Matsɛmɛ I, 15

Yuda matsɛ, Abiya

(<x>140 13:1-14:1</x>)

1 Israel matsɛ, Yeroboam yi nɔ jeha nyɔngma kɛ kpaanyɔ ɔ, Abiya ba bɔni tsɛ yemi ngɛ Yuda ma a nɔ.

2 E hi Yerusalem kɛ ye matsɛ jeha etɛ. E nyɛ ji Maaka, Absalom biyo ɔ.

3 E ya wo e tsɛ nane, nɛ e pee yayami nɛ e tsɛ pee ɔ tsuo pɛpɛɛpɛ. E ya nyɛɛ we Yawɛ, e Mawu ɔ se kaa bɔ nɛ e nɛnɛkasowa David pee ɔ.

4 ⓑ Se kɛ̃ ɔ, David he ɔ, Yawɛ, e Mawu ɔ ha lɛ binyumu, nɛ bi nɛ ɔ ba ye e se ngɛ Yerusalem, nɛ e ha nɛ matsɛ yemi ɔ da si.

5 ⓒ Yawɛ pee nɔ́ nɛ ɔ, ejakaa David wami be ɔ tsuo ɔ, e pee Yawɛ suɔmi nya ní. Mlaa amɛ nɛ Yawɛ wo lɛ ɔ, e tɔ we ekoeko pe sane ɔ nɛ ya ba ngɛ e kɛ Hit no Uria a kpɛti ɔ pɛ.

6 Abiya yi nɔ ɔ, Israel kɛ Yuda a kpɛti jɔɛ; daa nɛ ɔ, a ngɛ ta nɔ.

7 Abiya he sane kpahi nɛ piɛ ɔ, a ngma ngɛ Yuda Matsɛmɛ ɔmɛ a Blema Sanehi Womi ɔ mi.

8 Abiya ba gbo, nɛ a pu lɛ ngɛ David ma a mi, nɛ e binyumu Asa ba ye tsɛ ngɛ e se.

Yuda matsɛ, Asa

(<x>140 15:16-16:6</x>)

9 Israel matsɛ, Yeroboam yi nɔ jeha nyingmi enyɔ ɔ, Asa ba bɔni tsɛ yemi ngɛ Yuda ma a nɔ.

10 E hi Yerusalem kɛ ye matsɛ jeha nyingmi eywiɛ kɛ kake. E na ji Maaka, Absalom biyo ɔ.

11 Asa pee Yawɛ suɔmi nya ní kaa bɔ nɛ e nɛ, David pee ɔ pɛpɛɛpɛ.

12 E fie nyumu ɔmɛ nɛ ngɔ a he ngɔ ha ajuama bɔmi ngɛ jami kusumi ko nya a kɛ je zugba a nɔ, nɛ e je amaga amɛ tsuo nɛ e nɛmɛ ɔmɛ puɛ ɔ.

13 E na, Maaka po e kpa lɛ manyɛ yemi, ejakaa e puɛ amaga ko nɛ a hiee kɛ ha yo mawu ɔ nɛ a tsɛɛ Ashera a. Asa ywia amaga nɛ ɔ, nɛ e sã lɛ ngɛ Kidron pa a nya.

14 E ngɛ mi kaa Asa puɛ we wɔ jami he ɔmɛ tsuo lɛɛ, se e nyɛɛ Yawɛ se kɛ pi si e wami be ɔ tsuo.

15 E ya ngɔ níhi nɛ e tsɛ pee klɔuklɔu kɛ ha Yawɛ ɔ, kɛ sika tsu, kɛ sika hiɔ níhi; nɛ lɛ nitsɛ e pee mɛ klɔuklɔu kɛ ba ma Yawɛ we ɔ.

16 Yuda matsɛ, Asa, kɛ Israel matsɛ, Baasha a kpɛti jɔɛ a wami be ɔ tsuo; daa nɛ ɔ, a ngɛ ta nɔ.

17 Israel matsɛ, Baasha ba tua Yuda, nɛ e dla po Rama, bɔ nɛ pee nɛ nɔ ko nɔ ko kó nyɛ nɛ e je Israel kɛ ya Yuda, loo Yuda kɛ ba Israel.

18 Enɛ ɔ he je ɔ, Matsɛ Asa ya muɔ sika hiɔ, kɛ sika tsu tsuo nɛ piɛ ngɛ Yawɛ we ɔ nito he ɔ, kɛ matsɛ we ɔ nito he ɔ, nɛ e tsɔ e tsɔli ɔmɛ ekomɛ Damasko, nɛ e kɛ ní ɔmɛ ya ha Siria matsɛ, Benhadad, Hezio binyumu Tabrimon bi ɔ. Sɛ gbi nɛ piɛ he ji nɛ ɔ nɛ:

19 “Ha nɛ i kɛ mo waa so kaa bɔ nɛ tsaatsɛ kɛ o tsɛ so ɔ. I ngɛ mo sika hiɔ, kɛ sika tsu nike ní manee. Yaa nɛ o kɛ Israel matsɛ, Baasha ya po somi nɛ o kɛ lɛ so ɔ mi, bɔ nɛ pee nɛ e je e ta buli ɔmɛ kɛ je ye zugba a nɔ kɛ ho.”

20 Benhadad kplɛɛ Asa munyu ɔ nɔ, nɛ e tsɔ e tatsɛmɛ ɔmɛ nɛ a ya tua Israel ma amɛ. A ngɔ Iyon, Dan, Abel Bet Maaka, Kinerot, kɛ Naftali zugba amɛ tsuo.

21 Benɛ Matsɛ Baasha nu sane nɛ ba a, e jɔɔ Rama ma a dlami, nɛ e je kɛ ho Tirza ya.

22 Pee se ɔ, Matsɛ Asa ha a fiɛ ngɛ Yuda tsuo ke nɔ tsuaa nɔ nɛ ba, konɛ ma a tsuo ba bua kɛ muɔ tɛhi, kɛ tsohi nɛ Baasha kɛ ba ngɛ Rama mae ɔ kɛ ho. Matsɛ Asa ngɔ ní nɛ ɔmɛ kɛ po Geba ma a ngɛ Benyamin, kɛ Mizpa ma a hulɔ.

23 Asa he sane kpahi nɛ piɛ; kã nɛ e pee, kɛ mahi nɛ e po ɔ, a ngma ngɛ Yuda Matsɛmɛ ɔmɛ a Blema Sanehi Womi ɔ mi. Se e bwɔbwɔɛ si ɔ, e nu nane hiɔ.

24 Asa ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi, nɛ e binyumu Yehoshafat ba ye tsɛ ngɛ e se.

Israel matsɛ, Nadab

25 Yuda matsɛ, Asa yi nɔ jeha nɛ ji enyɔ ɔ, Matsɛ Yeroboam binyumu Nadab ba bɔni tsɛ yemi ngɛ Israel ma a nɔ. E ye matsɛ jeha enyɔ.

26 E ya wo e tsɛ nane, nɛ e pee yayami kɛ si Yawɛ, nɛ e ha Israel hu pee yayami.

27 Ahiya binyumu Baasha nɛ je Isakar wɛtso ɔ mi ɔ so Nadab yi nɔ, nɛ e gbe lɛ ngɛ Filisti bi a ma nɛ a tsɛɛ Gibeton ɔ. Jamɛ a be ɔ, Nadab kɛ e tabo ɔ ho ya sa Gibeton ma a yi.

28 Sane nɛ ɔ ba ngɛ Yuda matsɛ, Asa yi nɔ jeha nɛ ji etɛ ɔ mi; nɛ Baasha ba ye tsɛ ngɛ Israel ngɛ Nadab se.

29 ⓓ Benɛ Baasha bɔni matsɛ yemi pɛ nɛ e gbe nɔ tsuaa nɔ ngɛ Yeroboam we ɔ mi kaa bɔ nɛ Yawɛ de to kɛ gu e tsɔlɔ, gbalɔ Ahiya, Shilo no ɔ nɔ ɔ. A gbe nɔ tsuaa nɔ ngɛ Yeroboam we ɔ mi; nɔ kake po piɛ.

30 A pee nɔ́ nɛ ɔ, ejakaa Yeroboam wo Yawɛ, Israel Mawu ɔ mi mi la; Yeroboam pee yayami kɛ si Yawɛ, nɛ jehanɛ hu, e ha nɛ Israel hu pee yayami.

31 Nadab he sane kpahi nɛ piɛ ɔ, a ngma ngɛ Israel Matsɛmɛ ɔmɛ a Blema Sanehi Womi ɔ mi.

32 Yuda matsɛ, Asa, kɛ Israel matsɛ, Baasha a kpɛti jɔɛ a wami be ɔ tsuo; daa nɛ ɔ, a ngɛ ta nɔ.

Israel matsɛ, Baasha

33 Yuda matsɛ, Asa yi nɔ jeha nɛ ji etɛ ɔ, Ahiya binyumu Baasha ba bɔni tsɛ yemi ngɛ Israel ma a tsuo nɔ. E hi Tirza kɛ ye matsɛ jeha nyingmi enyɔ kɛ eywiɛ.

34 E ya wo e nɛ Yeroboam nane, nɛ e pee yayami kɛ si Yawɛ, nɛ e ha Israel hu pee yayami.