Samuel II, 5

David ye matsɛ ngɛ Israel kɛ Yuda tsuo

(<x>130 11:1-3</x>)

1 Jehanɛ, Israel wɛtso ɔmɛ tsuo ba David ngɔ ngɛ Hebron nɛ a ba de lɛ ke, “O nɛ, wa nyɛmi tutuutu ji mo.

2 Be ko nɛ be benɛ Saul ngɛ tsɛ yee ngɛ wa nɔ po ɔ, mo lɛ o nyɛɛɔ Israel hɛ mi kɛ yaa kɛ baa. Yawɛ wo mo si kaa mo lɛ o ma ba nyɛɛ e ma Israel ɔ hɛ mi, nɛ o maa ye ganɔ ha mɛ.”

3 Lɔ ɔ he ɔ, Israel ma nimeli ɔmɛ tsuo ba Matsɛ David ngɔ ngɛ Hebron, nɛ e kɛ mɛ so somi ko ngɛ Yawɛ hɛ mi. A pɔ David nu nɛ a wo lɛ matsɛ ngɛ Israel.

4 ⓘ David ye jeha nyingmi etɛ benɛ e bɔni matsɛ yemi, nɛ e ye matsɛ jeha nyingmi eywiɛ.

5 E hi Hebron kɛ ye Yuda nɔ matsɛ jeha kpaago kɛ fa; nɛ e hi Yerusalem kɛ ye Israel kɛ Yuda tsuo a nɔ matsɛ jeha nyingmi etɛ kɛ etɛ.

David pee Yerusalem e matsɛ ma

(<x>130 11:4-9</x>; <x>130 14:1-7</x>)

6 ⓙ Matsɛ David kɛ e we bi ɔmɛ ho ya tua Yerusalem. Yebus bi ɔmɛ nɛ ji zugba a nɔ bi ɔ, de David ke, “O be nyɛe maa ba hiɛ ɔ; hɛ yuyuili kɛ akpaketsɛmɛ po maa fie mo kɛ je hiɛ ɔ.” Blɔɔ a susumi ji David be nyɛe nɛ e ya lejɛ ɔ.

7 Se kɛ̃ David ya ngɔ Zion mɔ nguaa a nɛ ba plɛ pee David ma a.

8 Jamɛ a ligbi ɔ, David de e we bi ɔmɛ ke, “Nɔ tsuaa nɔ nɛ maa suɔ nɛ e gbe Yebus bi ɔmɛ ɔ, nɔ ɔ nɛ e su nyu dɔ ɔ he, nɛ e ya tua jamɛ a akpaketsɛmɛ ɔmɛ, kɛ hɛ yuyuili ɔmɛ. Nyɛ li bɔ nɛ i sume mɛ ha po!” Enɛ ɔ he je nɛ a deɔ ke, “E sɛ kaa hɛ yuyuili kɛ akpaketsɛmɛ baa Yawɛ we ɔ” nɛ.

9 David hi mɔ nguaa a mi, nɛ e wo lejɛ ɔ biɛ ke “David ma.” David po ma kɛ bɔle si; e to ma a sisi kɛ je he nɛ a tloo zu ngɔ pue ɔ, kɛ ba mi blɔ.

10 David ya nɔ wawɛɛ nitsɛ; ejakaa Yawɛ Tabohiatsɛ Mawu ɔ kɛ lɛ ngɛ.

11 Tiro matsɛ, Hiram wo tsɔli blɔ kɛ ba David ngɔ. A kɛ seda tsohi ba. Kapitɛhi, kɛ tɛ tsu fiali hu piɛ a he; nɛ a ba po we ha David.

12 David yɔse kaa Yawɛ to lɛ si kaa Israel matsɛ, nɛ e ha e matsɛ yemi ɔ ya nɔ ngɛ e ma Israel ɔ he.

13 Benɛ David hia kɛ je Hebron kɛ ba Yerusalem ɔ, e ba ngɔ yihi babauu, nɛ e su plahi fuu; nɛ a fɔ binyumuhi kɛ biyihi ha David kɛ piɛ kekle ni ɔmɛ a he.

14 Bimɛ nɛ e ba fɔ ngɛ Yerusalem ji Shamua, Shobab, Natan, Salomo,

15 Ibhar, Elishua, Nefeg, Yafia,

16 Elishama, Elyada, kɛ Elifelet.

A ye Filisti bi ɔmɛ a nɔ

(<x>130 14:8-17</x>)

17 Benɛ Filisti bi ɔmɛ nu kaa a pɔ David nu nɛ a wo lɛ Israel matsɛ ɔ, mɛ tsuo pɛpɛɛpɛ a ba nɛ a ba hla lɛ nɛ a nu lɛ. Se David nu he nɛ e ya sɛ e mɔ nguaa a mi.

18 Filisti bi ɔmɛ ba nɛ a ba gba wo Refaim kɔ̃ ɔ mi.

19 David bi Yawɛ ke, “Ma ya tua Filisti bi ɔmɛ lo? O ma je mɛ kɛ wo ye dɛ mi lo?” Yawɛ ha David heto ke, “Ee, moo ya! Bɔ tsuaa bɔ nɛ pee ɔ, ma je Filisti bi ɔmɛ kɛ wo o dɛ mi.”

20 David pue nɔ kɛ ho Baal Perazim ya nɛ e ya ye Filisti bi ɔmɛ a nɔ kunimi ngɛ lejɛ ɔ; nɛ e de ke, “Yawɛ gba blɔ kɛ gblee ye he nyɛli ɔmɛ a ta a mi ngɛ ye hɛ mi kaa pa nɛ hia lalaala kɛ bee.” Enɛ ɔ he je nɛ e wo lejɛ ɔ biɛ ke Baal Perazim[1] ɔ nɛ.

21 Filisti bi ɔmɛ je a wɔ ɔmɛ a he ngɛ lejɛ ɔ, nɛ David kɛ e we bi ɔmɛ ba muɔ kɛ ho.

22 Se Filisti bi ɔmɛ kpale a se nɛ a ya pue si ngɛ Refaim kɔ̃ ɔ mi ekohu.

23 Benɛ David ya bi Yawɛ ga womi ekohu ɔ, Yawɛ de lɛ ke, “Dɛbi, ko tua mɛ ngɛ hiɛ ɔ; yaa lɔgɔ kɛ gu a se je, nɛ o ya tua mɛ ngɛ tso ɔmɛ a he ngɛ lejɛ ɔ.

24 Ke o nu nɔ́ ko nɛ ngɛ pɛe ngɛ tso ɔmɛ a yi mi kaa tabohi a nyɛɛmi ɔ, yaa nɛ o ya tua Filisti bi ɔmɛ; ejakaa Yawɛ nyɛɛ o hɛ mi kɛ yaa nɛ e ya gbe Filisti ta buli ɔmɛ.”

25 David pee kaa bɔ nɛ Yawɛ fa lɛ ɔ; nɛ e kpata Filisti bi ɔmɛ a hɛ mi kɛ je Geba kɛ ya si Gezer tɔɔ.