Matsɛmɛ I, 7 - Laravel

Matsɛ Salomo nitsɛ e we ɔ

1 Salomo po lɛ nitsɛ e we hulɔ; e ngɔ jeha nyɔngma kɛ etɛ kɛ gbe we ɔ nya.

2 Tsuhi nɛ ngɛ matsɛ we ɔ mi ɔ, a tsɛɛ kake ke Lebanon hue tsu. E kami ji gugue nyingmi enyɔ kɛ enuɔ, e blimi gugue nyɔngma kɛ enyɔ kɛ fa, kɛ e hiɔwe yami gugue kpaago kɛ fa. Lebanon hue tsu nɛ ɔ ngɛ seda titimahi zã etɛ nɛ a kɛ seda plaihi ma a nɔ; seda titima nyɔngma kɛ enuɔ ngɛ zã tsuaa zã mi. A kɛ seda sɛu tsu ɔ nɔ kɛ be ngɛ nito he ɔmɛ nɛ maa si ngɛ titima amɛ a nɔ ɔ.

4 Kasa nya gbogbo enyɔ ɔmɛ nɛ a ngɛ hiɛ kɛ hiɛ ɔ, saflɛhi zã etɛ ngɛ eko tsuaa eko he.

5 Sinya tso ɔmɛ, kɛ saflɛ tso ɔmɛ tsuo hɛɛ kɔ nya eywiɛɛywiɛ, nɛ saflɛhi zã etɛ ɔmɛ nɛ ngɛ gbogbo enyɔ ɔmɛ a he ɔ, a pee mɛ hanɔhanɔ kɛ kpee a sibi.

6 Tsu ɔ kpa biɛ ji titimahi a kue. E kami ji gugue nyɔngma kɛ enyɔ kɛ fa, e blimi gugue kpaago kɛ fa. Kue wayoo ko kɛ e yi mi gba, kɛ titimahi ngɛ he.

7 Matsɛ Salomo je tsu ha matsɛ sɛ ɔ, nɛ lejɛ ɔ e hii kɛ buaa sanehi a he. Tsu nɛ ɔ, a tsɛɛ lɛ kojomi kue; nɛ a kɛ seda ka mi kɛ je zugba kɛ ya si akpale ɔmɛ a he.

8 ⓣ Salomo hi he ɔ nitsɛ nɛ ngɛ kue kpa ko mi ngɛ kojomi kue ɔ se ɔ, e pee lɛ kaa tsu kpa amɛ nɔuu; nɛ e po jamɛ a we ɔ eko kɛ ha e yo nɛ ji Egipt matsɛ ɔ biyo ɔ.

9 Tsu nɛ ɔmɛ tsuo, kɛ kue nguaa a, tɛ nɛ he jua wa nɛ a kɛ pee mɛ kɛ je sisi tomi ɔ nɔ kɛ ya si siaudo ɔ he. A susu tɛ ɔmɛ loko a kó, nɛ a kɛ sau dla a hɛ mi, kɛ a se.

10 Tɛ nguanguahi, kɛ tɛhi nɛ a he jua wa saminya nɛ a kɛ to tsu ɔ sisi; tɛ ɔmɛ ekomɛ a kami ji nine mi blimi nyɔngma kɛ ekpa, nɛ ekomɛ hu a kami ji nine mi blimi nyingmi enyɔ.

11 E nɔ nɛ a fia a, lɔ ɔ hu tɛhi nɛ a he jua wa, nɛ a susu nɛ a kó, kɛ seda a kɛ pee.

12 Matsɛ we mi kue nguaa a, kpɛti kue ɔ nɛ ngɛ Yawɛ we ɔ, kɛ wayoo ɔ nɛ ngɛ agbo ɔ nya a, tɛ nɛ a kó gbaka etɛ, kɛ seda plai gbaka kake nɛ a kɛ pee gbogbo ɔmɛ.

Huram ní tsumi

13 Matsɛ Salomo tsɔ nɛ a ya ngɔ nyumu ko nɛ a tsɛɛ lɛ Huram kɛ je Tiro kɛ ba.

14 Yalɔyo ko nɛ je Naftali wɛtso ɔ mi ɔ bi ji lɛ; e tsɛ lɛɛ e je Tiro, nɛ akɔblee ga ní tsulɔ ji lɛ. Huram hu akɔblee ga ní tsulɔ kpanaa ji lɛ; nɛ e ba Salomo ngɔ nɛ e ba tsu akɔblee ní tsumi ɔ tsuo.

Akɔblee titima enyɔ ɔmɛ

(<x>140 3:15-17</x>)

15 Huram pee akɔblee titima enyɔ; kake hiɔwe yami ji nine mi blimi nyingmi etɛ kɛ ekpa nɛ kpa nɛ kami ji nine mi blimi nyingmi enyɔ kɛ eywiɛ maa kpe he. Puɔ ngɛ a mi, nɛ eko tsuaa eko timi ji nine nguɛ mi eywiɛ.

16 Jehanɛ, e pee akɔblee kpɔ enyɔ kɛ ma titima amɛ a yi mi; kake hiɔwe yami ji nine mi blimi nyɔngma.

17 E pee ya enyɔ nɛ a lo, kɛ mɔmɔ jlasi nɛ a pee kaa kɔsɔkɔsɔ ngɔ ma titima enyɔ ɔmɛ a yi mi.

18 E pee kpɔ kokloohi kaa tso yiblii gbaka enyɔ ngɔ wo ya a eko tsuaa eko he kɛ kpe, nɛ e ngɔ kɛ ha titima amɛ a yi mi kpɔ ɔmɛ a nɔ.

19 Kpɔ ɔmɛ nɛ maa si ngɛ titima amɛ a yi mi ɔ, a pee mɛ kaa mɔmɔ, nɛ eko tsuaa eko hiɔwe yami ji nine mi blimi kpaanyɔ.

20 A pee nɔ́ kokloo ko ngɛ ya a nɛ ngɛ titima a yi mi ɔ kasa nya, nɛ lɔ ɔ mi kpɔ ɔmɛ ngɛ ɔ nɛ. A pee kpɔ kokloo lafa enyɔ ngɛ gbaka enyɔɔnyɔ mi kɛ bɔle kpɔ tsuaa kpɔ.

21 Huram ngɔ akɔblee titima enyɔ nɛ ɔmɛ ngɔ ma Yawɛ we ɔ agbo ɔ nya; e wo nɔ́ nɛ maa si ngɛ leneyi je ɔ biɛ ke Yakin, nɛ e wo omleyi je nɔ́ ɔ biɛ ke Boaz.

22 Akɔblee kpɔ ɔmɛ nɛ a pee kaa mɔmɔ ɔ maa si ngɛ titima amɛ a yi mi. Bɔ nɛ a pee nɛ a kɛ gbe titima amɛ a he ní tsumi nya ji nɛ ɔ nɛ.

Akɔblee nyu nɔ́ ɔ

(<x>140 4:2-5</x>)

23 Huram pee akɔblee nyu nɔ́ ko; e ngɛ kokloo, nɛ e mi kuɔmi ji nine mi blimi nyɔngma. Kɛ je e nya hiɛ kɛ ya si hiɛ ɔ, e peeɔ nine mi blimi nyingmi enyɔ nɛ kpa nɛ kami ji nine mi blimi nyingmi ekpa maa kpe he.

24 A pee akɔblee tɔhi gbaka enyɔ kɛ bɔle nyu nɔ́ ɔ kuɔ si kɛ kpe; a sile akɔblee kɛ pee mɛ kɛ nyu nɔ́ ɔ tsuo kake.

25 Nyu nɔ́ ɔ maa si ngɛ akɔblee na nyɔngma kɛ enyɔ a nɔ; etɛ plɛ a hɛ mi ngɔ kpee omleyi je; etɛ plɛ a hɛ mi ngɔ kpee bonyoku je; etɛ plɛ a hɛ mi ngɔ kpee leneyi je, nɛ etɛ hu plɛ a hɛ mi ngɔ kpee beleku je. Mɛ tsuo a plɛ a se ngɔ wo nyu nɔ́ ɔ.

26 Nyu nɔ́ ɔ timi ngɛ kaa dɛ mi blimi. A pee e nya kaa bɔ nɛ kplu nya ngɛ ɔ, kaa mɔmɔ nɛ blɛke, nɛ nyu maa pee buɛ akpe enyɔ lɛ yaa mi.

Akɔblee tlɔɔke ɔmɛ

27 Huram pee akɔblee tlɔɔke nyɔngma; tlɔɔke kake kami ji nine mi blimi kpaanyɔ, e blimi nine mi blimi kpaanyɔ, kɛ e hiɔwe yami nine mi blimi ekpa.

28 Bɔ nɛ e pee mɛ ha ji nɛ ɔ nɛ: e pee akɔblee ní komɛ kɔ nya eywiɛɛywiɛ nɛ a kɛ hɔɔ akɔblee sinya tsohi a mi.

29 E pee jatahi, na kuhi, kɛ kerubhi ngɛ akɔblee ní kɔ nya eywiɛɛywiɛ ɔmɛ a nɔ; nɛ e pee mɔmɔ jlasi saminyawiiwi ngɛ jata amɛ, kɛ na ku ɔmɛ a nɔ ngɛ hɛ mi, kɛ se tsuo.

30 Tlɔɔke tsuaa tlɔɔke ngɛ nane eywiɛ kɛ a mi tsohi nɛ a kɛ akɔblee pee. E sile akɔblee ngɔ mɛtɛ tlɔɔke tsuaa tlɔɔke kɔ nya eywiɛ ɔmɛ, nɛ́ a kɛ kã maa ma nɔ; e pee mɔmɔ jlasi ngɔ wo eko tsuaa eko he.

31 E pee kla lokotoo ko nɛ maa hɛɛ kã a ngɔ ma nɔ. E nya je kpo ngɛ tlɔɔke ɔ yi mi nine mi blimi enyɔ, nɛ e sɛ mi nine mi blimi etɛ; nɛ e pee afɛu níhi kɛ bɔle kla a kɛ kpe.

32 Nane eywiɛ ngɛ tlɔɔke kake sisi, nɛ a pee tso ɔmɛ nɛ ngɛ nane ɔmɛ a he ɔ kɛ tsa tlɔɔke ɔ; nane kake hiɔwe yami ji nine mi blimi etɛ.

33 A pee tlɔɔke ɔ nane ɔmɛ kaa bɔ nɛ a pee ta zugba lɛ ní ɔmɛ; a sile akɔblee kɛ sɔ̃ nane ɔmɛ a he tso ɔmɛ, kɛ dade ɔmɛ, kɛ ni kpa amɛ tsuo.

34 A pee ninehi ngɔ mɛtɛ tlɔɔke tsuaa tlɔɔke kɔ nya eywiɛ ɔmɛ, nɛ nine ɔmɛ, kɛ tlɔɔke ɔ tsa.

35 Nɔ́ lokotoo ko bu tlɔɔke tsuaa tlɔɔke nya kɛ kpe; e blimi ji nine mi blimi kake. A pee nya bumi nɔ́ ɔ, kɛ e he nine ɔmɛ, kɛ tlɔɔke ɔ ngɔ tsa.

36 A hlɔ kerubhi, jatahi, kɛ tã ngɔ wo nine ɔmɛ, kɛ akɔblee ní ɔmɛ nɛ a kɛ hɔɔ níhi a mi ɔ a he ngɛ he tsuaa he nɛ a na blɔ ngɛ; nɛ mɔmɔ jlasi bɔle mɛ kɛ kpe.

37 Bɔ nɛ a pee tlɔɔke nyɔngma amɛ ji nɛ ɔ nɛ. A sɔ̃ mɛ tsuo fiee; a hɛɛ susumi kake kɛ henɔ kake.

38 ⓤ Jehanɛ, Huram pee akɔblee kã nyɔngma, tlɔɔke tsuaa tlɔɔke kɛ e he kã. Kã tsuaa kã a, kpa nine mi blimi kpaanyɔ maa kpe he, nɛ nyu lita lafa kpaanyɔ maa ya mi.

39 E kɛ tlɔɔke enuɔ ma Yawɛ we ɔ leneyi je, nɛ e kɛ enuɔ ma omleyi je; e ngɔ nyu nɔ́ ɔ lɛɛ ngɔ ma we ɔ leneyi je kɛ beleku je a kpɛti kɔ nya he ko.

Yawɛ we ɔ mi dlami níhi

(<x>140 4:11-5:1</x>)

40 Jehanɛ, Huram pee buɛhi, sofihi, kɛ kãhi. Yawɛ we ɔ he ní tsumi nɛ Matsɛ Salomo ha lɛ tsumi ɔ, e gbe lɛ tsuo nya. Níhi nɛ e pee ɔ ji nɛ ɔmɛ nɛ: Akɔblee titima enyɔ. Akɔblee kpɔ enyɔ nɛ ma titima amɛ a yi mi. Ya enyɔ nɛ a lo, kɛ mɔmɔ jlasi nɛ a pee kaa kɔsɔkɔsɔ ngɔ ma titima enyɔ ɔmɛ a yi mi. Akɔblee kpɔ kokloohi kaa tso yiblii lafa eywiɛ nɛ a pee ngɔ wo gbaka enyɔɔnyɔ a mi kɛ bɔle kpɔ ɔmɛ. Tlɔɔke nyɔngma. Kã nyɔngma. Nyu nɔ́. Akɔblee na ku nyɔngma kɛ enyɔ nɛ nyu nɔ́ ɔ maa si ngɛ a nɔ. Buɛ ɔmɛ, sofi ɔmɛ, kɛ kã amɛ. Yawɛ we ɔ he ní nɛ ɔmɛ tsuo nɛ Huram pee ha Matsɛ Salomo ɔ, akɔblee nɛ a sa he a kɛ pee.

46 Matsɛ ɔ ha nɛ a sɔ̃ ní ɔmɛ ngɛ akɔblee galɔ ní tsumi he nɛ ngɛ Sukot kɛ Zaretan a kpɛti, ngɛ Yordan kɔ̃ ɔ mi ɔ.

47 Salomo ha we nɛ a ngmɛ akɔblee ní ɔmɛ nɛ a pee ɔ, ejakaa a hiɛ tsɔ; lɔ ɔ he ɔ, nɔ ko nɔ ko li akɔblee ɔ nya.

48 ⓥ Salomo ha a kɛ sika tsu ngmingmiingmi pee ní nɛ ɔmɛ hulɔ kɛ ma Yawɛ we ɔ mi: bɔ sami la tɛ ɔ, okplɔɔ ɔ nɛ a kɛ abolo klɛdɛɛ ɔ maa nɔ ngɛ Yawɛ we ɔ,

49 ⓦ kane tso nyɔngma amɛ nɛ maa he klɔuklɔu pe kulaa a hɛ mi ɔ, enuɔ ngɛ leneyi je, kɛ enuɔ hu ngɛ omleyi je; mɔmɔ ɔmɛ, kane ɔmɛ, abɛɛle ɔmɛ,

50 kplu ɔmɛ, la gbemi ní ɔmɛ, kã amɛ, kɛ ngɛyu ɔmɛ nɛ a kɛ jeɔ la a; he klɔuklɔu pe kulaa a sinya amɛ a se asa amɛ, kɛ Yawɛ we ɔ kpo nɔ je sinya amɛ a se asa amɛ.

51 ⓧ Benɛ Matsɛ Salomo gbe Yawɛ we ɔ he ní tsumi ɔ tsuo nya a, e ngɔ níhi tsuo nɛ e tsɛ David gbaa nɔ ngɔ ha Yawɛ ɔ ngɔ to nito hehi ngɛ lejɛ ɔ. Ní ɔmɛ ji nɛ ɔmɛ nɛ: sika hiɔ, sika tsu, kɛ ni kpa komɛ.