Matsɛmɛ I, 9

Mawu je e he kpo kɛ tsɔɔ Salomo ekohu

(<x>140 7:11-22</x>)

1 Benɛ Salomo gbe Yawɛ we ɔ, kɛ matsɛ we ɔ, kɛ kɛ we kpahi nɛ e suɔ kaa e maa ma a tsuo a nya a,

2 ⓚ Yawɛ je e he kpo ngɔ tsɔɔ lɛ ekohu kaa bɔ nɛ e pee ngɛ Gibeon ɔ.

3 Yawɛ de lɛ ke, “I nu o kue fami ɔ. I pee we nɛ o po nɛ a ja mi ngɛ mi nɛ ɔ klɔuklɔu kɛ yaa neneene. Ma hyɛ we ɔ nɔ, nɛ ma bu he daa.

4 Ke o ma sɔmɔ mi kɛ o tsui tsuo, nɛ o maa ye mi anɔkuale kaa bɔ nɛ o tsɛ David pee ɔ; nɛ o maa ye ye mlaa amɛ a nɔ, nɛ o maa pee nɔ́ tsuaa nɔ́ nɛ i fa mo ke o pee ɔ;

5 ⓛ lɛɛ si ko nɛ i wo o tsɛ David ɔ, ma ye nɔ. Imi lɛ i de lɛ ke ma ha e nina maa ye tsɛ ngɛ Israel kɛ maa ya neneene ɔ nɛ.

6 Se ke mo, loo o nina jɔɔ ye se nyɛɛmi, ke nyɛ yi mlaa amɛ nɛ i wo nyɛ ɔ, kɛ blɔ nya tomi ɔmɛ a nɔ, nɛ nyɛ ya sɔmɔ mawu kpahi nɛ nyɛ ja mɛ ɔ,

7 lɛɛ ma je ye ma, Israel kɛ je zugba a nɛ i ha mɛ ɔ nɔ. We nɛ ɔ hu nɛ i pee klɔuklɔu nɛ a ja mi ngɛ mi ɔ, ma je ye nine ngɛ he. Je ma amɛ tsuo pɛpɛɛpɛ maa wo Israel la, nɛ a maa ye e he fɛu.

8 ⓜ We nɛ ɔ maa pee we doku, nɛ nɔ tsuaa nɔ nɛ bee ɔ he mi ma jɔ̃, nɛ e nya maa kpɛ e he; nɛ e ma bi ke, ‘Mɛni he je nɛ Yawɛ pee zugba nɛ ɔ, kɛ we nɛ ɔ kikɛ nɛ ɔ?’

9 Nɛ nihi ma he nɔ ke, ‘Ejakaa a kua Yawɛ, a Mawu ɔ nɛ je mɛ kɛ je Egipt zugba a nɔ ɔ. A kɛ a he ya mɛtɛ mawu kpahi a he; a ja mɛ, nɛ a sɔmɔ mɛ. Enɛ ɔ he je nɛ Yawɛ kɛ haomi nɛ ɔ ba a nɔ ɔ nɛ.’ ”

Salomo kɛ Hiram so

(<x>140 8:1-2</x>)

10 Salomo kɛ jeha nyingmi enyɔ ma Yawɛ we ɔ, kɛ matsɛ we ɔ.

11 Tiro matsɛ, Hiram ji nɔ nɛ ha Salomo seda, sɛsɛo, kɛ sika tsu tsuo nɛ hia lɛ kɛ ha ní tsumi ɔ. Benɛ a gbe ní tsumi ɔ nya a, Matsɛ Salomo ha Hiram ma nyingmi enyɔ ngɛ Galilea zugba a nɔ.

12 Se benɛ Hiram je Tiro kɛ ba hyɛ ma amɛ nɛ Salomo ha lɛ ɔ, e sume.

13 Lɔ ɔ he ɔ, e bi Salomo ke, “Ye nyɛmi, mahi nɛ o ha mi ji nɛ ɔmɛ lo?” Enɛ ɔ he je ɔ, biɛ nɛ a kɛ tsɛɔ ma amɛ kɛ ba si mwɔnɛ ɔ ji Kabul.[1]

14 Blɔɔ Hiram ngɔ sika tsu kilo akpe eywiɛ ngɔ mane Salomo momo.

Salomo ní tsumi kpa komɛ

(<x>140 8:3-18</x>)

15 Matsɛ Salomo nyɛ nihi a nɔ kɛ tsu ma ní tsumi kpakpataa, nɛ e kɛ ma Yawɛ we ɔ, matsɛ we ɔ, Milo mɔ ɔ, Yerusalem gbogbo ɔ, Hazor, Megido, kɛ Gezer ma amɛ.

16 (Be ko ɔ, Egipt matsɛ ɔ ya tua Gezer, nɛ e ngɔ ma a. E gbe Kanaan bi ɔmɛ nɛ a ngɛ lejɛ ɔ, nɛ e sã ma a. Pee se ɔ, e kɛ ma nɛ ɔ ke e biyo kaa blɔ womi ní benɛ e ya gba Matsɛ Salomo ɔ,

17 nɛ Salomo dla po ma a ehe.) Jehanɛ, Salomo po ma nɛ ɔmɛ hulɔ: Bet Horon nɛ ngɛ sisi je ɔ,

18 Baalat, Tamar ngɛ Yuda nga a nɔ ɔ,

19 mahi nɛ a toɔ Salomo níhi ngɛ a mi ɔ, mahi he nɛmɛ nɛ e we okpɔngɔ ɔmɛ, kɛ ta zugba lɛ ɔmɛ ngɛ ɔ, kɛ hɛja jemi mahi ngɛ Yerusalem, kɛ Lebanon, kɛ e nɔ yemi he kpa amɛ tsuo.

20 Benɛ Israel bi ɔmɛ ya ngɔ Kanaan zugba a, Kanaan bi nɛ piɛ ngɛ lejɛ ɔ nɛ Israel bi ɔmɛ gbi mɛ ɔ, mɛ ji nihi nɛ Matsɛ Salomo nyɛ a nɔ kɛ tsu nyɔguɛ ní tsumi kpakpataa nɛ ɔmɛ ɔ. Mɛ ji Amor bi, Hit bi, Periz bi, Hiv bi, kɛ Yebus bi nɛ a nina ngɛ nyɔguɛ yee we kɛ ba si mwɔnɛ ligbi nɛ ɔ.

21

22 Israel bi ɔmɛ nitsɛmɛ lɛɛ Salomo ngɔɛ a ti nɔ ko nɔ ko kɛ pee we nyɔguɛ; mɛɛ a tsu ní kaa e ta buli, tsɔli, asafoatsɛmɛ, ta zugba lɛ nyatsɛmɛ, kɛ okpɔngɔ ta buli.

23 Tsɔli nikɔtɔmahi nɛ ngɛ Salomo ní tsumi ɔmɛ a nya, nɛ a hyɛɛ ní tsuli slɔɔto ɔmɛ a nɔ ɔ, a hiɛmi ji 550.

24 Benɛ Farao ɔ biyo, nɛ ji Salomo yo ɔ klɛ kɛ je David ma a mi kɛ ho lɛ nitsɛ e we nɛ Salomo po ha lɛ ɔ mi ya a, jamɛ a be ɔ nɛ Salomo ma Milo mɔ ɔ nɛ.

25 ⓝ Si etɛ ngɛ jeha mi ɔ, Salomo sãã sami bɔ, kɛ tue mi jɔmi bɔ ngɛ bɔ sami la tɛ ɔ nɛ e puɛ kɛ ha Yawɛ ɔ nɔ. E sãã tsopa kɛ e he via hulɔ kɛ haa Yawɛ. Jehanɛ, Salomo gbe Yawɛ we ɔ nya.

26 Matsɛ Salomo kpɛ lɛhi babauu hulɔ ngɛ Eziongeber nɛ ngɛ Elat kasa nya a, ngɛ Wo Tsu ɔ nya ngɛ Edom zugba a nɔ.

27 Matsɛ Hiram wo e we akua hluili komɛ nɛ a nine si wa kɛ ní tsumi blɔ kɛ ya piɛ Salomo tsɔli ɔmɛ a he.

28 A hlui lɛ kɛ ya Ofir zugba a nɔ, nɛ a ya ngɔ sika tsu kilo akpe nyɔngma kɛ eywiɛ ngɛ lejɛ ɔ kɛ ba ha Matsɛ Salomo.