Mawu kɛ Abram so
1 Enɛ ɔ se ɔ, Yawɛ kɛ Abram tu munyu ngɛ nina mi ke, “Abram, koo ye gbeye. Ma bu o he, nɛ ma gbaa mo babauu.”
2 Se Abram he nɔ ke, “Yawɛ Mawu, o gbaami ɔ, mɛni he se ma na, imi nɛ i be bi ɔ? Nɔ pɛ nɛ yeɔ ye ní ji Eliezer nɛ je Damasko ɔ.
3 O ha we mi bi; lɔ ɔ he je ɔ, ye nyɔguɛ ɔmɛ a ti nɔ kake ma ba ye ye gbosi ní.”
4 Yawɛ de Abram ekohu ke, “Kikɛmɛ a nyɔguɛ Eliezer nɛ ɔ be o ní yee; mo nitsɛ o bi tutuutu ji nɔ nɛ ma ba ye o gbosi ní ɔ.”
5 ⓞ Kɛkɛ nɛ Yawɛ ngɔ Abram kɛ je kpo nɛ e de lɛ ke, “Hyɛ hiɔwe nɛ o ka kaa o ma nyɛ maa kane dodoe ɔmɛ lo; bɔ nɛ dodoe ɔmɛ hiɛ babauu ɔ, ja o nina hu maa hiɛ.”
6 ⓟ Abram he Yawɛ ye; enɛ ɔ he je ɔ, Yawɛ bu lɛ nɔ nɛ peeɔ nɔ́ nɛ da.
7 Jehanɛ Yawɛ de Abram ke, “Imi ji Yawɛ nɛ e kɛ mo je Ur ngɛ Babilonia kɛ ba hiɛ ɔ, konɛ ma ngɔ zugba nɛ ɔ ngɔ ha mo ɔ nɛ.”
8 Abram bi lɛ ke, “Oo Yawɛ Mawu, kɛ ma pee kɛɛ nɛ ma le kaa zugba nɛ ɔ ma ba pee ye nɔ́?”
9 Yawɛ he nɔ ke, “Ngɔɔ lohwe nɛ ɔmɛ kɛ ba ha mi: na yo nɛ ye jeha etɛ, apletsi yo nɛ ye jeha etɛ, agbosu nɛ ye jeha etɛ, beleku lahuɛ, kɛ okpo zaa.”
10 Abram ngɔ lohwe ɔmɛ kɛ ba ha Mawu. E poo a mi fiee enyɔɔnyɔ; e to fa kake ngɛ zã kake mi ngɛ hiɛ, nɛ e to fa kaketsɛ ɔ hu ngɛ zã kake mi ngɛ a sibi a hanɔ. Se lohwe pɛlitsɛmɛ ɔmɛ lɛɛ e poo we a mi.
11 Okpokuhi ba sɔ̃ lohwe gbogboe ɔmɛ a nɔ, se Abram fie mɛ kɛ je lejɛ ɔ.
12 ⓠ Benɛ pu maa ho si nɔmi ya a, mahe vii ko ba nɔ Abram nɔ, nɛ gbeye kɛ sawale nu lɛ.
13 ⓡ Kɛkɛ nɛ Yawɛ de lɛ ke, “I ngɛ mo dee anɔkuale mi kaa o nina ma ya pee nibwɔhi ngɛ zugba kpa nɔ; a maa pee nyɔguɛhi ngɛ lejɛ ɔ, nɛ a maa wa mɛ yi mi jeha lafa eywiɛ.
14 ⓢ Se jamɛ a je ma a nɛ maa wa mɛ yi mi ɔ, ma gbla a tue. Nyagbe ɔ, a maa muɔ jamɛ a zugba a nɔ ní babauu kɛ je.
15 Mo nitsɛ lɛɛ o maa hi si kɛ yaa si o maa bwɔ kotokoto, nɛ o ma gbo ngɛ he jɔmi mi, nɛ a maa pu mo.
16 Yi nɔ eywiɛ se ɔ, o nina maa kpale kɛ ba hiɛmɛ nɛ ɔ ekohu; ejakaa i be Amor bi ɔmɛ fiee kɛ je zugba a nɔ kɛ yaa si jamɛ a be ɔ mi. Jamɛ a be ɔ mi ɔ, a yi mi wami ɔ nya maa wa, nɛ ma gbla a tue.”
17 Benɛ pu nɔ si nɛ du bu ɔ, ngɛyu kɛ e mi la su ku, kɛ la lilɛ ba, nɛ e gu lohwe ɔmɛ nɛ a poo a mi ɔ a kpɛti kɛ be.
18 ⓣ Jamɛ a ligbi ɔ, Yawɛ kɛ Abram so, nɛ e de lɛ ke, “Ma ngɔ zugba nɛ ɔ tsuo kɛ ha o nina, kɛ maa je Egipt pa a nya kɛ yaa si Yufrate pa a nya.
19 Ken bi, Keniz bi, Kadmon bi,
20 Hit bi, Periz bi, Refaim bi,
21 Amor bi, Kanaan bi, Girgash bi, kɛ Yebus bi a zugba a i ngɛ tsɔɔe ɔ nɛ.”