Samuel II, 7

Natan kɛ sɛ gbi ba ha David

(<x>130 17:1-15</x>)

1 Benɛ Matsɛ David ba ngɛ e we ɔ mi, nɛ Yawɛ ha he jɔmi ba zugba a nɔ, nɛ David kɛ e he nyɛli nɛ bɔle lɛ kɛ kpe ɔ jɔɔ ta hwumi ɔ,

2 David de gbalɔ Natan ke, “Hyɛ kaa imi lɛɛ i ngɛ we nɛ a ma kɛ seda mi, be mi nɛ Mawu somi daka a lɛɛ bo tsu mi lɛ e ngɛ!”

3 Natan de matsɛ ɔ ke, “Nɔ́ tsuaa nɔ́ nɛ o to kaa o maa pee ɔ, moo pee; ejakaa Yawɛ kɛ mo ngɛ.”

4 Se jamɛ a nyɔ ɔ mi ɔ, Yawɛ de Natan ke,

5 “Yaa nɛ o ya de ye tsɔlɔ David ke Yawɛ ke, ‘Pi mo nɛ o maa po we ha mi nɛ ma hi mi.

6 Kɛ je ligbi nɛ i ya kpɔ Israel ma a kɛ je Egipt kɛ ba si mwɔnɛ ligbi nɛ ɔ, i hí we ko mi hyɛ; bo tsu ji we nɛ i hii mi.

7 Ngɛ hehi tsuo nɛ i kɛ Israel bi ɔmɛ ya gu ɔ, Israel hɛ mi nyɛɛli nɛ i hia ke a hɛɛ ye ma Israel kaa bɔ nɛ to hyɛlɔ hyɛɛ e tohi ɔ, anɛ i bi a ti nɔ ko hyɛ ke mɛni he je e kɛ seda ma we tsu ha mi lo?’

8 “Lɔ ɔ he ɔ, mo de ye tsɔlɔ David ke, imi Yawɛ Tabohiatsɛ ɔ, i ngɛ lɛ dee ke, ‘Imi nɛ i ya ngɔ mo kɛ je lohwe lɛmi he, kɛ je tohi a se, konɛ o ba ye ganɔ ngɛ ye ma, Israel nɔ.

9 Imi lɛ i kɛ mo nyɛɛ kɛ ya kɛ ba; nɛ imi nɔuu lɛ i kpata o he nyɛli ɔmɛ tsuo a hɛ mi ngɛ o blɔ ɔ nɔ. Ma ha nɛ o ma na biɛ kaa nimli nguahi nɛ ngɛ zugba a nɔ ɔ a ti nɔ ko.

10 I hla hi he ko ha ye ma Israel, nɛ i to mɛ si ngɛ lejɛ ɔ, he nɛ nɔ ko be a nya dooe ngɛ hu. Kɛ je benɛ a ba zugba nɛ ɔ nɔ ɔ, be nɛ manyadali lɛ ngɛ a nɔ yee ɔ, nɔ́ sɔuu nɛ ye ma a ngɛ nae ngɛ nimli yayamihi a dɛ mi. Se enɛ ɔ tsuo se maa po. I ngɛ si woe kaa ma ha o maa ye o he kɛ je o he nyɛli ɔmɛ tsuo a dɛ mi; nɛ o bimɛ ma ba ye zugba nɛ ɔ nɔ.

11

12 ⓞ Ke o gbo, nɛ a ya dla mo ngɛ o nɛmɛ ɔmɛ a hwɔ he ɔ, ma tle nɔ ko si ngɛ o se, nɛ ji mo nitsɛ o mi mi bi; nɛ ma to e matsɛ yemi ɔ sisi.

13 Lɛ ji nɔ nɛ ma ba po we kɛ wo ye biɛ ɔ hɛ mi nyami; nɛ ma ha e matsɛ yemi ɔ maa hi si kɛ maa ya neneene.

14 ⓟ Ma pee e tsɛ, nɛ e maa pee ye bi. Ke e pee nɔ́ nɛ dɛ ɔ, ma gbla e tue kaa bɔ nɛ tsɛ gblaa e bi tue ɔ.

15 Se ye suɔmi kɛ mɔbɔ nami ɔ lɛɛ i be jee ngɛ e nɔ gblegbleegble. I be lɛ pee kaa bɔ nɛ i pee Saul, nɔ nɛ i je kɛ je o blɔ mi nɛ o ba ye matsɛ ɔ.

16 ⓠ O nina maa hiɛ, nɛ ma ha o matsɛ yemi ɔ maa hi si kɛ maa ya neneene; o matsɛ yemi ɔ se be poe gblegbleegble.’ ”

17 Natan ya bɔ David nɔ́ tsuaa nɔ́ nɛ Mawu je ngɔ tsɔɔ lɛ ɔ.

David sina sɔlemi

(<x>130 17:16-27</x>)

18 Enɛ ɔ se ɔ, Matsɛ David ya sɛ bo tsu ɔ mi, nɛ e ya hi si ngɛ Yawɛ hɛ mi, nɛ e de ke, “Nyɔmtsɛ Yawɛ, mɛnɔ ji mi, nɛ ye we ɔ hu mɛnɔmɛ ji mɛ loko o hɛɛ mi kɛ ba su he nɛ i ngɛ nɛ ɔ?

19 Se Nyɔmtsɛ Yawɛ, enɛ ɔ lɛɛ e ji nɔ́ ko bɔbɔyoo kɛkɛ ngɛ o hɛ mi. O wo si hu kaa o tsɔlɔ ɔ nina maa hiɛ babauu hwɔɔ se. Nyɔmtsɛ Yawɛ, o je nɔ́ nɛ ɔ ngɔ tsɔɔ nɔmlɔ adesa!

20 Lɛɛ mɛni pa ngɛ imi David, ye nya nɛ ma de mo? Nyɔmtsɛ Yawɛ, o le imi o tsɔlɔ ɔ saminya!

21 O ngɛ ní nguangua nɛ ɔmɛ tsuo pee nɛ ma kɛ le kaa o wo si ko, nɛ o suɔ kaa o maa pee nɔ́ nɛ ɔ.

22 Yawɛ Mawu lee, o kle agbo! Nɔ ko nɔ ko be nɛ ngɛ kaa mo; níhi nɛ wa nu ɔ tsɔɔ kaa mo pɛ ji Mawu.

23 ⓡ Ma kpa ko be zugba nɛ ɔ nɔ nɛ pe o ma Israel nɛ mo Mawu o ya kpɔ kɛ je nyɔguɛ si himi mi kɛ ba pee mo nitsɛ o ma a. Ní nguangua, kɛ nyakpɛ níhi nɛ o tsu ha o ma a, ha o biɛ pɛ kɛ kpe je ɔ mi tsuo. Benɛ o ma a nɛ o kpɔ kɛ je Egipt ɔ hia kɛ ma a, o fie je ma kpa amɛ, kɛ a mawu ɔmɛ kɛ je a blɔ mi.

24 O to o ma Israel sisi, nɛ o ngɔ lɛ ngɔ pee mo nitsɛ o ma kɛ yaa neneene. Nɛ mo, Yawɛ o ba pee a Mawu.

25 “Lɔ ɔ he ɔ, Yawɛ Mawu, si nɛ o wo nɛ kɔɔ o tsɔlɔ, kɛ e nina a he ɔ, moo ye nɔ daa, nɛ o pee kaa bɔ nɛ o de ɔ.

26 O biɛ maa jije kɛ maa ya neneene, nɛ nihi ma de ke, Yawɛ Tabohiatsɛ ɔ ji Israel Mawu. Nɛ o ma ha imi, o tsɔlɔ David, ye matsɛ yemi ɔ maa hi si kɛ maa ya neneene.

27 Yawɛ Tabohiatsɛ Israel Mawu! O je tsɔɔ o tsɔlɔ ɔ kaa e matsɛ yemi ɔ se be poe gblegbleegble; lɔ ɔ he nɛ o tsɔlɔ ɔ nɔ gbagba te, nɛ e ngɛ kue nɛ ɔ fae ha mo ɔ nɛ.

28 “Nyɔmtsɛ Yawɛ, mo ji Mawu, nɛ o yeɔ o siwohi a nɔ daa. Mo ji nɔ nɛ wo mi si kpakpa nɛ ɔ nɛ.

29 Lɔ ɔ he ɔ, i kpa mo pɛɛ nɛ o ya nɔ nɛ o gbaa imi, o tsɔlɔ ɔ, ye nina daa. Mo Nyɔmtsɛ Yawɛ lɛ o wo si; lɔ ɔ he ɔ, o gbaami maa hi imi, o tsɔlɔ ɔ, ye nina nɔ kɛ maa ya neneene.”