Samuel II, 8

David ye kunimi ngɛ ta mi

(<x>130 18:1-17</x>)

1 Enɛ ɔ se ɔ, David ya tua Filisti bi ɔmɛ ekohu, nɛ e ye a nɔ. E ngɔ a ma nguaa pe kulaa nɛ a tsɛɛ Gat ɔ.

2 E ya tua Moab bi ɔmɛ hulɔ nɛ e ye a nɔ. E ha nɛ ni ɔmɛ hwɔ si ngɛ zugba, nɛ e gba a mi etɛɛtɛ. Ni etɛ tsuaa ni etɛ mi ɔ, e gbe ni enyɔ, nɛ e kɛ nɔ kake he ke lɛ. Lɔ ɔ he ɔ, Moab bi ɔmɛ ba pee David sɔmɔli, nɛ a tsuɔ tó kɛ haa lɛ.

3 Jehanɛ se, David ya ye Rehob binyumu Hadadezer, nɛ ji Zoba matsɛ ɔ nɔ kunimi. Jamɛ a be ɔ, Hadadezer ngɛ blɔ nɔ kɛ yaa, konɛ e ya kpɔ e zugba a nɛ ngɛ Yufrate pa a he ɔ ekohu.

4 David nuu Hadadezer okpɔngɔ ta buli akpe kɛ e nya lafa kpaago, kɛ ta buli nɛ nyɛɛɔ nane akpe nyingmi enyɔ. David poo okpɔngɔ ɔmɛ tsuo a nane se pani, nɛ e si ta zugba lɛ lafa nya okpɔngɔhi pɛ.

5 Benɛ Siria bi ɔmɛ nɛ ngɛ Damasko ɔ ya konɛ a ya je ngmlaa ha Zoba matsɛ, Hadadezer ɔ, David gbe a kpɛti nimli akpe nyingmi enyɔ kɛ enyɔ.

6 David to tabohi a hi hehi ngɛ Damasko; nɛ Siria bi ɔmɛ ba plɛ pee David sɔmɔli, nɛ a tsuɔ tó kɛ haa lɛ. Yawɛ ha nɛ David ye kunimi ngɛ he tsuaa he.

7 David kpɔ sika tsu tsɛ̃i ɔmɛ nɛ Hadadezer tsɔli ɔmɛ hɛɛ ɔ ngɛ a dɛ, nɛ e kɛ ho Yerusalem ya.

8 Jehanɛ hu, David ya muɔ akɔblee babauu nitsɛ ngɛ Beta kɛ Berotai nɛ ji mahi nɛ matsɛ Hadadezer yeɔ a nɔ ɔ.

9 Benɛ Hamat matsɛ, Toi nu kaa David ye Hadadezer tabo ɔ tsuo nɔ ɔ,

10 e tsɔ e binyumu Yoram ya nga David, nɛ e ha lɛ ayekoo kaa e kɛ Hadadezer hwu ta nɛ e ye e nɔ kunimi; ejakaa lɛ Toi ɔ nitsɛ e kɛ Hadadezer hwu ta hluu. Yoram hɛɛ sika hiɔ, sika tsu, kɛ akɔblee nike níhi kɛ ho.

11 Matsɛ David gbaa ní nɛ ɔmɛ a nɔ kɛ ha Yawɛ kɛ piɛ sika hiɔ kɛ sika tsu nɛ e kpɔ ngɛ je ma amɛ nɛ e ye a nɔ ɔ a dɛ ɔ he.

12 Ma amɛ ji Edom, Moab, Amon, Filistia, kɛ Amalek. Ta yibu ní nɛ e kpɔ ngɛ matsɛ Hadadezer dɛ ɔ hu e gbaa nɔ.

13 ⓢ David gbe Edom bi akpe nyɔngma kɛ kpaanyɔ ngɛ Ngo kɔ̃ ɔ mi. Nɛ benɛ e kpale e se kɛ ba a, e biɛ pɛ pe kekle ɔ po.

14 David to tabohi a hi hehi ngɛ Edom zugba a nɔ tsuo; nɛ Edom bi ɔmɛ ba plɛ pee e sɔmɔli. Yawɛ ha David ye kunimi ngɛ he tsuaa he.

15 David ye Israel ma a tsuo nɔ matsɛ; e ye dami sane kɛ ha nɔ tsuaa nɔ.

16 Yoab, nɛ e nyɛ biɛ ji Zeruya a, ji tatsɛ nɔkɔtɔma; Ahilud binyumu Yehoshafat ji sanehi ngmalɔ;

17 Ahitub binyumu Zadok, kɛ Abiatar binyumu Ahimelek ji osɔfohi; nɛ Seraya ji David nitsɛ e pɛdiyo.

18 Yehoyada binyumu Benaya ji Keret kɛ Pelet bi ɔmɛ a nyatsɛ. Keret kɛ Pelet bi ɔmɛ ji David we bi a tabo. David binyumu ɔmɛ ji osɔfohi.