Matsɛmɛ I, 14

Yeroboam binyumu ɔ gbenɔ

1 Jamɛ a be ɔ, Matsɛ Yeroboam binyumu Abiya ba nu hiɔ.

2 Yeroboam de e yo ɔ ke, “Mo tsake o he, nɛ nɔ ko kó le kaa ye yo ji mo, nɛ o ya Shilo, he nɛ gbalɔ Ahiya ngɛ ɔ. Lɛ ji nɔ nɛ de mi be ko ke i ma ba ye tsɛ ngɛ Israel ɔ nɛ.

3 Ngɔɔ abolo mamɛ nyɔngma, kɛ keeki, kɛ hwo tɔ kake kɛ ya ha lɛ, nɛ e ma de mo nɔ nɛ maa pee wa binyumu.”

4 Yeroboam yo ɔ pee kaa bɔ nɛ e huno ɔ de lɛ ɔ, nɛ e ho Abiya we ɔ mi ya ngɛ Shilo. Abiya bwɔ, nɛ e hɛngmɛ yu.

5 Se Yawɛ de lɛ to momo kaa Yeroboam yo ɔ ma nɛ e ba bi lɛ ga womi ngɛ e binyumu ɔ nɛ be he wami ɔ he. Nɛ Yawɛ tsɔɔ Abiya bɔ nɛ e de yo ɔ. Benɛ Yeroboam yo ɔ ba su we ɔ mi ɔ, e buá pee e he kaa nɔ kpa ko.

6 Se benɛ Abiya nu e nane si pɛmi ngɛ sinya a nya kɛ ma a, e de lɛ ke, “Yeroboam yo, moo ba! Mɛni he je o tsake o he kaa nɔ kpa nɛ ɔ? I ngɛ sane yobu ko nɛ ma de mo.

7 Yaa nɛ o ya de Yeroboam ke bɔ nɛ Yawɛ, Israel Mawu ɔ de ji nɛ ɔ nɛ: ‘Imi lɛ i hla mo kɛ je Israel bi ɔmɛ a kpɛti, nɛ i wo mo ye ma, Israel nɔ matsɛ.

8 I kpɔ matsɛ yemi ɔ ngɛ David nina dɛ ngɔ ha mo. Se o be kaa ye tsɔlɔ David. Lɛɛ e nyɛɛ ye se kɛ e tsui tsuo; e ye ye mlaa amɛ a nɔ, nɛ e pee ye suɔmi nya ní.

9 O pee yayami kulaa pe ni nɛmɛ nɛ ye tsɛ kɛ sɛ o hlami ɔ. O kua mi; O ya pee mawu kpa komɛ, nɛ o puɛ amagahi, nɛ o kɛ nɔ́ nɛ ɔ wo ye mi mi la.

10 ⓧ Enɛ ɔ he je ɔ, i kɛ haomi maa ba o we ɔ nɔ, nɛ ma gbe nyumu tsuaa nyumu ngɛ we ɔ mi, nyɔguɛ jio, odehe jio. Ma kpata o we ɔ hɛ mi; a maa bɛɛ mɛ kɛ ho kaa a bɛɛɔ na fi.

11 Ke o he nɔ ko gbo ngɛ ma a mi ɔ, gbehi maa ye lɛ; nɛ ke o he nɔ ko gbo ngɛ nga a nɔ ɔ, lohwe pɛlitsɛmɛ maa ye lɛ. Imi Yawɛ lɛ i de.’ ”

12 Abiya ya nɔ nɛ e de Yeroboam yo ɔ ke, “Lɔ ɔ he ɔ, tee si nɛ o ho we mi ya. Ke o su ma a mi pɛ jokuɛ ɔ ma gbo.

13 Israel ma a tsuo maa nyɛ ya ha lɛ, nɛ a maa pu lɛ. Lɛ pɛ ji Yeroboam we ɔ mi bi nɛ a maa pu lɛ saminya, ejakaa lɛ pɛ ji nɔmlɔ nɛ Yawɛ, Israel Mawu ɔ ná e he tsui ngɛ Yeroboam we ɔ mi.

14 Yawɛ maa wo matsɛ ko ngɛ Israel, nɛ e ma kpata Yeroboam we ɔ hɛ mi.

15 Yawɛ maa gbla Israel tue, nɛ Israel ma mimiɛ kaa ngɔwu ngɛ pa mi. Yawɛ maa hia Israel ma a kɛ je zugba kpakpa nɛ ɔ nɛ e ngɔ kɛ ha a nɛmɛ ɔmɛ ɔ nɔ, nɛ e maa gbɛ mɛ ngɔ fĩa kɛ yaa si Yufrate pa a se. Yawɛ maa pee enɛ ɔ, ejakaa a ya puɛ amagahi ngɔ ha a yo mawu Ashera a, nɛ a kɛ nɔ́ nɛ ɔ wo lɛ, Yawɛ ɔ mi mi la.

16 Yawɛ ma je e nine ngɛ Israel he, ejakaa Yeroboam pee yayami, nɛ e ha nɛ Israel hu ya pee yayami.”

17 Yeroboam yo ɔ kpale e se kɛ ho Tirza ya. Benɛ e sɛ we ɔ mi pɛ kɛkɛ nɛ jokuɛ ɔ gbo.

18 Israel ma a nyɛ ya ha lɛ, nɛ a pu lɛ kaa bɔ nɛ Yawɛ de to kɛ gu e tsɔlɔ, gbalɔ Ahiya nɔ ɔ.

Yeroboam gbenɔ

19 Yeroboam he sane kpahi nɛ piɛ, tahi nɛ e hwu, kɛ bɔ nɛ e ye tsɛ ha a, a ngma ngɛ Israel Matsɛmɛ ɔmɛ a Blema Sanehi Womi ɔ mi.

20 Yeroboam ye matsɛ jeha nyingmi enyɔ kɛ enyɔ. E ba gbo, nɛ a pu lɛ, nɛ e binyumu Nadab ba ye tsɛ ngɛ e se.

Yuda matsɛ, Rehoboam

(<x>140 11:5-12:15</x>)

21 Salomo binyumu Rehoboam ye jeha nyingmi eywiɛ kɛ kake benɛ e bɔni tsɛ yemi ngɛ Yuda ma a nɔ. E hi Yerusalem kɛ ye matsɛ jeha nyɔngma kɛ kpaago. Yerusalem ji ma nɛ Yawɛ hla kɛ je Israel zugba a mi tsuo nɛ e ngɔ kɛ pee he nɛ a ja lɛ ngɛ. Rehoboam nyɛ biɛ ji Naama, nɛ Amon no ji lɛ.

22 Yuda ma a pee yayami kɛ si Yawɛ, nɛ a pee níhi babauu kɛ wo e mi mi la pe bɔ nɛ a nɛmɛ ɔmɛ tsuo pee ɔ po.

23 ⓨ Mɛ hu a po piɛhi, nɛ a puɛ amagahi ngɛ ma a mi, ngɛ yokuhi a nɔ, kɛ tsohi nɛ bɔ kusuu a sisi; amaga amɛ ekomɛ daa si ha a yo mawu ɔ nɛ a tsɛɛ lɛ Ashera a.

24 ⓩ Jehanɛ se hu, ngɛ a jami kusumi komɛ a mi ɔ, nyumu komɛ kɛ a sibi nyumuhi na bɔmi kaa nyumu kɛ yo. Yuda ma a pee zo níhi, kɛ níhi nɛ a hiee po pe níhi nɛ je ma amɛ nɛ Yawɛ fie kɛ je Israel bi ɔmɛ a blɔ nɔ ɔ pee ɔ tsuo pɛpɛɛpɛ.

25 Matsɛ Rehoboam yi nɔ jeha nɛ ji enuɔ ɔ, Egipt matsɛ, Shishak ba tua Yerusalem,

26 ⓐ nɛ e muɔ june níhi nɛ ngɛ Yawɛ we ɔ, kɛ matsɛ we ɔ, kɛ sika tsu tsɛ̃ihi nɛ Salomo pee ɔ kɛ ho.

27 Matsɛ Rehoboam pee akɔblee tsɛ̃ihi kɛ to a nane mi, nɛ e ngɔ mɛ ngɔ wo matsɛ we agbo nya buli ɔmɛ a nyatsɛmɛ ɔmɛ a dɛ.

28 Be tsuaa be nɛ matsɛ ɔ maa ya Yawɛ we ɔ, buli ɔmɛ maa hɛɛ tsɛ̃i ɔmɛ kɛ nyɛɛ e hɛ mi. Lɔ ɔ se ɔ, a maa kpale mɛ ya to buli ɔmɛ a tsu ɔ mi ekohu.

29 Matsɛ Rehoboam he sane kpahi nɛ piɛ ɔ, a ngma ngɛ Yuda Matsɛmɛ ɔmɛ a Blema Sanehi Womi ɔ mi.

30 Rehoboam kɛ Yeroboam kpɛti jɔɛ; daa nɛ ɔ, a ngɛ ta nɔ.

31 Rehoboam ba gbo, nɛ a pu lɛ ngɛ matsɛmɛ ɔmɛ a yɔkɔ ɔ mi ngɛ David ma a mi, nɛ e binyumu Abiya ba ye tsɛ ngɛ e se.