Manyadali 4

Debora kɛ Barak

1 Ehud gbenɔ se ɔ, Israel bi ɔmɛ pee yayami kɛ si Yawɛ ekohu.

2 Lɔ ɔ he ɔ, Yawɛ ngɔ mɛ kɛ wo Kanaan matsɛ, Yabin nɛ ye matsɛ ngɛ Hazor ma a mi ɔ dɛ mi. E tatsɛ ji Sisera, nɛ lɛɛ e hi Haroshet ngɛ ma je li ɔmɛ a zugba a nɔ.

3 Yabin ngɛ dade ta zugba lɛ lafa nɛɛ, nɛ e wa Israel bi ɔmɛ yi mi jeha nyingmi enyɔ sɔuu. Nɛ Israel bi ɔmɛ fa kue ha Yawɛ.

4 Jamɛ a be ɔ mi ɔ, gbalɔyo ko ji nɔ nɛ ngɛ Israel ma a nya. Lɛ ji Lapidot yo Debora.

5 E pɔɔ si himi ngɛ tã ko sisi ngɛ Rama kɛ Betel a kpɛti, ngɛ Efraim yo ɔmɛ a nɔ. Israel bi ɔmɛ kɛ a sane yaa e ngɔ ngɛ lejɛ ɔ, nɛ e hyɛɛ mi ha mɛ.

6 Ligbi ko ɔ, e tsɔ ya tsɛ Abinoam binyumu Barak ngɛ Kedesh nɛ ngɛ Naftali ɔ kɛ ba, nɛ e de lɛ ke, “Yawɛ, Israel Mawu ɔ ngɛ mo fae ke, ‘Yaa nɛ o ya hla nyumuhi akpe nyɔngma kɛ je Naftali kɛ Zebulun wɛtso ɔmɛ a mi, nɛ o kɛ mɛ nɛ ba Tabor yo ɔ nɔ.

7 Ma ha Yabin tatsɛ Sisera kɛ e ta zugba lɛ ɔmɛ, kɛ e ta buli ɔmɛ kɛ mo ma ba kpe ngɛ Kishon pa a nya; nɛ ma ngɔ lɛ ngɔ wo o dɛ mi.’ ”

8 Barak de lɛ ke, “Ke o kɛ mi maa ya a, ma ya. Se ke o kɛ mi be yae ɔ, lɛɛ imi hu i be yae.”

9 Debora he nɔ ke, “I kɛ mo maa ya tsɔ. Se mohu blɔ nɛ o ngɛ hiae nɛ ɔ, hɛ mi nyami nɛ maa ba a be o nɔ́ pee; ejakaa Yawɛ maa ngɔ Sisera kɛ wo yo dɛ mi.” Kɛkɛ nɛ Debora te si nɛ e kɛ Barak je kɛ ho Kedesh ya.

10 Barak ya kpee Zebulun kɛ Naftali wɛtso ɔmɛ kɛ ho Kedesh ya; nɛ nyumuhi akpe nyɔngma nyɛɛ e se. Debora hu kɛ lɛ ho.

11 Jamɛ a be ɔ, Ken no ɔ nɛ a tsɛɛ lɛ Heber ɔ tsɔ e he kɛ je Ken bi, nɛ ji Mose ngatsɛ Hobab nina a a he; nɛ e ya ma e bo tsu ɔ ngɛ tso ngua a nɛ ngɛ Zaananim ɔ he, ngɛ Kedesh kasa nya tɔɔ.

12 Benɛ a ya bɔ Sisera amaniɛ kaa Abinoam binyumu Barak hia ta kɛ ho Tabor yo ɔ nɔ ya a,

13 Sisera bua e dade ta zugba lɛ lafa nɛɛ ɔ, kɛ e we bi ɔmɛ tsuo a nya, nɛ a hia kɛ je Haroshet ngɛ ma je li ɔmɛ a zugba a nɔ kɛ ho Kishon pa a nya ya.

14 Kɛkɛ nɛ Debora de Barak ke, “Tee si! Mwɔnɛ ligbi nɛ ɔ, Yawɛ ngɔ Sisera kɛ wo o dɛ mi. Anɛ pi Yawɛ nitsɛ nɛ hia kɛ nyɛɛ o hɛ mi kɛ yaa a lo?” Lɔ ɔ he ɔ, Barak kple Tabor yo ɔ, kɛ e we bi akpe nyɔngma amɛ ngɛ e se.

15 Benɛ Barak gba ta a, Yawɛ ha nɛ Sisera kɛ e ta zugba lɛ ɔmɛ, kɛ e tabo ɔmɛ tsuo jija, nɛ a kɛ klaate gbe mɛ pɛsɛpɛsɛ. Sisera nitsɛ lɛɛ e kple si kɛ je e ta zugba lɛ ɔ mi, nɛ e kɛ e nane to he.

16 Barak nyɛɛ ta zugba lɛ ɔmɛ, kɛ tabo ɔ a se kɛ ya su Haroshet ngɛ ma je li ɔmɛ a zugba a nɔ tɔɔ. Sisera ta buli ɔmɛ tsuo nɔ ngɛ klaate nya; e píɛ nɔ kake po.

17 Sisera tu fo kɛ ya sɛ Ken no, Heber e yo Yael bo tsu mi; ejakaa tue mi jɔmi ngɛ Hazor matsɛ, Yabin we ɔ, kɛ Ken no, Heber we ɔ a kpɛti.

18 Yael je kpo nɛ e kɛ Sisera ya kpe; nɛ e de lɛ ke, “Ye nyɔmtsɛ, moo ba! Moo sɛ ye bo tsu ɔ mi! Koo ye gbeye!” Kɛkɛ nɛ e sɛ bo tsu ɔ mi, nɛ Yael ngɔ sa nɔ bo kɛ ha e nɔ.

19 Sisera de lɛ ke, “I kpa mo pɛɛ, ha mi nyu bɔɔ nɛ ma nu; kuma ngɛ mi yee.” Yael bli lohwehi a he womi kotoku ko nɛ nyɔ nyu ngɛ mi nya, nɛ e ha lɛ eko nɛ e nu; nɛ e ngɔ sa nɔ bo kɛ ha e nɔ ekohu.

20 Lɔ ɔ se ɔ, Sisera de lɛ ke, “Yaa da si ngɛ bo tsu sinya a nya. Ke nɔ ko ba bi mo ke nɔ ko ngɛ hiɛ ɔ lo ɔ, de lɛ ke, ‘Dɛbi.’ ”

21 Sisera kɛ pɔ tɔtɔɛ hwɔ mahe vii. Kɛkɛ nɛ Heber e yo Yael ngɔ bo tsu plɛɛko kɛ hamle, nɛ e nyɛɛ blɛuu kɛ ho e ngɔ ya, nɛ e ya ka plɛɛko ɔ kɛ wo e tue si kɛ sɛ zu mi. Nɛ Sisera gbo.

22 Benɛ Barak nyɛɛ Sisera se kɛ ba lejɛ ɔ, Yael je kpo kɛ lɛ ba kpe; nɛ e de lɛ ke, “Ba nɛ ma tsɔɔ mo nyumu ɔ nɛ o ngɛ hlae ɔ.” Barak kɛ lɛ sɛ bo tsu ɔ mi, nɛ e na Sisera nɛ e gbo kɛ hwɔɔ si kɛ bo tsu tso plɛɛko ɔ nɛ a ka kɛ wo e tue si ɔ.

23 Mawu ha Israel bi ɔmɛ ye Kanaan matsɛ, Yabin nɔ jamɛ a ligbi ɔ.

24 Israel bi ɔmɛ kɛ kɔni si wami nyɛɛ Kanaan matsɛ, Yabin se kɛ ya si a kpata e hɛ mi pɛsɛpɛsɛ.