Matsɛmɛ I, 12

Omleyi je wɛtso ɔmɛ tsɔ atuã

(<x>140 10:1-19</x>)

1 Rehoboam pue nɔ kɛ ho Shekem ya, ejakaa Israel omleyi je ma kpekpemi ɔ tsuo ya bua a he nya ngɛ lejɛ ɔ nɛ a wo lɛ matsɛ.

2 Benɛ Nebat binyumu Yeroboam nɛ tu fo kɛ je Matsɛ Salomo nya, nɛ e ya laa e he ngɛ Egipt ɔ nu nɔ́ nɛ ɔ he ɔ, e kpale kɛ ba we.

3 Ma a tsɔ ya kpee lɛ kɛ ba, nɛ e kɛ mɛ tsuo ho ya na Rehoboam, nɛ a de lɛ ke,

4 “O tsɛ Salomo wa wɔ yi mi wawɛɛ nitsɛ; tlomi nɛ e ngɔ kɛ tloo wɔ ɔ jiɔ tsɔ. Ke o ma ha nɛ wa tlomi ɔ nɔ ma gbɔ bɔɔ, nɛ́ wa he mi maa jɔ wɔ ɔ, lɛɛ wa ma sɔmɔ mo.”

5 Rehoboam he nɔ ke, “Nyɛɛ ya lolo, nɛ́ hiɛmɛ nɛ ɔ ligbi etɛ ɔ, nyɛɛ kpale kɛ ba.”

6 Kɛkɛ nɛ Matsɛ Rehoboam ya bi nikɔtɔma komɛ ga womi; nimli nɛ ɔmɛ ji ni nɛmɛ nɛ a kɛ e tsɛ Salomo hi si, nɛ a woɔ lɛ ga benɛ e ngɛ je mi ɔ. Rehoboam bi mɛ ke, “Mɛni heto po ma ya ha ma nɛ ɔ?”

7 A he nɔ ke, “Ke o ma ha ma nɛ ɔ a ní bimi ɔ heto kɛ gbi nɛ he jɔ, nɛ o maa kplɛɛ kaa o maa hɛɛ mɛ saminya a, a ma sɔmɔ mo daa.”

8 Se Rehoboam ngɔɛ ga nɛ nikɔtɔma amɛ wo lɛ ɔ, nɛ e ho ya bi e juã nihewi nɛ e kɛ mɛ je nɔ ɔ mohu ga womi ke,

9 “Nimli nɛ ɔmɛ nɛ ba de mi ke ma ha nɛ a tlomi ɔ nɔ nɛ gbɔ bɔɔ ha mɛ ɔ, mɛni heto ma ya ha mɛ?”

10 Nihewi ɔmɛ de lɛ ke, “Bɔ nɛ o ma de mɛ ji nɛ ɔ nɛ: ‘Ye sekpɛ nguɛ kle pe tsaatsɛ mlɛ mi.

11 Tsaatsɛ ngɔ tlomi nɛ jiɔ ngɔ tloo nyɛ; imi lɛɛ i kɛ tlomi ɔ eko maa piɛ he ha nyɛ. Tsaatsɛ ngɔ kpa gu kɛ fia nyɛ; imi lɛɛ i kɛ okpɔngɔ kpa maa fia nyɛ!’ ”

12 Ligbi etɛ se ɔ, Yeroboam kɛ ma a tsuo kpale ba matsɛ Rehoboam ngɔ kaa bɔ nɛ matsɛ ɔ de mɛ ke a pee ɔ.

13 Rehoboam kua nikɔtɔma amɛ a ga womi ɔ, nɛ e kɛ ma a tu munyu basabasa

14 kaa bɔ nɛ nihewi ɔmɛ wo lɛ ga ke e pee ɔ. E de mɛ ke, “Tsaatsɛ ngɔ tlomi nɛ jiɔ ngɔ tloo nyɛ, se imi lɛɛ i kɛ tlomi ɔ eko maa piɛ he ha nyɛ. Tsaatsɛ kɛ kpa gu fia nyɛ, se imi lɛɛ i kɛ okpɔngɔ kpa maa fia nyɛ!”

15 Matsɛ Rehoboam bui ma a tue fɛɛ! Se nɔ́ nɛ ɔ, Yawɛ he ngɛ mi; Yawɛ lɛ ha nɛ matsɛ ɔ pee ja, bɔ nɛ pee nɛ si nɛ lɛ Yawɛ, ɔ Nebat binyumu Yeroboam kɛ gu gbalɔ Ahiya nɛ je Shilo ɔ nɔ ɔ nɛ ba mi.

16 ⓣ Benɛ Israel ma a tsuo na kaa matsɛ ɔ bui mɛ tue ɔ, a de ke, “Mɛni blɔ nya wa ngɛ ngɛ David ngɔ? Wa be gbosi ní ngɛ Ishai binyumu ɔ ngɔ. Israel ma! Nɔ tsuaa nɔ nɛ pue lɛ nitsɛ e we mi blɔ! Nyɛ ha Rehoboam nɛ ya ye tsɛ ngɛ David we ɔ nɔ!” Kɛkɛ nɛ Israel ma a tsɔ atuã,

17 nɛ Rehoboam ye tsɛ ngɛ Israel bi nɛ ngɛ Yuda zugba a mi pɛ a nɔ.

18 Pee se ɔ, Matsɛ Rehoboam tsɔ Adoniram Israel bi ɔmɛ a ngɔ. Adoniram ji nɔ nɛ hyɛɛ nihi nɛ a nyɛɔ a nɔ kɛ tsuɔ ma ní tsumi kpakpataa a a nɔ ɔ nɛ. Se Israel ma a tsuo fia lɛ tɛ nɛ a gbe lɛ. Rehoboam he esɔ kɛ ya sɛ e ta zugba lɛ ɔ mi nɛ e tu fo kɛ ho Yerusalem ya.

19 Enɛ ɔ he je ɔ, Israel omleyi je ma a tsɔ atuã kɛ je David we ɔ he kɛ je jamɛ a be ɔ kɛ ba si mwɔnɛ nɛ ɔ.

20 Benɛ Israel tsuo nu kaa Yeroboam je Egipt kɛ ba a, a tsɔ ya kpee lɛ kɛ ba ma a hɛ mi, nɛ a wo lɛ Israel matsɛ. Yuda wɛtso ɔ pɛ ji ni nɛmɛ nɛ ngɔ a hɛ ngɔ fɔ David we ɔ nɔ kaa loloolo ɔ, mɛ ji matsɛmɛ.

Gbalɔ Shemaya

(<x>140 11:1-4</x>)

21 Benɛ Rehoboam ya su Yerusalem ɔ, e hla ta buli nɛ a kɔni si wa 180,000 kɛ je Yuda, kɛ Benyamin wɛtso ɔmɛ a mi. E to kaa e kɛ Israel we ɔ ma ya hwu, konɛ e kpɔ matsɛ yemi ɔ kɛ ba je e sisi ekohu.

22 Se Mawu ngɔ sɛ gbi nɛ ɔ ngɔ ha gbalɔ Shemaya ke,

23 “De Yuda matsɛ, Rehoboam, Salomo binyumu ɔ, Yuda wɛtso ɔ, Benyamin wɛtso ɔ, kɛ ma a nɛ piɛ ɔ ke,

24 ‘Bɔ nɛ Yawɛ de ji nɛ ɔ nɛ: nyɛɛ kɛ nyɛ nyɛmimɛ Israel bi ɔmɛ ko hwu ta. Nɔ tsuaa nɔ nɛ kpale kɛ ho e we mi ya; ejakaa nɔ nɛ ba nɛ ɔ, ye he ngɛ mi.’ ” A bu Yawɛ tue, nɛ a kpale kɛ ho a wehi a mi ya kaa bɔ nɛ Yawɛ fa mɛ ɔ.

Yeroboam je Yawɛ se

25 Matsɛ Yeroboam ya po ma ngɛ Shekem ngɛ Efraim yo ɔmɛ a nɔ, nɛ e hi lejɛ ɔ. Pee se ɔ, e je ya po ma ngɛ Penuel.

26 Yeroboam de ngɛ e yi mi ke, “Bɔ nɛ níhi ngɛ nɛ ɔ, ke e ba mi kaa ma nɛ ɔ ho ya sã bɔ ngɛ Yawɛ we ɔ mi ngɛ Yerusalem ɔ, a yi mi ma plɛ; a maa kpale ya sɔmɔ a nyɔmtsɛ nɛ ji Yuda matsɛ, Rehoboam ekohu, nɛ a maa gbe mi.”

27

28 ⓤ Matsɛ Yeroboam susu nɔ́ nɛ ɔ he saminya. Lɔ ɔ se ɔ, e kɛ sika tsu puɛ na bi enyɔ, nɛ e de ma a ke, “Bɔ nɛ nyɛ nyɛɛ kɛ ya Yerusalem ɔ ba hiɛ! Israel ma, nyɛ mawu ɔmɛ nɛ je nyɛ kɛ je Egipt zugba a nɔ ɔ, mɛ ji nɛ ɔmɛ nɛ!”

29 Yeroboam ngɔ sika tsu na bi kake ya ma Betel, nɛ e ngɔ kake hu ya ma Dan.

30 Nɔ́ nɛ ɔ ha nɛ ma a pee yayami; ejakaa a yaa Betel kɛ Dan ya jaa sika tsu na bi ɔmɛ.

31 Jehanɛ, Yeroboam ma jami hehi ngɛ yoku ɔmɛ a nɔ. E hla ma a mi nimli saisaa nɛ e wo mɛ osɔfo; nihi nɛ ji Levi wɛtso ɔ mi po, e wo mɛ osɔfo.

32 ⓥ Jehanɛ, Yeroboam ngɔ nyɔhiɔ kpaanyɔne ɔ we ligbi nɛ ji nyɔngma kɛ enuɔ ɔ ngɔ pee nyami ligbi kaa bɔ nɛ e ngɛ ngɛ Yuda a. E ya sãã bɔ ngɛ bɔ sami la tɛ ɔ nɔ ngɛ Betel kɛ haa sika tsu na bi ɔmɛ nɛ e puɛ ɔ. E ngɔ osɔfo ɔmɛ hu ya to jami he ɔmɛ nɛ e ma ngɛ Betel ɔ.

33 Nyɔhiɔ kpaanyɔne ɔ we ligbi nyɔngma kɛ enuɔ ɔ, Yeroboam yaa Betel ya sãã tsopa kɛ e he via ngɛ bɔ sami la tɛ nɛ e puɛ ɔ nɔ. Kikɛmɛ a ligbi nɛ ɔ ji ligbi nɛ lɛ nitsɛ e ngɔ kɛ pee nyami ligbi ha Israel ma a.