Matsɛmɛ I, 10

Sheba manyɛ ba slaa Salomo

(<x>140 9:1-12</x>)

1 ⓞ Benɛ Sheba manyɛ nu bɔ nɛ Salomo he biɛ ha a, e hia blɔ kɛ ba Yerusalem, konɛ e ba ka lɛ kɛ sane bimihi nɛ a he wa.

2 Benɛ e ma a, nihi babauu nitsɛ nyɛɛ e se kɛ ba. E kɛ afukpɔngɔhi nɛ a wo a se mi ní babauu hu ba. Ní ɔmɛ ji tsopa kɛ e he via, sika tsu, kɛ tɛ nɛ he jua wa. Benɛ manyɛ ɔ ba na Salomo ɔ, e bi Salomo munyuhi tsuo nɛ ngɛ e yi mi,

3 nɛ Salomo ha lɛ munyu ɔmɛ tsuo a heto; ekoeko be nɛ he wa tsɔ nɛ e nyɛ we nɛ e ha heto.

4 Sheba manyɛ ɔ nu Salomo nile munyu ɔmɛ, nɛ e na matsɛ we ɔ nɛ e po ɔ.

5 Jehanɛ se hu, manyɛ ɔ na niye ní nɛ a kɛ to okplɔɔ ha matsɛ ɔ; e na matsɛ tsɔli nikɔtɔma amɛ nɛ a hii si kɛ bɔle matsɛ ɔ; e na matsɛ sɔmɔli ɔmɛ nɛ a pueɔ si kɛ a he tadehi; e na matsɛ ɔ dã woli, kɛ sami bɔhi nɛ e sãã ngɛ Yawɛ we ɔ. Benɛ Sheba manyɛ ɔ na ní ɔmɛ tsuo ɔ, e he mi po,

6 nɛ e de Matsɛ Salomo ke, “O he sane, kɛ o nile nɛ i nu he ngɛ imi nitsɛ ye zugba a nɔ ɔ, anɔkuale sɔuu.

7 Se i he we yi kɛ ya si i ba na kɛ ye hɛngmɛ. Mamoo, i nui e mi fa po tete; o nile kɛ o kplɔkɔtɔ hiɛ babauu pe bɔ nɛ a gba mi ɔ.

8 O yi ɔmɛ a he ba ní pɛ! O tsɔli ɔmɛ nɛ sɔmɔɔ mo daa, nɛ a nuɔ o nile munyu ɔmɛ ɔ, mɛ hu a he ba ní pɛ!

9 Yawɛ, o Mawu ɔ nɛ ná o he bua jɔmi, nɛ e wo mo Israel nɔ matsɛ ɔ, a je e yi. Akɛnɛ suɔmi nɛ Yawɛ suɔ Israel ɔ ngɛ kɛ yaa neneene he je ɔ, e wo mo tsɛ, konɛ o kojo, nɛ o ye dami sane.”

10 Enɛ ɔ se ɔ, Sheba manyɛ ɔ ke Matsɛ Salomo ní nɛ ɔmɛ nɛ e hɛɛ kɛ ba a: sika tsu kilo akpe eywiɛ, tsopa kɛ e he via babauu, kɛ tɛ nɛ he jua wa. Tsopa kɛ e he via nɛ Sheba manyɛ ɔ ba ke Matsɛ Salomo ɔ, Salomo na we eko nɛ hiɛ kaa ja hyɛ.

11 Hiram lɛ ɔmɛ nɛ ngɔ sika tsu kɛ je Ofir kɛ ba a, a ngɔ tsohi, kɛ tɛhi nɛ a he jua wa hu babauu kɛ ba.

12 Salomo kɛ tso nɛ ɔmɛ eko kpɛ piɛ ngɔ wo Yawɛ we ɔ, kɛ matsɛ we ɔ a he, nɛ e kɛ eko hu pee kpa sakuhi, kɛ bɛhi ha e lali ɔmɛ. Tso ɔmɛ nɛ a kɛ ba a, a nɛ a henɔ ko hyɛ ngɛ Israel kɛ ba si mwɔnɛ ligbi nɛ ɔ.

13 Nɔ́ tsuaa nɔ́ nɛ Sheba manyɛ ɔ ngɛ hlae nɛ e bi matsɛ Salomo ɔ, e ha lɛ; slo níhi nɛ je Salomo nitsɛ tsui mi nɛ e ha lɛ. Pee se ɔ, manyɛ ɔ, kɛ e tsɔli ɔmɛ kpale a se kɛ ho Sheba zugba a nɔ ya.

Matsɛ Salomo ní

(<x>140 9:13-28</x>)

14 Sika tsu nɛ baa Matsɛ Salomo dɛ mi daa jeha ji sika tsu kilo akpe nyingmi enyɔ kɛ etɛ;

15 slo nɔ́ nɛ a tsuɔ ngɛ jua yeli a dɛ, kɛ se nami nɛ jeɔ jua yemi ní tsumi ɔ mi, kɛ tó nɛ Arabia matsɛmɛ ɔmɛ, kɛ Israel zugba a nɔ amlaalo ɔmɛ tsuɔ ha lɛ ɔ.

16 Matsɛ Salomo pee tsɛ̃i agbo lafa enyɔ, nɛ e kɛ sika tsu nɛ a fia nɔ, nɛ jiimi ji kilo kpaago ha tsɛ̃i tsuaa tsɛ̃i he.

17 E pee tsɛ̃i wawi hu lafa etɛ, nɛ e kɛ sika tsu nɛ a fia nɔ, nɛ jiimi ji kilo enyɔ ha tsɛ̃i tsuaa tsɛ̃i he. E ngɔ tsɛ̃i nɛ ɔmɛ tsuo ya to ngɛ Lebanon hue tsu[2] ɔ mi.

18 Jehanɛ, Salomo kɛ suɔ wu pee matsɛ sɛ agbo ko, nɛ e kɛ sika tsu ngmingmiingmi ha he.

19 Matsɛ sɛ ɔ ngɛ kpoku ekpa nɛ a kuɔɔ kɛ yaa he, nɛ jata daa si ngɛ kpoku tsuaa kpoku nya; jata amɛ tsuo peeɔ nyɔngma kɛ enyɔ. A pee na ku yi kɛ fɔ sɛ ɔ se mi, nɛ jata kake daa si ngɛ sɛ ɔ nine enyɔ ɔmɛ a se hiɛ kɛ hiɛ. A pee we matsɛ sɛ nɛ ɔ henɔ ko hyɛ ngɛ matsɛ yemi he kpa ko.

20

21 Sika tsu a kɛ pee Matsɛ Salomo nyu numi kpluhi tsuo. Níhi nɛ ngɛ Lebanon hue tsu ɔ mi hu sika tsu ngmingmiingmi sɔuu lɛ a kɛ pee mɛ; sika hiɔ be mi, ejakaa a bui sika hiɔ he akɔtaa ngɛ Salomo be ɔ mi.

22 Matsɛ Salomo jua yemi lɛ ɔmɛ, kɛ Hiram ní ɔmɛ bla kɛ tsu ní ngɛ wo ɔ nɔ. Daa jeha etɛ ɔ, Salomo lɛ ɔmɛ ngɔɔ sika tsu, sika hiɔ, suɔ wu, siato, kɛ anguɛ kɛ baa we.

23 Matsɛ Salomo na ní, nɛ e le ní pe je nɛ ɔ mi matsɛmɛ ɔmɛ tsuo;

24 nɛ je ɔ tsuo hlaa kaa a maa ba nɛ a ba bu nile nɛ Mawu ngɔ ha lɛ ɔ tue.

25 Nɔ tsuaa nɔ kɛ nike ní nɛ ɔmɛ eko baa: sika hiɔ, sika tsu níhi, tade, ta hwumi níhi, tsopa kɛ e he via, okpɔngɔ, kɛ teji okpɔngɔ. Nɔ́ nɛ ɔ ya nɔ daa jeha.

26 ⓟ Salomo bua ta zugba lɛhi, kɛ ta okpɔngɔhi a nya; e na ta zugba lɛ akpe kɛ e nya lafa eywiɛ, kɛ ta okpɔngɔ akpe nyɔngma kɛ enyɔ. Ta okpɔngɔ ɔmɛ ekomɛ ngɛ e ngɔ ngɛ Yerusalem, nɛ e ngɔ ekomɛ hu ya to ma kpa komɛ a mi.

27 Salomo yi nɔ ɔ, a pee we sika hiɔ, kɛ seda he nɔ́ ko ngɛ Yerusalem; sika hiɔ ngɛ kaa tɛ, nɛ seda tso hu pɔ he kaa bɔ nɛ sikamore tso pɔ he ngɛ Yuda kɔ̃ ɔmɛ a mi.

28 ⓠ Matsɛ Salomo jua yeli ɔmɛ ya heɔ Salomo okpɔngɔ ɔmɛ kɛ jeɔ Musri, kɛ Kilikia,

29 nɛ a ya heɔ ta zugba lɛhi ngɛ Egipt. Mɛ kɛ̃ nɛ a ya heɔ okpɔngɔhi, kɛ ta zugba lɛhi nɛ a ya juaa kɛ haa Hit, kɛ Siria matsɛmɛ ɔmɛ. A juaa ta zugba lɛ kake sika hiɔ yi lafa ekpa, kɛ okpɔngɔ kake sika hiɔ yi lafa kɛ nyingmi enuɔ.