Samuel II, 13

Amnon kɛ Tamar

1 David binyumu Absalom ngɛ nyɛmiyo ko nɛ he ngɛ fɛu saminya. E biɛ ji Tamar. E ba mi kaa Tamar tsɛbi Amnon ba na suɔmi wawɛɛ kɛ ha e nyɛmiyo nɛ ɔ.

2 Suɔmi nɛ Amnon ngɛ kɛ ha e nyɛmiyo ɔ nya wa saminya, nɛ nɔ́ nɛ ɔ ba wo lɛ hiɔ. Amnon le kaa bɔ tsuaa bɔ nɛ pee ɔ, e be e nyɛmiyo ɔ he blɔ nae; ejakaa yomiyo ji lɛ, nɛ a ngmɛ́ lɛ blɔ nɛ e kɛ nyumu nɛ na bɔmi.

3 Se Amnon ngɛ huɛ ko nɛ le nɔ́ he ga tomi saminya. E biɛ ji Yonadab, nɛ e kɛ Amnon peeɔ tsɛngua kɛ tsɛwayo bimɛ; ejakaa Yonadab tsɛ Shimea kɛ David peeɔ nɔ kɛ e senɔ.

4 Yonadab bi Amnon ke, “Mo matsɛbi mluku ɔ, mɛni ba loko o ngɛ flaae jenajena kikɛ nɛ ɔ?” Amnon he nɔ ke, “I suɔ Tamar, ye tsɛbi Absalom nyɛmiyo ɔ sane saminya.”

5 Yonadab de lɛ ke, “Yaa hwɔ si nɛ o buá nɛ o pee kaa o be he wami. Ke o tsɛ ba slaa mo ɔ, de lɛ ke, ‘Mo ha nɛ ye nyɛmiyo Tamar ba ha mi niye ní nɛ ma ye. Ha nɛ e ba pee niye ní ɔ ngɛ hiɛ ɔ nɛ ma na; konɛ e hɛɛ ngɛ e dɛ mi nɛ ma ye.’ ”

6 Amnon ho ya hwɔ si nɛ e buá pee kaa nɔ nɛ e be he wami. Matsɛ David ya slaa lɛ, nɛ Amnon de lɛ ke, “I kpa mo pɛɛ nɛ o ngmɛ ye nyɛmiyo Tamar blɔ nɛ e ba hiɛ ɔ nɛ e ba si tatale enyɔ ko ha mi, konɛ e hɛɛ ngɛ e dɛ mi nɛ ma ye.”

7 David tsɔ ya de Tamar ngɛ matsɛ we ɔ mi ke, “Yaa o nyɛminyumu Amnon we ɔ mi, nɛ o ya pee niye ní ha lɛ.”

8 Kɛkɛ nɛ Tamar ba Amnon we ɔ mi, nɛ e ba na lɛ nɛ e hwɔɔ si. Tamar pɔtɔ ma ngɛ Amnon hɛ mi nɛ e kɛ pee tatale nɛ e si.

9 Lɔ ɔ se ɔ, e plɛ tatale ɔ ngɛ nisi kã a mi, nɛ e ngɔ kɛ ya ma Amnon hɛ mi; se e kua yemi. Amnon de ke, “Nɔ tsuaa nɔ nɛ e je hiɛ ɔ!” Nɛ ni ɔmɛ tsuo je lejɛ ɔ.

10 Jehanɛ Amnon de Tamar ke, “Moo hɛɛ niye ní ɔ ngɛ o dɛ mi nɛ o kɛ ba ha mi ngɛ se tsu ɔ mi nɛ ma ye.” Tamar ngɔ tatale nɛ e si ɔ ya ha e nyɛminyumu Amnon ngɛ se tsu ɔ mi.

11 Benɛ e kɛ niye ní ɔ su Amnon ngɔ pɛ kɛkɛ nɛ Amnon nu lɛ, nɛ e de lɛ ke, “Ye nyɛmiyo, ba nɛ o kɛ mi ba hwɔ!”

12 Se Tamar de lɛ ke, “Dɛbi, ye nyɛminyumu, ko pue ye hɛ mi si; ejakaa a pee we nɔ́ nɛ ɔ ngɛ Israel. Ko tsu zo ní kaa kikɛ nɛ ɔ.

13 Zo nɛ ɔ, jije ma kɛ gu? Se moo lɛɛ o maa pee kaa Israel yakayaka nimli ɔmɛ a ti nɔ kake. Lɔ ɔ he ɔ, i kpa mo pɛɛ, yaa nɛ o ya na matsɛ ɔ; ejakaa i heɔ yeɔ kaa e maa kplɛɛ kaa e kɛ mi ma ha mo.”

14 Se Amnon bui nɔ́ nɛ e nyɛmi ɔ ngɛ de ɔ tue; nɛ akɛnɛ e he wa pe lɛ he je ɔ, e nu lɛ pani nya, nɛ e kɛ lɛ hwɔ.

15 Enɛ ɔ se ɔ, Tamar he tai bɔni Amnon peemi; nɛ ninyɛ nɛ Amnon na kɛ ha lɛ ɔ nya wa kulaa pe suɔmi nɛ e kɛ suɔ lɛ kekle ɔ. Kɛkɛ nɛ Amnon de lɛ ke, “Tee si nɛ o ho!”

16 Se Tamar de lɛ ke, “Mo ko de mi ja! Fiemi nɛ o ngɛ mi fiee nɛ ɔ, e ji yayami nɛ kle pe kekle nɔ́ nɛ o pee mi ɔ po.” Se Amnon bui nɔ́ nɛ e ngɛ de ɔ tue.

17 E tsɛ niheyo ɔ nɛ sɔmɔɔ lɛ ɔ, nɛ e de lɛ ke, “Je yo nɛ ɔ kpo; fie lɛ kɛ je hiɛ ɔ, nɛ o la sinya a se!”

18 Tsɔlɔ ɔ pee ja, nɛ e la sinya a se. Tamar wo tade klɔii saminyayoo; ejakaa blema a, ja ji bɔ nɛ matsɛmɛ a biyihi nɛ a gbɛ lolo ɔ dlaa a he.

19 Tamar muɔ la zu kɛ pue e yi mi, nɛ e hía tade klɔii saminyayoo ɔ nɛ e wo ɔ. E kɛ e nine kpla e yi, nɛ e ma blɔ; nɛ e ngɛ ya foe boboobo kɛ ho.

20 Benɛ e nyɛminyumu Absalom na lɛ ɔ, e bi lɛ ke, “Anɛ o nyɛminyumu Amnon ta o he lo? Ye nyɛmiyo, mo ma o nya kɛkɛ; mo ko ye o tsui, ejakaa o nyɛminyumu ji lɛ.” Tamar hi si mɔbɔmɔbɔ ngɛ e nyɛminyumu Absalom we ɔ mi.

21 Benɛ Matsɛ David nu sane nɛ ɔmɛ tsuo a he ɔ, e muklii mi fu wawɛɛ nitsɛ.

22 Absalom hu na ninyɛ agbo kɛ ha Amnon, nɛ e kɛ lɛ hiɔ nya kaa e nyɛ e nyɛmiyo Tamar nɔ pani nya, nɛ e kɛ lɛ hwɔ.

Absalom lue yemi

23 Jeha enyɔ se ɔ, e ba mi kaa a ya ngɛ Absalom tohi a he bwɔmi sãe ngɛ Baal Hazor, ngɛ Efraim kasa nya; nɛ Absalom fɔ matsɛbinyumu ɔmɛ tsuo nine.

24 Absalom ba matsɛ ɔ ngɔ nɛ e ba de lɛ ke, “A ma o tsɔlɔ ɔ to ɔmɛ a he bwɔmi sami. I kpa mo pɛɛ nɛ o kɛ o tsɔli ɔmɛ nɛ ba, nɛ nyɛ ba hyɛ ye kuɛ se mi.”

25 Se matsɛ ɔ de Absalom ke, “Dɛbi, ye bi, ke wɔ tsuo wa ba a, wa ma ba pee tlomi ngɛ o kuɛ nɔ.” Absalom nyɛ e nɔ hluu, se e kplɛɛ we; se kɛ̃, matsɛ ɔ gbaa lɛ.

26 Kɛkɛ nɛ Absalom de ke, “Ke o kplɛɛ we ɔ, lɛɛ i kpa mo pɛɛ nɛ o ha nɛ ye nyɛminyumu Amnon ba sɛ wɔ mɔ.” Matsɛ ɔ bi lɛ ke, “Mɛni he je o ngɛ Amnon hlae ɔ?”

27 Se Absalom nyɛ e nɔ hluu kɛ ya si e kplɛɛ kaa Amnon kɛ matsɛbinyumu ɔmɛ tsuo nɛ a ya. Absalom ngmɛ okplɔɔ gbidii kaa a ngmɛɛ okplɔɔ ha matsɛ.

28 Absalom fa e tsɔli ɔmɛ ke, “Ke Amnon nu wai nɛ e bua jɔ e he ɔ, nyɛɛ hi lɛ huɔe konɛ ke i de ke, ‘Nyɛɛ fia Amnon nɔ́,’ pɛ nɛ nyɛɛ gbe lɛ. Imi nɛ i fa nyɛ ɔ nɛ. Nyɛ ko ye gbeye! Nyɛɛ pee kã; nɛ nyɛ ha nɛ a na kaa nyumuhi ji nyɛ.”

29 Absalom tsɔli ɔmɛ tsu Amnon he ní kaa bɔ nɛ Absalom fa mɛ ɔ. Kɛkɛ nɛ matsɛbinyumu ɔmɛ tsuo te si, nɛ nɔ tsuaa nɔ ya kuɔ e teji okpɔngɔ; nɛ a tu fo.

30 Benɛ a ngɛ blɔ ɔ nɔ kɛ yaa a, nɔ ko ya bɔ David amaniɛ ke, “Absalom gbe matsɛbinyumu ɔmɛ tsuo, nɛ a ti nɔ kake po píɛ.”

31 Kɛkɛ nɛ matsɛ ɔ te si nɛ e kɛ aywilɛho hía e tade ɔmɛ ngɛ e he, nɛ e hwɔ si ngɛ zugba; nɛ e tsɔli ɔmɛ tsuo nɛ daa si ngɛ e kasa nya a hu hía a tade ɔmɛ ngɛ a he.

32 Se Yonadab, nɛ ji David nyɛminyumu Shimea bi ɔ de ke, “Ye nyɔmtsɛ nɛ e ko susu kaa a gbe matsɛbinyumu ɔmɛ tsuo; Amnon nɔ kake too pɛ ji nɔ nɛ a gbe ngɛ Absalom fami nya. Kɛ je be nɛ Amnon nu Absalom nyɛmiyo Tamar pani nya nɛ e kɛ lɛ hwɔ ɔ, kɛ je jamɛ a be ɔ tɔɔ Absalom to ga nɛ ɔ ngɛ Amnon he.

33 Lɔ ɔ he ɔ, ye nyɔmtsɛ matsɛ nɛ e ko ye e tsui kaa matsɛbinyumu ɔmɛ tsuo pɛpɛɛpɛ gbo; ejakaa Amnon nɔ kake pɛ ji nɔ nɛ a gbe ɔ nɛ.”

34 Jamɛ a be ɔ, Absalom tu fo kɛ je momo. Kɛkɛ nɛ bulɔ ɔ na nimli babauu ngɛ Horonaim blɔ ɔ nɔ nɛ a ngɛ yo ɔ kplee kɛ ma.

35 Yonadab de matsɛ ɔ ke, “O nɛ, matsɛbinyumu ɔmɛ nɛ a ma a nɛ. Nɔ́ nɛ o tsɔlɔ de ɔ, lɔ ɔ nɛ e ba mi nɛ ɔ nɛ.”

36 Benɛ e gbe e munyu ɔ nya pɛ kɛkɛ nɛ matsɛbinyumu ɔmɛ ba hia si ngɛ lejɛ ɔ. A hɛ dɔ, nɛ a wo yana. Kɛkɛ nɛ matsɛ ɔ kɛ e tsɔli ɔmɛ tsuo wo yana kɛ piɛ a he.

37 ⓩ Absalom tu fo kɛ ho Geshur matsɛ Talmai, nɛ ji Amihud binyumu ɔ ngɔ ya; nɛ e ya hi lejɛ ɔ jeha etɛ. David ye e binyumu Amnon he kɔmɔ be babauu.

38

39 Se benɛ kɔɔhiɔ fia Amnon gbenɔ ɔ mi bɔɔ ɔ, David hɛ ja ngɛ Absalom he; nɛ e ná nɛ e na lɛ ekohu.