Samuel II, 11

David kɛ Batsheba

1 ⓥ Gbo be mi nɛ́ matsɛmɛ pɔɔ ta gbami ɔ, David tsɔ Yoab kɛ e we asafoatsɛmɛ ɔmɛ, kɛ Israel tabo ɔ tsuo kɛ ho nɛ a ya kpata Amon bi ɔmɛ a hɛ mi, nɛ a sa Raba ma a yi. Jamɛ a be ɔ, David nitsɛ lɛɛ e ngɛ Yerusalem.

2 Ligbi ko gbɔkuɛ nya si ɔ, David te si kɛ je e sa mi nɛ e ya ngɛ si slaae ngɛ tsu ɔ yi mi ngɛ matsɛ we ɔ mi. Kɛkɛ nɛ e na yo ko nɛ ngɛ due ngɛ sisi ɔ. Yo ɔ he ngɛ fɛu saminya.

3 Lɔ ɔ he ɔ, David tsɔ ya bi yo ɔ he sane. Nɛ a ba bɔ lɛ amaniɛ ke a tsɛɛ yo ɔ Batsheba; Eliam biyo ji lɛ, nɛ e huno ji Uria, Hit no ɔ.

4 David tsɔ nɛ a ya tsɛ yo ɔ kɛ ba; nɛ benɛ e ba a, David kɛ lɛ hwɔ. Jamɛ a be ɔ, Batsheba je we mi se, nɛ e ngɛ e he tsukɔe. Kɛkɛ nɛ e kpale kɛ ho we mi ya.

5 Pee se ɔ, yo ɔ na kaa e hɛɛ mi, lɔ ɔ he ɔ, e tsɔ ya de David.

6 Kɛkɛ nɛ David tsɔ nɛ a kɛ sɛ gbi ya ha Yoab ke, “Ha nɛ Uria, Hit no ɔ nɛ ba.” Nɛ Yoab wo Uria blɔ kɛ ba David ngɔ.

7 Benɛ Uria ba a, David bi lɛ Yoab kɛ tabo ɔmɛ a hwɔhwɔɛ, kɛ bɔ nɛ ta a ngɛ nɔ yae ha.

8 Lɔ ɔ se ɔ, David de Uria ke, “Yaa o we ɔ mi nɛ o ya jɔɔ o he bɔɔ.” Benɛ Uria je matsɛ we ɔ mi ɔ, matsɛ ɔ tsɔ nɛ a kɛ nike ní nyɛɛ e se.

9 Se Uria yɛ we mi; mohu e kɛ e nyɔmtsɛ ɔ tsɔli ɔmɛ tsuo ya hwɔ matsɛ we ɔ agbo ɔ nya.

10 Benɛ David nu kaa Uria yɛ we mi ɔ, e de Uria ke, “O hia blɔ be saii ji nɛ ɔ, nɛ piɔ pɛ o kpale kɛ ba. Mɛni he je nɛ o yɛ we mi ɔ?”

11 Uria he nɔ ke, “Israel kɛ Yuda tsuo ngɛ ta hwue, nɛ somi daka a ngɛ a ngɔ. Jehanɛ, ye nyɔmtsɛ Yoab kɛ e we asafoatsɛmɛ ɔmɛ hu pueɔ si ngɛ nga a nɔ; nɛ imi lɛɛ ma ya we mi nɛ ma ya ye ní, nɛ ma nu dã, nɛ i kɛ ye yo ya hwɔ si lo? I na o nane kaa i be nɔ́ nɛ ɔ pee!”

12 David de Uria ke, “Lɛɛ moo hi hiɛ ɔ mwɔnɛ ɔ hulɔ, konɛ ma wo mo blɔ hwɔɔ nɛ o ho.” Lɔ ɔ he ɔ, Uria hi si ngɛ Yerusalem jamɛ a ligbi ɔ.

13 E nɔ jena a, David tsɛ lɛ ní yemi; nɛ e ha e ye ní nɛ e nu dã saminya kɛ ya si e de. Se e yɛ we mi; gbɔkuɛ ɔ, e ho ya hwɔ e sa a nɔ ngɛ e nyɔmtsɛ ɔ tsɔli ɔmɛ a ngɔ.

14 E nɔ jena mɔtu ɔ, David ngma Yoab womi, nɛ e ngɔ ha Uria kɛ ho.

15 Nɔ́ nɛ e ngma ngɛ womi ɔ mi ji, “Moo ngɔ Uria kɛ ya da ta a nya he nɛ mi he wa pe kulaa. Lɔ ɔ se ɔ, nyɛɛ gbla nyɛ he si kɛ je e he, nɛ a fia lɛ ní nɛ e gbo.”

16 Enɛ ɔ he je ɔ, benɛ Yoab ngɛ ma a yi sae ɔ, e ngɔ Uria ya da he nɛ e le kaa he nyɛli ɔmɛ a mi wa ngɛ ɔ.

17 He nyɛli ɔmɛ je kpo nɛ a kɛ Yoab we bi ɔmɛ ba hwu ta. David asafoatsɛmɛ ɔmɛ ekomɛ gbo; nɛ Uria, Hit no ɔ hu a gbe lɛ.

18 Jehanɛ Yoab tsɔ nɛ a ya bɔ David nɔ́ tsuaa nɔ́ nɛ ya nɔ ngɛ ta a mi.

19 E je blɔ de tsɔlɔ ɔ ke, “Ke o bɔ matsɛ ɔ ta a mi sane ɔ tsuo gbe nya,

20 nɛ e ba mi kaa e mi mi fu nɛ e bi mo ke, ‘Mɛni he je nyɛ ya su ma a he haa kikɛ nɛ ɔ kɛ hwu ta a? Anɛ nyɛ li kaa a ma tsɛ̃ nyɛ kɛ̃ɛ̃ kɛ je gbogbo ɔ nɔ lo?

21 ⓦ Nyɛ kaii we bɔ nɛ a gbe Gideon binyumu Abimelek ɔ? Anɛ pi Tebez nɛ yo ko ngɔ wɛ tɛ kɛ gu gbogbo nɔ kɛ ko e yi mi ngɛ nɛ e gbo lo? Mɛni he je nyɛ ya su gbogbo ɔ he haa kikɛ nɛ ɔ?’ Ke matsɛ ɔ bi mo kikɛmɛ a munyu nɛ ɔ, mo de lɛ ke, ‘O tsɔlɔ Uria, Hit no ɔ hu gbo.’ ”

22 Tsɔlɔ ɔ ya bɔ David nɔ́ tsuaa nɔ́ nɛ Yoab fa lɛ ke e ya de ɔ.

23 E de David ke, “Wa he nyɛli ɔmɛ a he wa pe wɔ. A je ma a mi ba tua wɔ ngɛ nga a nɔ; se wa fie mɛ kɛ ho ma agbo ɔ nya ya.

24 A tsɛ̃ wɔ kɛ̃ɛ̃ kɛ je gbogbo ɔ nɔ. Nɛnɛ, asafoatsɛmɛ ɔmɛ ekomɛ gbo, nɛ o tsɔlɔ Uria, Hit no ɔ hu a gbe lɛ.”

25 David de tsɔlɔ ɔ ke, “Yaa nɛ o ya wo Yoab he wami, nɛ o de lɛ ke e ko ha nɛ sane nɛ ɔ nɛ hao lɛ; ejakaa klaate ngɛ nɛ ɔ, e hlɛ nɔ mi nɛ e gbee. De lɛ ke e ngɔ e he wami tsuo kɛ tua ma a, nɛ e ngɔ ma a.”

26 Benɛ Uria yo ɔ nu kaa e huno Uria gbo ɔ, e nyɛ ya ha lɛ.

27 Benɛ e nyɛ ya ha lɛ gbe nya a, David tsɔ ya ngɔ lɛ kɛ ba e we ɔ mi, nɛ e ba pee e yo; nɛ e fɔ binyumu ha lɛ. Se nɔ́ nɛ David pee nɛ ɔ ngɔɛ Yawɛ nya.