yayami tsuo nɛ e pee ɔ hluu

23 kɛ ya si Yawɛ je e hɛ ngɛ a he kaa bɔ nɛ e de to kɛ gu e tsɔli gbali ɔmɛ a nɔ ɔ. Lɔ ɔ he ɔ, a ngɔ Israel bi ɔmɛ nyɔguɛ kɛ je mɛ nitsɛmɛ a zugba a nɔ kɛ ho Asiria ya; nɛ a ngɛ lejɛ ɔ kɛ ba si mwɔnɛ ɔ.

Asiria bi ɔmɛ ba hi Israel

24 Asiria matsɛ ɔ ya ngɔ nihi kɛ je Babilon, Kut, Ava, Hamat, kɛ Sefarvaim kɛ ba wo Samaria ma amɛ a mi ngɛ Israel bi ɔmɛ a nane mi. Mɛ hu a ngɔ Samaria ngɔ pee a nɔ, nɛ a hi ma amɛ a mi.

25 Benɛ a ba lejɛ ɔ kekleekle ɔ, a ja we Yawɛ, lɔ ɔ he ɔ, Yawɛ ha nɛ jatahi ba sɛ a kpɛti, nɛ jata amɛ gbe a ti ni komɛ.

26 A ya bɔ Asiria matsɛ ɔ amaniɛ ke, “Je ma amɛ nɛ o ya ngɔ kɛ ba wo Samaria ma amɛ a mi ɔ, a li zugba a nɔ mawu ɔ kɔhi. Enɛ ɔ he je ɔ, zugba a nɔ mawu ɔ hu ha nɛ jatahi ba sɛ ni ɔmɛ a kpɛti nɛ a ngɛ mɛ gbee.”

27 Asiria matsɛ ɔ fa ke, “Osɔfo ɔmɛ nɛ nyɛ ya nuu kɛ je lejɛ ɔ kɛ ba a, nyɛ ha nɛ a ti nɔ kake nɛ e kpale kɛ ho, nɛ e ya tsɔɔ ni ɔmɛ zugba a nɔ mawu ɔ kɔhi.”

28 Kɛkɛ nɛ a wo Israel osɔfo kake blɔ kɛ je Samaria kɛ ho Betel ya, nɛ e ya tsɔɔ ni ɔmɛ bɔ nɛ a ma ja Yawɛ ha.

29 Se kɛ̃ ɔ, je ma tsuaa je ma pee mawu ha a he, nɛ a ngɔ ya to jami hehi nɛ Samaria bi ɔmɛ to ngɛ ma amɛ a mi he nɛ a ngɛ ɔ. Je ma amɛ tsuo to a we amaga amɛ ngɛ ma amɛ a mi he nɛ a ngɛ ɔ.

30 Babilon bi ɔmɛ puɛ amaga kɛ ha mawu ɔ nɛ a tsɛɛ lɛ Sukot Benot ɔ; Kut bi ɔmɛ puɛ amaga kɛ ha Nergal; Hamat bi ɔmɛ puɛ amaga kɛ ha Ashima;

31 Ava bi ɔmɛ puɛ amaga kɛ ha Nibhaz, kɛ Tartak. Sefarvaim bi ɔmɛ lɛɛ a ngɔ a bimɛ kɛ sã sami bɔ kɛ ha mawu ɔmɛ nɛ a tsɛɛ mɛ Adramelek kɛ Anamelek ɔ.

32 Nimli nɛ ɔmɛ jaa Yawɛ hulɔ. Enɛ ɔ he je ɔ, a hla ni komɛ kɛ je a kpɛti, nɛ a wo mɛ osɔfohi, konɛ a sã bɔ kɛ ha Yawɛ ha mɛ ngɛ piɛ ɔmɛ a mi ngɛ yoku ɔmɛ a nɔ.

33 Lɔ ɔ he ɔ, a sɔmɔɔ Yawɛ, nɛ a jaa mɛ nitsɛmɛ a mawu ɔmɛ hulɔ, kaa bɔ nɛ a peeɔ ngɛ hehi nɛ a je kɛ ba a.

34 ⓙ A hɛɛ a blema kusumi nɛ ɔmɛ a mi kɛ ba si mwɔnɛ ɔ. A ja we Yawɛ, nɛ mlaa slɔɔtohi nɛ e wo Yakob nɛ e tsake e biɛ kɛ pee Israel ɔ nina a hu, a yi nɔ.

35 ⓚ Yawɛ kɛ mɛ so, nɛ e de mɛ ke, “Nyɛ ko ja mawu kpahi, nyɛ ko sɔmɔ mɛ, nɛ nyɛ ko sã bɔ ha mɛ!

36 ⓛ Nyɛɛ ye imi Yawɛ mohu gbeye; ejakaa imi nɛ i kɛ he wami kɛ kɔni si wami je nyɛ kɛ je Egipt zugba a nɔ. Nyɛ ja mi, nɛ nyɛɛ sã bɔ kɛ ha mi.

37 Mlaa slɔɔtohi nɛ i ngma ha nyɛ ɔ, nyɛɛ ye a nɔ daa. Nyɛ ko ja mawu kpahi;

38 somi nɛ i kɛ nyɛ so ɔ hu nyɛ hɛ ko je nɔ.

39 Nyɛɛ ye imi Yawɛ, nyɛ Mawu ɔ gbeye; nɛ ma je nyɛ kɛ je nyɛ he nyɛli ɔmɛ tsuo a dɛ mi.”

40 Se ni ɔmɛ bui Mawu tue, nɛ a ya nɔ kɛ a blema kusumi ní ɔmɛ a peemi.

41 Lɔ ɔ he ɔ, je ma nɛ ɔmɛ sɔmɔɔ Yawɛ, nɛ a jaa mɛ nitsɛmɛ a we amaga amɛ hulɔ. Nɛ bɔ nɛ tsɛmɛ ɔmɛ pee blema a, ja nɔuu nɛ bimɛ ɔmɛ, kɛ bibimɛ ɔmɛ ngɛ pee kɛ ba si mwɔnɛ ɔ.