Odase yeli enyɔ ɔmɛ
1 ⓟ Jehanɛ ɔ, a ha mi tso ko nɛ maa hi kɛ nɔ́ susumi, nɛ a de mi ke, “Yaa nɛ o ya susu Mawu sɔlemi we ɔ, kɛ bɔ sami la tɛ ɔ, nɛ o kane nihi nɛ ngɛ Mawu jae ngɛ sɔlemi we ɔ mi.
2 ⓠ Se kue ɔ nɛ ngɛ sɔlemi we ɔ we agbo ɔ nya a lɛɛ ko susu. Si lɔ ɔ, ejakaa a ngɔ kɛ ha je ma amɛ, nɛ a ma si ako ngɛ ma klɔuklɔu ɔ mi nyɔhiɔ nyingmi eywiɛ kɛ enyɔ.
3 Ye we odase yeli enyɔ ɔmɛ ma bu kpekpe ya bo; nɛ ma ha a maa gba ligbi akpe kɛ e nya lafa enyɔ kɛ nyingmi ekpa.”
4 ⓡ Odase yeli enyɔ ɔmɛ ji oliv tso enyɔ ɔmɛ, kɛ kane tso enyɔ ɔmɛ nɛ daa si ngɛ Mawu, je ɔ tsuo nyɔmtsɛ ɔ hɛ mi ɔ nɛ.
5 Ke nɔ ko hla kaa e ye mɛ awi ɔ, la jeɔ a nya mi, nɛ e kpataa a he nyɛli ɔmɛ a hɛ mi; nɔ tsuaa nɔ nɛ ma hla kaa e ye mɛ awi ɔ, ja a gbe lɛ.
6 ⓢ Mawu ha mɛ he wami nɛ a ma nyɛ nga hiɔwe nya nɛ hiɔmi be nɛe be mi nɛ a ngɛ gbae ɔ. A ngɛ he wami ngɛ nyu nɔ kaa a ma ha nɛ nyu nɛ plɛ pee muɔ; a ngɛ he wami hulɔ kaa a kɛ gbenɔ hiɔ slɔɔtohi baa zugba a nɔ si abɔ nɛ a suɔ.
7 ⓣ Ke a gbe odase yemi ɔ nya a, lohwe awi yelɔ ɔ nɛ jeɔ muɔ voo ɔ mi ɔ kɛ mɛ ma ba hwu ta. E maa ye a nɔ, nɛ e maa gbe mɛ,
8 ⓤ nɛ a gbogboe ɔmɛ ma pue si ngɛ magbɛ nɔ, ngɛ ma nguaa a nɛ a sɛu a Nyɔmtsɛ ɔ ngɛ mi ɔ mi. A tsɛɛ jamɛ a ma a ngɛ abɛ gbi mi ke Sodom, loo Egipt.
9 Nɛ ma amɛ, wɛtso ɔmɛ, gbi slɔɔto ɔmɛ, kɛ je ma amɛ tsuo maa hi a gbogboe ɔmɛ hyɛe gaa kikɛ nɛ ɔ ligbi etɛ kɛ fa nɛ a be kplɛɛe nɛ a pu mɛ.
10 Nihi tsuo ngɛ je nɛ ɔ mi ɔ ma nya kaa nimli enyɔ nɛ ɔmɛ gbo. A tsui maa nɔ a mi, nɛ a maa ke a sibi ní, ejakaa jamɛ a gbali enyɔ ɔmɛ ngɔ haomi babauu kɛ ba je ɔ mi.
11 ⓥ Ligbi etɛ kɛ fa a se ɔ, Mawu ha nɛ a kpale ba wami mi ekohu. A te si da a nane nɔ, nɛ nihi tsuo nɛ na mɛ ɔ ye gbeye wawɛɛ.
12 ⓦ Jehanɛ ɔ, gbali enyɔ ɔmɛ nu gbi ko nɛ pɛ wawɛɛ kɛ je hiɔwe. Gbi ɔ de mɛ ke, “Nyɛɛ ba hiɛmɛ nɛ ɔ!” Nɛ benɛ a he nyɛli ɔmɛ ngɛ mɛ hyɛe ɔ, a ho hiɔwe ya ngɛ bɔku mi.
13 ⓧ Jamɛ a be ɔ nɔuu ɔ, zugba mimiɛ wawɛɛ; ma a mi dlami nyɔngma mi kake hɛ mi kpata, nimli akpe kpaago gbo, nɛ ni nɛmɛ nɛ piɛ ɔ ye gbeye, nɛ a wo Mawu nɛ ngɛ hiɔwe ɔ hɛ mi nyami.
14 Musu enyɔne ɔ se po; se hyɛ, musu etɛne ɔ ngɛ se kɛ ma!
Titimati kpaagone ɔ
15 ⓨ Jehanɛ ɔ, bɔfo kpaagone ɔ kpa e titimati ɔ, nɛ i nu gbihi nɛ ngɛ pɛe wawɛɛ ngɛ hiɔwe ke, “Amlɔ nɛ ɔ, wa Nyɔmtsɛ ɔ kɛ e Kristo ɔ nɛ a ngɛ je ɔ nɔ yee. Nɛ a maa ye matsɛ kɛ maa ya neneene!”
16 Kɛkɛ nɛ nikɔtɔma nyingmi enyɔ kɛ eywiɛ ɔmɛ nɛ hii si ngɛ a matsɛ sɛ ɔmɛ a nɔ ngɛ Mawu hɛ mi ɔ ngɔ a hɛ mi ngɔ bu si; nɛ a ja Mawu,
17 nɛ a de ke, “Nyɔmtsɛ Mawu Ope, Mo nɛ o ngɛ amlɔ nɛ ɔ, nɛ o hi si hyɛ hulɔ ɔ, Wa naa mo si kaa o tsu o he wami kpetekpleenyɛ ɔ he ní, nɛ o bɔni matsɛ yemi!
18 ⓩ Je ma amɛ a mi mi fu mo, se jehanɛ ɔ, be su nɛ mo hu o mi mi ma fu mɛ. Be su nɛ o maa kojo nihi tsuo nɛ gbo ɔ, nɛ o tsɔli nɛ ji gbali ɔmɛ, ni klɔuklɔu ɔmɛ, kɛ nimli wawihi kɛ nimli nguahi tsuo nɛ yee mo gbeye ɔ, be su nɛ o maa wo mɛ hiɔ. Nihi nɛ kpataa zugba a hɛ mi ɔ, be su nɛ o ma kpata mɛ hu a hɛ mi.”
19 ⓐ Mawu sɔlemi we ɔ nɛ ngɛ hiɔwe ɔ nya bli, nɛ a na e somi daka a nɛ fɔɔ si ngɛ lejɛ ɔ. Kɛkɛ nɛ oslabai gba; hiɔwe si, zugba mimiɛ, nɛ gbiɛ ngo ngu agboagbo nɛ pue zugba a nɔ.