Mose I, 14

Abram he Lot yi wami

1 Jamɛ a be ɔ mi ɔ, Babilonia matsɛ, Amrafel; Elasar matsɛ, Ariok; Elam matsɛ, Kedorlaomer; kɛ Goim matsɛ, Tidal

2 gba ta wo matsɛmɛ enuɔ komɛ: mɛ ji Sodom matsɛ, Bera; Gomora matsɛ, Birsha; Adma matsɛ, Shina; Zeboiim matsɛ, Shemeber; kɛ Bela (aloo Zoar) matsɛ.

3 Matsɛmɛ enuɔ nɛ ɔmɛ pee kake, nɛ a ya bua a he nya ngɛ Sidim Kɔ̃ ɔ mi, he nɛ a tsɛɛ ke Ngo Wo amlɔ nɛ ɔ.

4 Jinɛ a sɔmɔ Kedorlaomer jeha nyɔngma kɛ enyɔ, se jeha nɛ ji nyɔngma kɛ etɛ ɔ mi ɔ, a tsɔ atuã.

5 Jeha nɛ ji nyɔngma kɛ eywiɛ ɔ mi ɔ, Kedorlaomer kɛ matsɛmɛ nɛ piɛ e he ɔ ba nɛ a ba gbe Refa bi ɔmɛ ngɛ Ashterot Kiriataim, Zuz bi ɔmɛ ngɛ Ham, kɛ Em bi ɔmɛ ngɛ Kiriataim nga a nɔ.

6 Jehanɛ, a gbe Hor bi ɔmɛ hu ngɛ Edom yo ɔmɛ a nɔ, nɛ a nyɛɛ a se hluu kɛ ya si Elparan ngɛ nga a nya.

7 A kpale a se kɛ ba Kadesh nɛ sa a a tsɛɛ Enmishpat ɔ. A ye Amalek zugba a tsuo nɔ, nɛ a gbe Amor bi ɔmɛ nɛ ngɛ Hazazon Tamar a.

8 Kɛkɛ nɛ Sodom, Gomora, Adma, Zeboiim, kɛ Bela matsɛmɛ ɔmɛ ya bua a ta buli ɔmɛ a nya ngɛ Sidim Kɔ̃ ɔ mi,

9 nɛ a gba ta wo Elam matsɛ, Kedorlaomer; Goim matsɛ, Tidal; Babilonia matsɛ, Amrafel; kɛ Elasar matsɛ, Ariok. Matsɛmɛ enuɔ ɔmɛ, kɛ matsɛmɛ eywiɛ ɔmɛ hwu ta.

10 Muɔhi nɛ amã ngɛ a mi babauu ngɛ Sidim Kɔ̃ ɔ mi, nɛ benɛ Sodom kɛ Gomora matsɛmɛ ɔmɛ ngɛ fo tue ngɛ ta a nya a, a nɔɔ muɔ ɔmɛ a mi; se matsɛmɛ etɛ ɔmɛ nɛ piɛ ɔ, mɛ lɛɛ a tu fo kɛ ho yoku ɔmɛ a nɔ ya.

11 Matsɛmɛ eywiɛ ɔmɛ ha nɔ́ tsuaa nɔ́, kɛ niye ní tsuaa niye ní ngɛ Sodom kɛ Gomora kɛ je.

12 Abram wɔfase Lot ngɛ Sodom jamɛ a be ɔ mi; nɛ a ngɔ lɛ hu kɛ e níhi tsuo kɛ je.

13 Se nyumu ko nɛ tu fo kɛ je ta a mi ba bɔ Abram, Hebri no ɔ amaniɛ ngɛ e sihi he ɔ, ngɛ Amor no ɔ nɛ a tsɛɛ lɛ Mamre ɔ e tso ngua amɛ a kasa nya. Mamre kɛ e nyɛminyumuhi Eshkol kɛ Aner ɔ, huɛ bɔmi ko ngɛ a kɛ Abram a kpɛti.

14 Benɛ Abram nu kaa a ba nu e wɔfase Lot kɛ ho ɔ, e kɛ e tsɔli lafa etɛ kɛ nyɔngma kɛ kpaanyɔ nɛ a le ta hwumi hia ta kɛ nyɛɛ matsɛmɛ eywiɛ ɔmɛ a se kɛ ya su Dan tɔɔ.

15 E dla e we bi ɔmɛ kɛ wo kuuhi a mi, nɛ nyɔ mi ɔ, a ya tua a he nyɛli ɔmɛ nɛ a gbe mɛ basabasa. A fie mɛ kɛ je ma a mi kɛ ya si Hoba, ngɛ Damasko omleyi je.

16 Abram kpɔ ní ɔmɛ nɛ a ba ha a tsuo ngɛ he nyɛli ɔmɛ a dɛ. Jehanɛ, e wɔfase Lot, kɛ e ní ɔmɛ, kɛ e yi ɔmɛ, kɛ ni kpa amɛ nɛ a ba nuu ɔ hu, e nine su mɛ tsuo pɛpɛɛpɛ a nɔ.

Melkizedek gbaa Abram

17 Benɛ Abram ya ye Kedorlaomer kɛ matsɛmɛ nɛ piɛ e he ɔ a nɔ kunimi nɛ e kpale e se kɛ ma a, Sodom matsɛ ba kpee lɛ ngɛ Shave Kɔ̃ ɔ nɛ e biɛ kpa ji Matsɛ Kɔ̃ ɔ mi.

18 ⓝ Salem matsɛ, Melkizedek, nɛ lɛ kɛ̃ ji Mawu Hiɔwe No ɔ we osɔfo ɔ, ngɔ abolo kɛ wai ba ha Abram,

19 nɛ e gbaa lɛ, nɛ e de ke, “Mawu Hiɔwe No, Hiɔwe kɛ zugba bɔlɔ ɔ nɛ gbaa Abram!

20 Mawu Hiɔwe No nɛ ha o ye o he nyɛli ɔmɛ a nɔ ɔ, a je e yi!” Abram ha Melkizedek niha ní nɛ e ya kpɔ ɔ tsuo mi dlami nyɔngma mi kake.

21 Sodom matsɛ ɔ de Abram ke, “Ngɔɔ ta yibu ní ɔmɛ, se ye we bi ɔmɛ lɛɛ o kɛ mɛ tsuo ba ha mi.”

22 Abram he nɔ ke, “I na Mawu Hiɔwe No ɔ, nɔ nɛ pee hiɔwe kɛ zugba a,

23 kaa i be o nɔ́ ko nɔ́ ko ngɔe, kpa jio, tokota nya fimi nɔ́ jio; konɛ o ko ba de hwɔɔ se ko ke, ‘Imi lɛ i pee Abram niatsɛ.’

24 Imi nitsɛ i be nɔ́ ko nɔ́ ko ngɔe; nɔ́ nɛ nihewi ɔmɛ ye ɔ kɛkɛ hiɛ. Se nyumu ɔmɛ nɛ kɛ mi ya a, mɛɛ lɛɛ ha mɛ a blɔ fa mi ní. Mɛ ji Aner, Eshkol, kɛ Mamre.”