Matsɛmɛ I, 8

A ngɔ somi daka a kɛ ba Yawɛ we ɔ mi

(<x>140 5:2-6:2</x>)

1 ⓨ Enɛ ɔ se ɔ, Matsɛ Salomo ya kpee Israel ma nimeli ɔmɛ, kɛ wɛtsoyi ɔmɛ tsuo kɛ ba e ngɔ ngɛ Yerusalem, konɛ a ya ngɔ Yawɛ somi daka a kɛ je Zion, nɛ ji David ma a mi kɛ ba ma Yawɛ we ɔ.

2 ⓩ Israel ma a tsuo ba bua a he nya Gbasisihimi nyami be ɔ, ngɛ nyɔhiɔ kpaagone ɔ nɛ a tsɛɛ Etanim ɔ mi.

3 Benɛ Israel ma nimeli ɔmɛ tsuo ba bua a he nya a, osɔfo ɔmɛ wo somi daka a nɔ,

4 nɛ a hɛɛ kɛ ho Yawɛ we ɔ mi ya. Levi bi ɔmɛ, kɛ osɔfo ɔmɛ hɛɛ kpe he bo tsu ɔ, kɛ ní klɔuklɔu ɔmɛ nɛ ngɛ mi ɔ hu kɛ ho Yawɛ we ɔ mi ya.

5 Jehanɛ, Matsɛ Salomo, kɛ Israel ma kpekpemi ɔ tsuo ya bua a he nya ngɛ somi daka a hɛ mi, nɛ a gbe to, kɛ na babauu nɛ a li nya kɛ sã bɔ.

6 Enɛ ɔ se ɔ, osɔfo ɔmɛ ngɔ somi daka a ya ma e blɔ he ngɛ he klɔuklɔu pe kulaa a, ngɛ kerub ɔmɛ a pɛli ɔmɛ a sisi.

7 Kerub ɔmɛ gbɛ a pɛlihi a mi kɛ ha daka a, kɛ tsohi nɛ hɛɛ daka a tsuo a he.

8 Tso ɔmɛ ka gagaa bɔ nɛ ke nɔ ko daa si ngɛ he klɔuklɔu pe kulaa a hɛ mi ɔ, e maa na a nya amɛ nɛ je kpo; se a nya ji kpo nɛ a maa na ngɛ kpo nɔ. Tso ɔmɛ ngɛ lejɛ ɔ kɛ ba si mwɔnɛ ligbi nɛ ɔ.

9 ⓐ Nɔ́ ko nɔ́ ko be somi daka a mi kaa ja tɛ tɛtlɛɛ enyɔ ɔmɛ nɛ Mose ngɔ wo mi kɛ je Sinai yo ɔ nɔ ɔ. Yawɛ kɛ Israel ma a so ngɛ lejɛ ɔ be mi nɛ a je Egipt zugba a nɔ kɛ ma a.

10 ⓑ Benɛ osɔfo ɔmɛ ngɛ kpo jee ngɛ Yawɛ we ɔ mi ɔ, bɔku ba ha lejɛ ɔ.

11 Bɔku nɛ ɔ ngɛ kpɛe kaa Yawɛ hɛ mi nyami; enɛ ɔ he je ɔ, osɔfo ɔmɛ nyɛ we nɛ a kpale kɛ ya lejɛ ɔ nɛ a ya tsu ní.

12 ⓒ Kɛkɛ nɛ Salomo sɔle ke, “Mo Yawɛ, o ngɔ pu ngɔ to hiɔwe, se kɛ̃ ɔ, o ke o maa hi bɔku kɛ diblii kpii mi.

13 Jehanɛ lɛɛ, i po we saminyayoo ko ha mo nɛ o hi lejɛ ɔ kɛ ya neneene.”

Salomo kɛ ma a tu munyu

(<x>140 6:3-11</x>)

14 Israel ma kpekpemi ɔ tsuo daa si ngɛ lejɛ ɔ kɛ mwɔɔ. Kɛkɛ nɛ Matsɛ Salomo plɛ e hɛ mi ngɔ kpee mɛ nɛ e gbaa mɛ.

15 E de ke, “A je Yawɛ, Israel Mawu ɔ yi; ejakaa si ko nɛ e wo tsaatsɛ David ɔ, e ye nɔ. Yawɛ de David ke,

16 ⓓ ‘Kɛ je be nɛ i je ye ma Israel kɛ je Egipt ɔ, i hla we ma ko ma ko kɛ ji Israel wɛtso ko mi nɛ a po we ha mi nɛ a ja mi ngɛ lejɛ ɔ. Se i hla mo David, nɛ o ye ye ma, Israel ɔ nɔ.’ ”

17 ⓔ Salomo ya nɔ nɛ e de ke, “Jinɛ tsaatsɛ David to kaa e maa po we nɛ a ja Yawɛ, Israel Mawu ɔ ngɛ mi,

18 se Yawɛ de lɛ ke, ‘O pee saminya kaa o to o yi mi kaa o maa po we ha mi,

19 ⓕ se kɛ̃ ɔ, tsa pi mo nɛ o maa po we ɔ; mo nitsɛ o bi lɛ ma ba po we ɔ ha mi.’

20 “Amlɔ nɛ ɔ, Yawɛ ye e siwo ɔ nɔ. Kaa bɔ nɛ e de to ɔ, i ba ngɛ tsɛ yee ngɛ Israel ngɛ tsaatsɛ David se, nɛ we ɔ he nɛ a ma ja Yawɛ, Israel Mawu ɔ ngɛ ɔ, i po.

21 Jehanɛ se hu, i hla he ko ngɔ to ngɛ Yawɛ we ɔ, he nɛ a kɛ somi daka a maa to. Benɛ Yawɛ jé wa nɛmɛ ɔmɛ kɛ je Egipt zugba a nɔ ɔ, somi nɛ e kɛ mɛ so ɔ ngɛ daka nɛ ɔ mi.”

Salomo fa kue ha Yawɛ

(<x>140 6:12-42</x>)

22 Jehanɛ Salomo ya da bɔ sami la tɛ ɔ hɛ mi ngɛ Israel ma kpekpemi ɔ tsuo hɛ mi; nɛ e wo e nine nɔ kɛ ya hiɔwe,

23 nɛ e sɔle ke, “Yawɛ, Israel Mawu lee, mawu ko mawu ko be hiɔwe, loo zugba nɛ ngɛ kaa mo! Somi nɛ o kɛ o ma a so ɔ, o yeɔ nɔ; nɛ ke a bu mo tue kɛ a tsui tsuo ɔ, o jeɔ o suɔmi nɛ se pui ɔ kpo ngɔ tsɔɔ mɛ.

24 Si ko nɛ o wo tsaatsɛ David ɔ, o ye nɔ; nɛ mwɔnɛ ɔ, nɔ́ tsuaa nɔ́ nɛ o de to ɔ ba mi.

25 ⓖ Lɔ ɔ he ɔ, Yawɛ, Israel Mawu, i kpa mo pɛɛ, si nɛ o wo tsaatsɛ benɛ o de lɛ ke ke e binyumu ɔmɛ maa bu mo tue kɛ pi si kaa bɔ nɛ e pee ɔ, a maa ye tsɛ ngɛ Israel kɛ maa ya neneene ɔ, ha jamɛ a siwo ɔ hu nɛ ba mi.

26 Israel Mawu lee, i kpa mo pɛɛ, níhi tsuo nɛ o de tsaatsɛ David ɔ, ha nɛ a ba mi.

27 ⓗ “Se anɛ mo Mawu, o ma nyɛ maa hi zugba a nɔ niinɛ lo? Mo nɛ hiɔwe, kɛ hiɔwe se lokoo po kpi mo ɔ, kɛ maa pee kɛɛ nɛ we nɛ i po nɛ ɔ maa kpe mo?

28 Yawɛ, ye Mawu lee, o tsɔlɔ ji mi. I kpa mo pɛɛ nɛ o bu ye kue fami ɔ tue, nɛ níhi nɛ i ngɛ mo bie mwɔnɛ nɛ ɔ, o pee ha mi.

29 ⓘ We nɛ ɔ, he nɛ o hla ngɔ to kaa a ja mo ngɛ ɔ, moo bu he nyɔ kɛ pia, konɛ ke i ba hiɛmɛ nɛ ɔ ba sɔle ɔ, o nu.

30 Ke o tsɔlɔ, aloo o ma, Israel ba hiɛmɛ nɛ ɔ ba kpa pɛɛ ɔ, o nu ngɛ o hi he ɔ ngɛ hiɔwe, nɛ o ngɔ pa wɔ.

31 “Ke a po nɔ ko nya kaa e tɔ e nyɛmi nɔ, nɛ a kɛ lɛ ba da o bɔ sami la tɛ ɔ hɛ mi ngɛ we nɛ ɔ mi ke e ka kita nɛ e kɛ tsɔɔ kaa e pee we yayami ko ɔ,

32 Yawɛ, moo bu tue ngɛ hiɔwe nɛ o kojo o tsɔli ɔmɛ. Nɔ nɛ ye fɔ ɔ, gbla e tue bɔ nɛ sa lɛ; se nɔ nɛ pee we yayami ko ɔ lɛɛ o wo lɛ nguɔ.

33 “Ke o ma, Israel a he nyɛli ba ye a nɔ ngɛ yayami ko nɛ a pee kɛ si mo he, nɛ a pia a he, nɛ a ba we nɛ ɔ mi ba kpa mo pɛɛ kɛ he si bami ɔ,

34 moo bu mɛ tue ngɛ hiɔwe. Ngɔɔ yayami nɛ o ma a pee ɔ ngɔ pa mɛ, nɛ o kpale mɛ kɛ ba zugba a nɛ o ngɔ kɛ ha a nɛmɛ ɔmɛ ɔ nɔ ekohu.

35 “Ke o tsi hiɔmi nya ngɛ yayami ko nɛ o ma, Israel pee kɛ si mo he, nɛ pee se ɔ, a tsake a tsui nɛ a ba we nɛ ɔ mi ba kpa mo pɛɛ kɛ he si bami ɔ,

36 moo bu mɛ tue ngɛ hiɔwe. Ngɔɔ matsɛ ɔ, kɛ Israel ma a a he yayami ɔ ngɔ pa mɛ. Tsɔɔ mɛ nɛ a pee nɔ́ nɛ da. Lɔ ɔ se ɔ, Yawɛ, ha nɛ hiɔmi nɛ nɛ ngɛ o zugba a nɛ o ngɔ kɛ ha o ma a kaa a weto ní kɛ yaa neneene ɔ nɔ.

37 “Ke hwɔ, loo gbenɔ hiɔ, loo tsohi a he hiɔ, loo baalɛ ba zugba a nɔ, aloo ke he nyɛli ba sa o ma mi bi ɔmɛ a yi ngɔ wo a ma amɛ eko mi ɔ, haomi tsuaa haomi, aloo hiɔ tsuaa hiɔ nɛ ji ɔ,

38 ke o ma, Israel bi ɔmɛ ba we nɛ ɔ mi kakaaka, loo kutuu, nɛ a ba wo a nine nɔ nɛ a fa kue ha mo kɛ je a tsui mi ɔ, bɔ tsuaa bɔ nɛ a hiami ní ɔmɛ ngɛ ɔ,

39 moo nu a pɛɛ kpami ɔ. Moo bu mɛ tue ngɛ o hi he ɔ ngɛ hiɔwe; ngɔɔ a he yayami ɔmɛ ngɔ pa mɛ, nɛ o ye kɛ bua mɛ. Mo pɛ lɛ o le nɔmlɔ adesa tsui mi. Moo pee nɔ tsuaa nɔ hiami ní ha lɛ,

40 bɔ nɛ pee nɛ o ma mi bi ɔmɛ nɛ a bu mo ligbi abɔ nɛ a ngɛ zugba a nɛ o ngɔ ha wa nɛmɛ ɔmɛ ɔ nɔ ɔ.

41 “Jã kɛ̃, ke nubwɔ ko nɛ je ma se lokoo nu o biɛ, kɛ ní nguahi nɛ o pee ha o ma, Israel ɔ, nɛ e ba we nɛ ɔ mi nɛ e ba ja mo, nɛ e sɔle ɔ,

42

43 moo bu e pɛɛ kpami ɔ tue. Moo nu ngɛ o hi he ɔ ngɛ hiɔwe, nɛ o pee nɔ́ nɛ e ngɛ hlae ɔ ha lɛ; bɔ nɛ pee nɛ nimli tsuo nɛ ngɛ je ɔ mi ɔ, a le mo, nɛ a bu mo kaa bɔ nɛ o ma, Israel bi ɔmɛ buu mo ɔ. Kɛkɛ ɔ, a maa le kaa we nɛ ɔ nɛ i po ɔ ji he nɛ sa nɛ a ja mo ngɛ.

44 “Ke o fa o ma a ke a kɛ a he nyɛli ya hwu, nɛ a plɛ a hɛ mi ngɔ kpee ma nɛ ɔ nɛ o hla ngɔ to, kɛ we nɛ ɔ nɛ i po ha mo ɔ, nɛ a fa kue ha mo ɔ,

45 moo bu mɛ tue. Moo nu ngɛ hiɔwe, nɛ o ha nɛ a ye kunimi.

46 “Nɔ ko nɔ ko be nɛ pee we yayami. Lɔ ɔ he ɔ, ke e ba mi kaa o ma a pee yayami kɛ si mo, nɛ o mi mi fu mɛ, nɛ o ngɔ mɛ ngɔ wo a he nyɛli a dɛ mi, nɛ a nuu mɛ nyɔguɛ kɛ ho zugba kpa nɔ ya, lejɛ ɔ kɛ jio, e kɛ we jio,

47 moo bu o ma mi bi ɔmɛ a kue fami ɔ tue. Ke benɛ a ngɛ jamɛ a zugba a nɔ ɔ, a pia a he, nɛ a tsake a tsui, nɛ a jaje a he yayami ngɔ ha mo ɔ, moo bu a kue fami ɔ tue.

48 Ke a tsake a tsui niinɛ ngɛ jamɛ a zugba a nɔ, nɛ a plɛ a hɛ mi ngɔ kpee zugba nɛ ɔ nɛ o ngɔ ha wa nɛmɛ ɔmɛ, kɛ ma nɛ ɔ nɛ o hla ngɔ to, kɛ we nɛ ɔ nɛ i po ngɔ ha mo ɔ, nɛ a fa kue ha mo ɔ,

49 moo bu a kue fami ɔ tue. Moo nu ngɛ o hi he ngɛ hiɔwe ɔ, nɛ o na mɛ mɔbɔ.

50 Ngɔɔ a he yayami ɔmɛ tsuo, kɛ o hɛ mi atuã nɛ a tsɔ ɔ ngɔ pa mɛ, nɛ o ha ni nɛmɛ nɛ ba nuu mɛ nyɔguɛ ɔ nɛ a na mɛ mɔbɔ.

51 Mo nitsɛ o ma ji mɛ; mo lɛ o je mɛ kɛ je Egipt, jamɛ a zugba a nɛ a hi mi kaa nɔ́ nɛ dade flɔɔnɔɔ mi lɛ a kɛ mɛ wo ɔ.

52 “Yawɛ Mawu lee, moo hyɛ o ma Israel, kɛ a matsɛ ɔ, nɛ o na mɛ mɔbɔ; be tsuaa be nɛ a maa fa kue ha mo ɔ, moo bu mɛ tue.

53 Mo lɛ o hla mɛ kɛ je je ma amɛ tsuo a kpɛti, nɛ o kɛ mɛ ba pee mo nitsɛ o ma kaa bɔ nɛ o gu o tsɔlɔ, Mose nɔ de mɛ, benɛ o je wa nɛmɛ ɔmɛ kɛ je Egipt ɔ.”

Salomo gbaa ma a

54 Benɛ Salomo fa kue ha Yawɛ gbe nya a, e te da si ngɛ bɔ sami la tɛ ɔ hɛ mi he nɛ e kpla si ngɛ ɔ, nɛ e wo e nine nɔ kɛ ya hiɔwe.

55 E wo gbi wawɛɛ nitsɛ, nɛ e gbaa Israel ma kpekpemi ɔ nɛ bua a he nya ngɛ lejɛ ɔ, nɛ e de ke,

56 ⓙ “A je Yawɛ yi; ejakaa e ha e ma a tue mi jɔmi kaa bɔ nɛ e de to ke e maa pee ɔ. Ní kpakpahi nɛ e wo si kɛ gu e tsɔlɔ, Mose nɔ kaa e maa pee ɔ, e pee mɛ tsuo pɛpɛɛpɛ.

57 Yawɛ, wa Mawu ɔ kɛ wɔ nɛ hi si kaa bɔ nɛ e kɛ wa nɛmɛ ɔmɛ hi si ɔ; e ko si wɔ, nɛ e ko kua wɔ hulɔ.

58 Yawɛ nɛ ha waa bu lɛ, bɔ nɛ pee nɛ waa ba wa je mi saminya kaa bɔ nɛ e suɔ, nɛ waa ye mlaa amɛ tsuo nɛ e wo wa nɛmɛ ɔmɛ ɔ, kɛ blɔ nya tomi ɔmɛ a nɔ.

59 Yawɛ, wa Mawu ɔ nɛ kai kue nɛ i fa ha lɛ, kɛ pɛɛ nɛ i kpa lɛ nɛ ɔ be tsuaa be. É na e ma, Israel, kɛ a matsɛ ɔ mɔbɔ, nɛ e pee a hiami níhi ha mɛ daa ligbi,

60 bɔ nɛ pee nɛ je ma amɛ tsuo nɛ a le kaa Yawɛ pɛ ji Mawu; e se ɔ, mawu kpa ko be hu.

61 Nyɛ, e ma a, nyɛɛ ye Yawɛ, wa Mawu ɔ anɔkuale daa, nɛ nyɛɛ ye e mlaa amɛ, kɛ blɔ nya tomi ɔmɛ tsuo a nɔ kaa bɔ nɛ nyɛ ngɛ pee mwɔnɛ nɛ ɔ.”

Yawɛ we ɔ nya blimi

(<x>140 7:4-10</x>)

62 Enɛ ɔ se ɔ, Matsɛ Salomo kɛ Israel ma a tsuo sã bɔ ha Yawɛ, nɛ a pee kusumi kɛ bli Yawɛ we ɔ nya. Salomo ngɔ ní nɛ ɔmɛ kɛ sã tue mi jɔmi bɔ: na 22,000, kɛ to 120,000.

63

64 Jamɛ a ligbi ɔ nɔuu ɔ, Salomo pee kue ɔ nɛ ngɛ Yawɛ we kpɛti ɔ klɔuklɔu, nɛ e sã sami bɔ, kɛ niye ní bɔ ngɛ lejɛ ɔ; e ngɔ lohwe ɔmɛ a zɔ ɔ hu kɛ sã tue mi jɔmi bɔ. E pee nɔ́ nɛ ɔ, ejakaa akɔblee bɔ sami la tɛ ɔ klee we bɔ nɛ a ma nyɛ sã bɔ nɛ ɔmɛ tsuo ngɛ nɔ.

65 Salomo kɛ Israel ma kpekpemi ɔ tsuo ye Gbasisihimi nyami be ɔ ngɛ Yawɛ we ɔ otsi. Nimli babauu nitsɛ ba nyami be nɛ ɔ; a je tsitsaa Hamat yo kpɛ blɔ ngɛ omleyi je, kɛ ya si Egipt huzu ɔ he ngɛ leneyi je.

66 Ligbi nɛ ji kpaanyɔ ɔ, Salomo ha ma a nane. Mɛ tsuo a je e yi saminya, nɛ a ho a wehi a mi ya kɛ bua jɔmi ngɛ ní kpakpahi tsuo nɛ Yawɛ pee ha e tsɔlɔ, David, kɛ e ma, Israel ɔ he.