Samuel II, 12

Natan sɛ gbi, kɛ David he piami

1 ⓧ Kɛkɛ nɛ Yawɛ tsɔ Natan ya de David ligbi ko ke, “Nyumuhi enyɔ hi ma ko mi; nɔ kake ɔ, niatsɛ ji lɛ, se nɔ kake ɔ lɛɛ ohiatsɛ ji lɛ.

2 Niatsɛ ɔ ngɛ tohi kɛ nahi babauu nitsɛ;

3 se ohiatsɛ ɔ lɛɛ e be nɔ́ ko nɔ́ ko pe jijɔ yo kake nɛ e ya he. E hyɛ lohwe ɔ nɔ saminya, nɛ e kɛ e bimɛ ɔmɛ a bɛbɛ mi lohwe nɛ ɔ hii be tsuaa be kɛ ya si e wa. Niye ní nɛ e yeɔ ɔ, eko nɔuu e kɛ haa lohwe nɛ ɔ; e kɛ lɛ nuɔ ní ngɛ kplu kake nya, nɛ e mi si lohwe nɛ ɔ hwɔɔ. E hɛɛ lɛ kaa lɛ nitsɛ e biyo pɛ.

4 Ligbi ko ɔ, nubwɔ ko ba to niatsɛ ɔ. Niatsɛ nɛ ɔ sume kaa e maa nu lɛ nitsɛ e to, loo na nɛ e gbe kɛ pee niye ní ha nubwɔ ɔ; se mohu e ya nu ohiatsɛ ɔ jijɔ bi ɔ nɛ e gbe kɛ ha e nubwɔ ɔ.”

5 David mi mi fu jamɛ a niatsɛ ɔ wawɛɛ nitsɛ, nɛ e de Natan ke, “I na Yawɛ kaa nɔmlɔ nɛ pee nɔ́ nɛ ɔ, ja e gbo!

6 Jehanɛ se hu, kaa e nyɛ pee nɔ́ nɛ ɔ nɛ mɔbɔ nami ko be e mi ɔ, e sa kaa e to jijɔ bi ɔ nane mi totoe eywiɛ.”

David tue gblami

7 Natan de David ke, “Mo tutuutu ji jamɛ a nyumu ɔ nɛ! Bɔ nɛ Yawɛ, Israel Mawu ɔ de ji nɛ ɔ nɛ: ‘Imi nɛ i pɔ mo nu nɛ i wo mo Israel matsɛ, nɛ i je mo kɛ je Saul dɛ mi.

8 Imi nɛ i ngɔ o nyɔmtsɛ Saul matsɛ yemi ɔ, kɛ e yi ɔmɛ ngɔ wo o dɛ mi; imi nɛ i wo mo Israel kɛ Yuda tsuo matsɛ. Ke ní nɛ ɔmɛ pi ha mo ɔ, jinɛ ma ngɔ totoe enyɔ ngɔ piɛ he ha mo.

9 Mɛni he je mɔ nɛ o tɔ Yawɛ mlaa a nɔ, nɛ o pee yayami kaa kikɛ nɛ ɔ ngɛ e hɛ mi? O ha Amon bi ɔmɛ gbe Uria, Hit no ɔ ngɛ ta nga a nɔ, nɛ o ngɔ e yo ɔ kɛ ba pee o yo!

10 Lɔ ɔ he ɔ, akɛnɛ o bui mi, nɛ o ya ngɔ Uria yo ɔ kɛ ba pee o yo he je ɔ, klaate nya gbenɔ fɔɔ si ha o weku kɛ nina kɛ yaa neneene.’

11 ⓨ Nɔ́ nɛ Yawɛ ngɛ mo dee ji nɛ ɔ nɛ: ‘Ma ha mo nitsɛ o we ɔ mi no ko ma tsɔ atuã kɛ wo mo. Ma kpɔ o yi ɔmɛ ngɛ o dɛ hɛ mi paa, nɛ ma ngɔ mɛ ngɔ ha o nyɛmi ko; nɛ e kɛ mɛ maa hwɔ piani katakata.

12 Moo o pee nɔ́ nɛ ɔ ngɛ laami mi; se imi lɛɛ ma pee nɔ́ nɛ i de nɛ ɔ piani katakata, konɛ Israel tsuo nɛ na.’ ”

David pia e he

13 David de Natan ke, “I pee yayami kɛ si Yawɛ.” Natan de lɛ ke, “Yawɛ ngɔ o he yayami ɔ ngɔ pa mo; o be gboe!

14 Se akɛnɛ o kɛ nɔ́ nɛ o pee nɛ ɔ pue Yawɛ hɛ mi si he je ɔ, bi nɛ a fɔ ha mo ɔ ma gbo.”

15 Kɛkɛ nɛ Natan je kɛ ho we mi ya. Yawɛ ha nɛ binyumu ɔ nɛ Uria yo ɔ kɛ David fɔ ɔ wo hiɔ.

David binyumu ɔ gbo

16 David kpa Mawu pɛɛ nɛ́ e ha nɛ jokuɛ ɔ nɛ na he wami. David kua ní yemi; nɛ daa nyɔ mi ɔ, e hwɔɔ zugba kɛ ya siɔ je nami.

17 David we ɔ mi nimeli ɔmɛ maa ya e ngɔ, nɛ a ma ya fa kue ha lɛ kaa e maa te si ngɛ zugba a lo; se e kplɛɛ we, nɛ e kɛ mɛ yi ní hulɔ.

18 Otsi se ɔ, jokuɛ ɔ gbo, nɛ David tsɔli nikɔtɔma amɛ ye gbeye kaa a ma de lɛ ke jokuɛ ɔ gbo. A de ke, “Benɛ jokuɛ ɔ na we nɛ e gbo lolo ɔ, ke wa de lɛ nɔ́ ko ɔ, e pui wa nya mi; lɛɛ ke wa de lɛ ke jokuɛ ɔ gbo ɔ, tse e maa ye e he awi ngɔ fɔ wa nɔ!”

19 Benɛ David na kaa e tsɔli ɔmɛ kɛ a he ngɛ ablɛgbi tue ɔ, e yɔse kaa jokuɛ ɔ gbo, nɛ e bi mɛ ke, “Jokuɛ ɔ gbo lo?” Nɛ a he nɔ ke, “Ee, e gbo.”

20 Kɛkɛ nɛ David te si ngɛ zugba, nɛ e ya du e he, nɛ e kpa nu, nɛ e tsake e tade ɔmɛ. Lɔ ɔ se ɔ, e ho Yawɛ we ɔ ya, nɛ e ya ja Mawu. Benɛ e kpale kɛ ba lɛ nitsɛ e we ɔ mi ɔ, e ha nɛ a pee niye ní ha lɛ, nɛ e ye.

21 Kɛkɛ nɛ e tsɔli ɔmɛ bi lɛ ke, “Kɛ ji nɔ́ nɛ o pee nɛ ɔ sisi kɛɛ? Benɛ jokuɛ nɛ ɔ ngɛ wami mi ɔ, o ha hwɔ nɛ o fo ya ha lɛ. Se benɛ jokuɛ ɔ gbo mohu ɔ, o te si nɛ o ye ní.”

22 David ha mɛ heto ke, “Benɛ jokuɛ ɔ na we nɛ e gbo lolo ɔ, i ha hwɔ nɛ i fo ya; ejakaa i susu kaa, alini Yawɛ maa na mi mɔbɔ nɛ jokuɛ ɔ yi ma na wami.

23 Se piɔ nɛ e gbo ɔ, mɛni he je e sa kaa ma ha hwɔ ekohu? Anɛ ma nyɛ ma kpale lɛ kɛ ba wami mi ekohu lo? Imi mohu nɛ ma bu e nɔ ligbi ko; se lɛɛ e be kpalee kɛ ba ye ngɔ hu gblegbleegble.”

A fɔ Salomo

24 Enɛ ɔ se ɔ, David ba to e yo Batsheba tsui nɔ nine. E kɛ lɛ na bɔmi, nɛ e fɔ binyumu; nɛ David wo lɛ biɛ ke Salomo. Yawɛ suɔ jokuɛ ɔ saminya,

25 nɛ e fa gbalɔ Natan ke e ya wo jokuɛ ɔ biɛ ke Yedidia; e sisi ji, “Nɔ nɛ Yawɛ suɔ lɛ.”

David ye Raba bi a nɔ

(<x>130 20:1-3</x>)

26 Yoab gba ta wo Raba, Amon bi a ma nguaa a he, nɛ e miɔ nɛ e ngɔ ma a.

27 Yoab tsɔ ya de David ke, “I kɛ Raba bi hwu ta nɛ i kpɔ a nyu yɛmi he ɔ ngɛ a dɛ.

28 Lɔ ɔ he ɔ, mo bua ta nɛ piɛ ɔ nya nɛ o ya tua ma a, konɛ mo nitsɛ o nine nɛ su ma a tsuo nɔ. Ke o pee we ja, nɛ i ya ye ma a nɔ ɔ, a maa ngɔ ye biɛ kɛ wo ma a.”

29 Lɔ ɔ he ɔ, David ya bua e we bi ɔmɛ tsuo a nya, nɛ e ya tua Raba, nɛ e ngɔ ma a.

30 David je jlasi ɔ nɛ ngɛ Amon bi ɔmɛ a we amaga Milkon ɔ yi, nɛ lɛ nitsɛ e bu. Jlasi ɔ jiimi maa pee sika tsu kilo nyingmi etɛ kɛ enuɔ jiimi; nɛ tɛ nɛ he jua wa ngɛ mi. David ngɔ ta yibu ní babauu nitsɛ kɛ je ma a mi kɛ ba.

31 Ma a mi bi ɔmɛ nitsɛmɛ lɛɛ e muɔ mɛ kɛ ba nɛ e ba ha mɛ ní tsumi kpakpataa komɛ nɛ a kɛ sauhi kɛ dade gbiɛ slɔɔtohi tsuɔ. Jehanɛ se hu, e nyɛ ni ɔmɛ a nɔ nɛ a sã bliikisi. David pee Amon bi ɔmɛ a ma kpa amɛ tsuo kikɛ nɛ ɔ nɔuu. Lɔ ɔ se ɔ, David kɛ ma a tsuo kpale kɛ ba Yerusalem.