Samuel II, 4

A gbe Ishboshet

1 Benɛ Saul bi Ishboshet nu kaa a gbe Abner ngɛ Hebron ɔ, e nine mi je wu; nɛ Israel tsuo dɛ yaa.

2 Ishboshet ngɛ asafoatsɛmɛ enyɔ; nɔ kake biɛ ji Baana, nɛ nɔ kake hu biɛ ji Rekab. Beerot no Rimon nɛ je Benyamin wɛtso ɔ mi ɔ bimɛ ji mɛ. (A buu Beerot ngɔ siɔ Benyamin nɔ.

3 Beerot bi ɔmɛ nitsɛ lɛɛ a tu fo kɛ ya dumɔ Gitaim, nɛ a tlɔ lejɛ ɔ kɛ ba si mwɔnɛ ɔ.)

4 ⓖ Saul bi Yonatan ngɛ bi akpaketsɛ ko nɛ a tsɛɛ lɛ Mefiboshet. Benɛ Saul kɛ Yonatan gbenɔ sane ɔ pɛ ngɛ Yezreel ɔ, jamɛ a be ɔ, Mefiboshet ye jeha enuɔ. A tsɔɔ kaa benɛ sane ɔ ba a, bimɛanyɛ nɛ ngɛ e nɔ hyɛe ɔ ngɔ lɛ kɛ tu fo. Se nɛ e ngɛ esɔ yee ɔ, jokuɛ ɔ je e dɛ nɔ si nɛ e hule.

5 Ligbi ko ɔ, Beerot no Rimon bimɛ Rekab kɛ Baana ya Ishboshet we ɔ mi piani katakata benɛ Ishboshet kpasa si bɔɔ.

6 Jamɛ a be ɔ, yo agbo nya bulɔ ɔ ngɛ ngma mi sae; se lɛ hu mahe ba wo lɛ. Lɔ ɔ he ɔ, Rekab kɛ e nyɛminyumu ɔ pee blɛuu nɛ a sɛ we ɔ mi.

7 Benɛ a sɛ we ɔ mi ɔ, a na Ishboshet nɛ hwɔɔ si ngɛ sa nɔ ngɛ e se tsu ɔ mi. Nɛ a fia lɛ nɔ́ nɛ a gbe ngɔ wo sa mi. A po e yi nɛ a kɛ yi ɔ nyɛɛ nyɔnyɔɔnyɔ kɛ ya gu Yordan kɔ̃ ɔ mi.

8 A kɛ Ishboshet yi ɔ ba ha Matsɛ David ngɛ Hebron, nɛ a de lɛ ke, “O he nyɛlɔ Saul nɛ hla kaa e ma kpata o hɛ mi ɔ, e bi Ishboshet yi ji nɛ ɔ nɛ. Mwɔnɛ ligbi nɛ ɔ, Yawɛ ha nɛ wa nyɔmtsɛ matsɛ ye lue ngɛ Saul kɛ e nina a nɔ.”

9 Se David ha mɛ heto ke, “I na Yawɛ, hɛ kalɔ ɔ nɛ he ye yi wami kɛ je amanehluhi tsuo a mi ɔ!

10 ⓗ Benɛ nɔ ko ba bɔ mi amaniɛ ngɛ Ziklag ke Saul gbo, nɛ e pee lɛ kaa manye munyu nɛ e hɛɛ kɛ ba a, i nu lɛ nɛ i gbe lɛ. Lɔ ɔ ji sina nɛ e na kɛ je ye dɛ ngɛ munyu ɔ nɛ e kɛ ba a he.

11 Lɛɛ ke nyɛ dikali nyɛ ya gbe nɔ ko nɛ pee we yayami ko kɛ wo sa mi ngɛ lɛ nitsɛ e we mi ɔ, anɛ e sɛ kaa i yeɔ e gbenɔ ɔ he lue, nɛ ma kpata nyɛ hɛ mi kɛ je zugba a nɔ lo?”

12 Kɛkɛ nɛ David fa e we bi ɔmɛ nɛ a gbe Rekab kɛ Baana; a poo a ninehi kɛ a nanehi, nɛ a ngɔ mɛ ngɔ kpla si ngɛ Hebron taku ɔ kasa nya. Se Ishboshet yi ɔ lɛɛ a ya pu ngɛ Abner yɔkɔ ɔ mi ngɛ Hebron.