Kpojemi 10

Mawu bɔfo ɔ kɛ womi kpo wayoo ɔ

1 Jehanɛ ɔ, i na Mawu bɔfo kpetekpleenyɛ kpa nɛ je hiɔwe kɛ ma. Bɔku bɔle lɛ kɛ kpe, nɛ alale ngɛ e yi je; e hɛ mi ngɛ kaa pu, nɛ e nanehi ngɛ kaa la titimahi.

2 E hɛɛ womi kpo wayoo ko nɛ a bli mi ngɛ e dɛ mi. E kɛ e hiɔ nane ma wo nɔ, nɛ e kɛ e muɔ nane ma zugba nɔ;

3 nɛ e kpa ngmlaa wawɛɛ kaa jata nɛ ngɛ huãe. Benɛ e pee ja a, hiɔwe wo gbi, nɛ e si si kpaago.

4 Benɛ hiɔwe si si kpaago ɔ, jinɛ i miɔ nɛ ma ngma nɔ́ nɛ a de ɔ. Se i nu nɛ gbi ko je hiɔwe de ke, “Nɔ́ nɛ hiɔwe simi kpaago ɔ de ɔ, kɛ to o yi mi; koo ngma!”

5 ⓝ Jehanɛ ɔ, bɔfo ɔ nɛ i na nɛ daa si, nɛ e nane kake ngɛ wo nɔ, nɛ kake hu ngɛ zugba nɔ ɔ, wo e hiɔ nine nɔ kɛ ya hiɔwe,

6 nɛ e ka kita ngɛ Mawu nɛ ngɛ kɛ yaa neneene ɔ biɛ mi. Lɛ nɛ e bɔ hiɔwe, kɛ zugba, kɛ wo, kɛ níhi tsuo nɛ ngɛ a mi. Bɔfo ɔ de ke, “Mawu be tsle toe hu!

7 Se ke bɔfo kpaagone ɔ kpa e titimati ɔ, yi mi nɛ Mawu to ngɔ laa, nɛ e de e tsɔli nɛ ji gbali ɔmɛ ɔ, Mawu ma ha nɛ e ba mi.”

8 ⓞ Kɛkɛ nɛ gbi nɛ i nu nɛ ngɛ munyu tue kɛ je hiɔwe ɔ kɛ mi tu munyu ekohu. E ke, “Bɔfo ɔ nɛ daa si, nɛ e nane kake ngɛ wo nɔ, nɛ kake hu ngɛ zugba nɔ ɔ, yaa nɛ o ya he womi kpo nɛ a bli mi ɔ ngɛ e dɛ.”

9 I ya bɔfo ɔ ngɔ, nɛ i ya de lɛ ke e ha mi womi kpo wayoo ɔ. E de mi ke, “Ngɔɔ nɛ o ye; e maa ngɔɔ dɔkɔdɔkɔ kaa hwo ngɛ o nya mi, se e maa doo ngɛ o mi mi.”

10 Kɛkɛ nɛ i sɔle womi kpo wayoo ɔ ngɛ bɔfo ɔ dɛ nɛ i ye. E ngɔ dɔkɔdɔkɔ kaa hwo ngɛ ye nya mi; se benɛ i mi ɔ, e doo ngɛ ye mi mi.

11 Nɛ a de mi ke, “Mawu sɛ gbi ɔ nɛ kɔɔ mahi, je mahi, gbihi, kɛ matsɛmɛ babauu a he ɔ, e sa kaa o fiɛ ekohu.”