Samuel II, 6

David ngɔ Yawɛ somi daka a kɛ ba Yerusalem

(<x>130 13:1-14</x>; <x>130 15:25-16:6</x>, <x>130 16:43</x>)

1 David bua Israel ta buli kpakpa amɛ tsuo a nya ekohu; a hiɛmi ji akpe nyingmi etɛ.

2 ⓚ E kɛ mɛ tsuo ho Baala ya ngɛ Yuda, konɛ a ya ngɔ Mawu somi daka a ngɛ lejɛ ɔ kɛ ba. Somi daka nɛ ɔ, a kɛ Yawɛ Tabohiatsɛ ɔ nɛ ngɛ tsɛ yee ngɛ kerub ɔmɛ a nɔ ɔ biɛ tsɛɔ lɛ.

3 ⓛ A ya ngɔ somi daka a ngɛ Abinadab we ɔ mi ngɛ yoku ɔ nɔ, nɛ a kɛ ma tlɔɔke he mi. Abinadab binyumuhi Uza, kɛ Ahio ji ni nɛmɛ nɛ ngɛ tlɔɔke ɔ nɛ Mawu daka a ngɛ mi ɔ blɔ tsɔɔe;

4 nɛ Ahio nyɛɛ daka a hɛ mi.

5 Jamɛ a be ɔ, David kɛ Israel bi ɔmɛ tsuo ngɛ lae nɛ a ngɛ doe kɛ a he wami tsuo kɛ ngɛ Yawɛ hɛ mi nyami woe. A fiɛ do, nɛ a fia kpa saku slɔɔtohi, kɛ ngmlɛhi, kɛ gɔgɔhi.

6 Benɛ a su Nakon ngma gbeemi he ɔ, na amɛ nɛ ngɛ tlɔɔke ɔ gblae ɔ a nanehi tɛ si, nɛ daka a mimiɛ. Lɔ ɔ he ɔ, Uza nu daka a ngɔ da si.

7 Se Yawɛ Mawu mi mi fu Uza, nɛ e fia lɛ nɔ́ nɛ e gbe ngɛ lejɛ ɔ, ejakaa e nine ta daka a he.

8 E dɔ David kaa Yawɛ ngɔ abofu kɛ gbla Uza tue. Lɔ ɔ he ɔ, a wo lejɛ ɔ biɛ ke Perez Uza,[2] nɛ jã a tsɛɛ lɛ kɛ ba si mwɔnɛ ɔ.

9 David ye Yawɛ gbeye jamɛ a ligbi ɔ, nɛ e bi ke, “Lɛɛ kɛ ma pee kɛ ngɔ somi daka a kɛ ya we mi kɛɛ?”

10 Enɛ ɔ he je ɔ, David to e yi mi kaa e kɛ Yawɛ daka a be Yerusalem yae hu. Kɛkɛ nɛ e gba kɛ je blɔ ɔ nɔ nɛ e kɛ daka a ho Obed Edom nɛ je Gat ɔ we mi ya.

11 ⓜ Yawɛ daka a hi Obed Edom we ɔ mi nyɔhiɔ etɛ; nɛ Yawɛ gbaa Obed Edom, kɛ e we ɔ tsuo.

12 Benɛ Matsɛ David nu kaa Mawu daka a he je ɔ, Yawɛ gbaa Obed Edom kɛ e we ɔ, kɛ e nɔ́ tsuaa nɔ́ nɛ e ngɛ ɔ, David ho nɛ e ya ngɔ Mawu daka a ngɛ Obed Edom we ɔ mi, nɛ e kɛ daka a ba Yerusalem kɛ nyami.

13 Benɛ ni ɔmɛ nɛ hɛɛ Yawɛ daka a hia nane ekpa a, David ha nɛ a wa, nɛ e gbe na kɛ to nɛ wo zɔ nɛ e kɛ sã bɔ ha Yawɛ.

14 David wo kploba efɔd, nɛ e do kɛ e he wami tsuo kɛ wo Yawɛ hɛ mi nyami.

15 David kɛ Israel tsuo ngɔ Yawɛ daka a kɛ ba kɛ lele hwɔmi kɛ koli kpami.

16 Benɛ daka a ba su David ma a mi ɔ, Mikal, Saul biyo ɔ je e hɛ mi kpo ngɛ saflɛ mi nɛ e na Matsɛ David nɛ e ngɛ tuue nɛ e ngɛ doe kɛ ngɛ Yawɛ hɛ mi nyami woe; nɛ David he pee lɛ tai.

17 A ngɔ Yawɛ daka a ya ma e ma he ngɛ bo tsu nɛ David pee kɛ ha lɛ ɔ mi, nɛ David sã sami bɔhi, kɛ tue mi jɔmi bɔhi kɛ ha Yawɛ.

18 Benɛ David sã bɔ ɔmɛ gbe nya a, e gbaa ma a ngɛ Yawɛ Ope ɔ biɛ mi.

19 ⓝ David dla niye ní ha Israel ma kpekpemi ɔ, nyumuhi kɛ yihi tsuo. Nɔ tsuaa nɔ ná abolo bɔbɔɛ kake, kɛ lo nɛ a sã kpɔ kake, kɛ wai yiblii gbigbli nɛ a kɛ si tatale. Lɔ ɔ se ɔ, a je kɛ ho a wehi a mi ya.

20 Benɛ David ba su we mi, nɛ e ba fɔ e yi ɔmɛ, kɛ e bimɛ ɔmɛ ɔ, Saul biyo Mikal je kpo ba kpee lɛ; nɛ e de David ke, “Lɔ ɔ ji Israel matsɛ wo lɛ nitsɛ e hɛ mi nyami mwɔnɛ ɔ nɛ! Matsɛ hɛɛ e he gu ngɛ e tsɔli a mawayi ɔmɛ a hɛ mi kaa kuasia peeɔ nɔ!”

21 David he nɔ ke, “I do kɛ wo Yawɛ hɛ mi nyami. Lɛ nɛ e hla mi ngɛ o tsɛ kɛ e weku kɛ nina nane mi, nɛ e wo mi ganɔ kɛ ha Israel ma a. Ee, ma do kɛ wo Yawɛ hɛ mi nyami daa,

22 nɛ ye hɛ mi ma pue si pe kikɛ nɛ ɔ po. E maa pee mo kaa pi nɔ ko ji mi; se mawayi ɔmɛ nɛ o tu a he munyu ɔ, mɛɛ lɛɛ a maa bu mi saminya.”

23 Saul biyo Mikal fɔ we kɛ ya si e gbenɔ ligbi.