Matsɛmɛ I, 13

1 Ligbi ko ɔ, Yawɛ tsɔ gbalɔ ko kɛ je Yuda kɛ ho Betel ya. Benɛ e ya su lejɛ ɔ, Yeroboam daa si ngɛ bɔ sami la tɛ ɔ he nɛ e yaa sã tsopa kɛ e he via.

2 ⓦ Kɛkɛ nɛ Yawɛ fa gbalɔ ɔ, nɛ e kpa ngmlaa ngɔ wo bɔ sami la tɛ ɔ ke, “Bɔ sami la tɛ! Bɔ sami la tɛ! Bɔ nɛ Yawɛ de ji nɛ ɔ nɛ: a ma fɔ binyumu ko ngɛ David we ɔ mi, nɛ a ma tsɛ e biɛ ke Yosia. E ma ba gbe osɔfo ɔmɛ nɛ a ngɛ tsopa kɛ e he via sãe ngɛ o nɔ ɔ, nɛ e maa sã nimlihi a wuhi ngɛ o nɔ.”

3 Gbalɔ ɔ ya nɔ nɛ e de ke, “Bɔ sami la tɛ nɛ ɔ mi ma gba enyɔ, nɛ e mi la zu ɔ ma kpa pue si. Nɛ enɛ ɔ maa pee okadi nɛ o kɛ maa na kaa Yawɛ lɛ tu munyu kɛ gu ye nɔ.”

4 Benɛ Yeroboam nu ngmlaa a nɛ gbalɔ ɔ kpa ngɔ wo bɔ sami la tɛ ɔ, e wo e nine nɔ ngɛ bɔ sami la tɛ ɔ he, nɛ e fa ke, “Nyɛɛ nu lɛ!” Amlɔ ɔ, nine ɔ nɛ matsɛ ɔ wo nɔ kɛ tsɔɔ gbalɔ ɔ wlua, nɛ e nyɛ we nɛ e ba lɛ si hu.

5 Kɛkɛ nɛ bɔ sami la tɛ ɔ mi gba enyɔ, nɛ e mi la zu ɔ kpa pue si kaa bɔ nɛ gbalɔ ɔ de ke e maa ba mi ɔ. Enɛ ɔ ji okadi nɛ gbalɔ ɔ to nɛ tsɔɔ kaa Yawɛ lɛ tu munyu kɛ gu e nɔ ɔ nɛ.

6 Matsɛ Yeroboam de gbalɔ ɔ ke, “I kpa mo pɛɛ, moo fa kue ha Yawɛ, o Mawu ɔ, nɛ e tsa ye nine ɔ ha mi.” Gbalɔ ɔ fa kue ha Yawɛ, nɛ Yawɛ tsa matsɛ ɔ nine ɔ; nɛ nine ɔ pee kaa bɔ nɛ e ngɛ sa a.

7 Enɛ ɔ se ɔ, matsɛ ɔ de gbalɔ ɔ ke, “Ha waa ho we mi ya nɛ o ya wo o nya mi nɔ́ ko. Ma wo mo nɔ́ nɛ o pee ha mi nɛ ɔ he hiɔ.”

8 Gbalɔ ɔ de matsɛ ɔ ke, “Ke o ha mi o we ɔ fa tete po, i kɛ mo be yae; i be nɔ́ ko yee, nɛ nyu tete po i be nue ngɛ hiɛ ɔ.

9 Yawɛ wo mi mlaa ke ma ko ye ní, nɛ ma ko nu nyu. Jehanɛ se hu, blɔ nɛ i gu nɔ kɛ ba hiɛmɛ nɛ ɔ, e ke ma ko kpale ya gu nɔ kɛ ho.”

10 Lɔ ɔ he ɔ, blɔ ɔ nɛ gbalɔ ɔ gu nɔ kɛ ba Betel ɔ, e kpale we ya gui nɔ; mohu ɔ, e ya gu blɔ kpa kɛ ho.

Gbalɔ nɔmoyo ɔ nɛ je Betel ɔ

11 Jamɛ a be ɔ, gbalɔ nɔmoyo ko ngɛ Betel. E binyumu ɔmɛ ya bɔ lɛ nɔ́ nɛ gbalɔ ɔ nɛ je Yuda a ba pee ngɛ Betel jamɛ a ligbi ɔ, kɛ munyuhi nɛ e kɛ Matsɛ Yeroboam ba tu ɔ.

12 A tsɛ ɔ bi mɛ ke, “Jije e gu kɛ ho?” A tsɔɔ lɛ blɔ ɔ,

13 nɛ e de mɛ ke a mia e teji ɔ ha lɛ. A pee ja, nɛ e kuɔ teji ɔ

14 kɛ nyɛɛ gbalɔ ɔ nɛ je Yuda a se kɛ ya si e ya na lɛ nɛ e hii si ngɛ tso agbo ko sisi. Gbalɔ nɛ je Betel ɔ bi lɛ ke, “Anɛ mo ji gbalɔ ɔ nɛ je Yuda a lo?” E he nɔ ke, “Ee, imi.”

15 Gbalɔ nɛ je Betel ɔ de lɛ ke, “Ha waa ho we mi ya nɛ o ya wo o nya mi nɔ́ ko.”

16 Se gbalɔ nɛ je Yuda a he nɔ ke, “I be nyɛe ma kpale ye se nɛ i kɛ mo nɛ ya. I kɛ mo be ní yee, nɛ nyu hu i be nue ngɛ hiɛ ɔ,

17 ejakaa Yawɛ wo mi mlaa ke ma ko ye nɔ́ ko, nɛ ma ko nu nyu hulɔ. Jehanɛ se hu, blɔ nɛ i gu nɔ kɛ ba hiɛmɛ nɛ ɔ, Yawɛ ke ma ko kpale ya gu nɔ kɛ ho.”

18 Gbalɔ nɔmoyo ɔ nɛ je Betel ɔ de lɛ ke, “Imi hu gbalɔ ji mi kaa mo. Yawɛ fa bɔfo ko ke e ba de mi ke ma ba ngɔ mo kɛ ba we mi nɛ o ba ye ní, nɛ o nu nyu.” Se gbalɔ nɔmoyo ɔ sisi lɛ.

19 Kɛkɛ nɛ gbalɔ nɛ je Yuda a, kɛ gbalɔ nɔmoyo ɔ kpale kɛ ho we mi ya, nɛ e ya ye ní, nɛ e nu nyu ngɛ lejɛ ɔ.

20 Benɛ a hii si ngɛ okplɔɔ ɔ he ɔ, Yawɛ kɛ gbalɔ nɔmoyo ɔ tu munyu,

21 nɛ e kpa ngmlaa nɛ e de gbalɔ nɛ je Yuda a ke, “Yawɛ ke ma de mo ke o gbo tue, nɛ o yi mlaa nɛ e wo mo ɔ nɔ.

22 He nɛ Yawɛ de mo ke o ko ya ye ní, nɛ o nu nyu hu ngɛ ɔ, o kpale o se ya ye ní, nɛ o nu nyu ngɛ lejɛ ɔ. Enɛ ɔ he je ɔ, o ma gbo, nɛ a be mo pue ngɛ o weku li a yɔkɔ mi.”

23 Benɛ a ye ní ɔ ta a, gbalɔ nɔmoyo ɔ mia teji ɔ ha gbalɔ nɛ je Yuda a,

24 nɛ e kuɔ. Benɛ e ngɛ blɔ ɔ nɔ kɛ yaa a, e kɛ jata ya kpe, nɛ jata a gbe lɛ. E gbogboe ɔ tlɔ blɔ ɔ mi ngɛ lejɛ ɔ, nɛ teji ɔ kɛ jata a daa si ngɛ he.

25 Ni komɛ ba be ngɛ lejɛ ɔ, nɛ a na gbogboe ɔ ngɛ blɔ ɔ mi nɛ jata a daa si ngɛ he. Nɛ a ho ya sɛɛ ní nɛ ɔ ngɛ Betel, he nɛ gbalɔ nɔmoyo ɔ ngɛ ɔ.

26 Benɛ gbalɔ nɔmoyo ɔ nu sane nɛ ɔ, e de ke, “Gbalɔ ɔ nɛ gbo Yawɛ fami ɔ tue ɔ, lɛ! Lɛɛ enɛ ɔ he ɔ, Yawɛ je lɛ ngɔ wo jata a dɛ mi, nɛ e tsɔtslɔɔ e mi kaa bɔ nɛ Yawɛ de to ke e maa pee ɔ.”

27 Lɔ ɔ se ɔ, e de e binyumu ɔmɛ ke, “Nyɛɛ mia ye teji ɔ ha mi.” A pee ja,

28 nɛ e kuɔ teji ɔ kɛ ho. E ya na gbalɔ kaketsɛ ɔ gbogboe ɔ nɛ fɔɔ si ngɛ blɔ ɔ nɔ nɛ teji ɔ kɛ jata a daa si ngɛ he kɛ mwɔɔ. Jata a yi nɔ gbogboe ɔ, nɛ e tsɔtslɔɔ we teji ɔ mi hulɔ.

29 Gbalɔ nɔmoyo ɔ wo nɔ gbogboe ɔ ngɔ fɔ teji ɔ nɔ, nɛ e kɛ lɛ kpale kɛ ba Betel ba nyɛ ya ha lɛ; nɛ e pu lɛ.

30 E pu lɛ ngɛ lɛ nitsɛ e yɔkɔ mi, nɛ e kɛ e binyumu ɔmɛ ye lɛ kɔmɔ ke, “Ye nyɛmi, due! Ye nyɛmi, due!”

31 Benɛ a dla lɛ se ɔ, gbalɔ nɔmoyo ɔ de e binyumu ɔmɛ ke, “Ke i gbo ɔ, nyɛɛ pu mi ngɛ yɔkɔ nɛ ɔ mi ngɛ gbalɔ nɛ ɔ kasa nya.

32 Munyuhi tsuo nɛ Yawɛ fa lɛ nɛ e tu kɛ si bɔ sami la tɛ nɛ ngɛ Betel ɔ, kɛ jami he ɔmɛ tsuo nɛ ngɛ Samaria ma amɛ a mi ɔ, bɔ tsuaa bɔ nɛ pee ɔ, munyu ɔmɛ maa ba mi.”

Yeroboam he yayami ɔ wo wu

33 Ní nɛ ɔmɛ kulaa a se ɔ, Matsɛ Yeroboam kpale we kɛ ji e blɔ yayami ɔmɛ a nɔ; se mohu e hlaa nihi kɛ jeɔ ma a mi he tsuaa he, nɛ e woɔ mɛ osɔfohi kɛ haa ní tsumi ngɛ jami he ɔmɛ. Nɔ tsuaa nɔ nɛ suɔ kaa e maa ye osɔfo ɔ, kɛkɛ Yeroboam wo lɛ osɔfo.

34 Yayami nɛ ɔ nɛ Yeroboam pee ɔ, ha e matsɛ yemi ɔ, kɛ e we ɔ tsuo a hɛ mi kpata.