Manyadali 3

Je ma amɛ nɛ piɛ ɔ

1 Yawɛ si je ma komɛ, konɛ e ngɔ mɛ kɛ ka Israel bi nɛ a hwui ta hyɛ ngɛ Kanaan ɔ.

2 Yawɛ pee nɔ́ nɛ ɔ, bɔ nɛ pee nɛ Israel yi nɔ bimɛ nɛ maa ba ngɛ se ɔ, a tsɔɔ mɛ ta hwumi; titli ɔ, a ti ni nɛmɛ nɛ yɛ ta hyɛ ɔ.

3 Je ma amɛ ji Filisti bi a matsɛmɛ enuɔ ɔmɛ, Sidon bi, kɛ Hiv bi nɛ ngɛ Lebanon yo ɔmɛ a nɔ kɛ je Baal Hermon yo ɔ he kɛ ya si Hamat yo kpɛ blɔ ɔ nya.

4 A si mɛ, bɔ nɛ pee nɛ a ngɔ mɛ kɛ ka Israel, nɛ a hyɛ kaa a maa ye Yawɛ mlaa amɛ nɛ e wo a nɛmɛ ɔmɛ kɛ gu Mose nɔ ɔ a nɔ lo.

5 Lɔ ɔ he ɔ, Israel bi ɔmɛ hi Kanaan, Hit, Amor, Periz, Hiv, kɛ Yebus bi ɔmɛ a kpɛti.

6 A ngɔ ma je li ɔmɛ a biyihi, nɛ mɛ hu a kɛ a biyihi ha ma je li ɔmɛ a binyumuhi; nɛ a sɔmɔ a mawu ɔmɛ.

Otniel

7 Israel bi ɔmɛ a hɛ je Yawɛ, a Mawu ɔ nɔ; a pee yayami kɛ si lɛ, nɛ a ya sɔmɔ Baalhi kɛ Ashera.

8 Lɔ ɔ he ɔ, Yawɛ mi mi fu Israel, nɛ e ngɔ mɛ kɛ wo Mesopotamia matsɛ, Kushan Rishataim dɛ mi; nɛ Israel bi ɔmɛ sɔmɔ Kushan Rishataim jeha kpaanyɔ.

9 Se Israel bi ɔmɛ fa kue ha Yawɛ, nɛ Yawɛ je nyumu ko ha mɛ, nɛ e ba kpɔ mɛ. Lɛ ji Otniel, Kaleb senɔ nyumu Kenaz binyumu ɔ.

10 Yawɛ mumi ɔ ba e nɔ, nɛ e nyɛɛ Israel ma a hɛ mi. E gba ta, nɛ Yawɛ ngɔ Mesopotamia matsɛ, Kushan Rishataim ngɔ wo e dɛ mi nɛ e ye e nɔ.

11 Zugba a nɔ jɔ jeha nyingmi eywiɛ. Nɛ Kenaz binyumu Otniel ba gbo.

Ehud

12 Israel bi ɔmɛ pee yayami kɛ si Yawɛ ekohu. Enɛ ɔ he je ɔ, Yawɛ ya piɛ Moab matsɛ, Eglon he, nɛ e kɛ Israel to ní.

13 Matsɛ Eglon, kɛ Amon bi ɔmɛ, kɛ Amalek bi ɔmɛ pee kake kɛ ya tua Israel bi ɔmɛ. A ye a nɔ, nɛ a ngɔ ma a nɛ tãhi ngɛ mi ɔ.[2]

14 Nɛ Israel bi ɔmɛ sɔmɔ Moab matsɛ, Eglon jeha nyɔngma kɛ kpaanyɔ.

15 Se Israel bi ɔmɛ fa kue ha Yawɛ, nɛ Yawɛ je kpɔlɔ ko ha mɛ. Lɛ ji Ehud, Benyamin no Gera binyumu ɔ; muɔtsɛ ji lɛ. Israel bi ɔmɛ tsɔ lɛ Moab matsɛ, Eglon ngɔ kɛ nike níhi.

16 Ehud sɔ klaate nya enyɔtsɛ, nɛ e kami ji nine mi blimi enyɔ. E fi klaate ɔ kɛ wo e hiɔ nɔ fiɔ he, ngɛ e tade ɔ sisi,

17 nɛ e ngɔ nike ní ɔmɛ kɛ ya ha Moab matsɛ, Eglon. Eglon ɔ, nɔmlɔ nɛ wo lo saminya ji lɛ.

18 Benɛ Ehud ngɔ nike ní ɔmɛ kɛ ya ha lɛ se ɔ, e wo nihi nɛ tloo nike ní ɔmɛ kɛ ya a blɔ.

19 Se lɛ nitsɛ lɛɛ benɛ e su amaga amɛ a he ngɛ Gilgal ɔ, e kpale e se kɛ ba Eglon ngɔ, nɛ e ba de lɛ ke, “Nɛnɛ, i ngɛ laami sane ko nɛ ma de mo.” Matsɛ ɔ fa ke lejɛ ɔ nɛ e jɔ dii; kɛkɛ nɛ e tsɔli ɔmɛ tsuo je lejɛ ɔ.

20 Jehanɛ, benɛ lɛ matsɛ ɔ nɔ kake too e hii si ngɛ e hiɔwe tsu nɛ e mi jɔ ɔ mi ɔ, Ehud ba e ngɔ nɛ e ba de lɛ ke, “I hɛɛ sɛ ko kɛ je Mawu ngɔ kɛ ma mo hami.” Matsɛ ɔ te si pam!

21 Kɛkɛ nɛ Ehud ngɔ e muɔ nine kɛ hia klaate ɔ ngɛ e hiɔ nɔ fiɔ he, nɛ e kɛ klaate ɔ gbɔ matsɛ ɔ muklii mi.

22 Klaate ɔ kɛ e yi ɔ tsuo sɛ e muklii ɔ mi, nɛ zɔ ha he. Ehud si klaate ɔ ngɛ matsɛ ɔ muklii ɔ mi; nɛ fĩ je mi pue si.

23 Kɛkɛ nɛ Ehud gu asa a nɔ kɛ je kpo. E nga hiɔwe tsu ɔ sinya amɛ, nɛ e ngmɛ a mi ngɛ se.

24 Benɛ Ehud je lejɛ ɔ, nɛ Matsɛ Eglon tsɔli ɔmɛ ba nɛ a ba na kaa a ngmɛ hiɔwe tsu ɔ sinya amɛ a mi ɔ, a de ngɛ a yi mi ke, “Be nɛ ɔ mi e ho nane nɔ ya ngɛ tsu nɛ mi jɔ ɔ mi.”

25 A mlɛ lɛ hluu kɛ ya si a pa li bɔ nɛ a maa pee ha. Se nɛ a na kaa loloolo ɔ, e bli we hiɔwe tsu ɔ sinya a, a ya ngɔ safe nɛ a kɛ ba bli lɛ. Nɛ́ a ke a hyɛɔ ɔ, a nyɔmtsɛ ɔ ji nɛ ɔ nɛ e gbo kɛ fɔɔ si ngɛ zugba.

26 Benɛ matsɛ ɔ tsɔli ɔmɛ ngɛ mlɛe ɔ, Ehud je momo; e ya be ngɛ he nɛ amaga amɛ ngɛ ɔ, nɛ e tsa nɔ kɛ ho Seira ya.

27 Benɛ e ya su Efraim yo ɔmɛ a nɔ ɔ, e kpa titimati, nɛ e nyɛɛ Israel bi ɔmɛ a hɛ mi kɛ kple yoku ɔ.

28 E de mɛ ke, “Nyɛɛ nyɛɛ ye se! Yawɛ ngɔ nyɛ he nyɛli, Moab bi ɔmɛ kɛ wo nyɛ dɛ mi.” Nɛ a nyɛɛ e se kɛ ya ngɔ he nɛ a poo Yordan pa a ngɛ kɛ yaa Moab ɔ; a ha we nɛ nɔ ko nɔ ko nɛ po pa a.

29 Jamɛ a ligbi ɔ, a gbe Moab bi a ta buli kpanakpanaa, kɛ katsɛmɛ maa pee akpe nyɔngma; nɔ kake ngmelu po ji mi.

30 Israel ye Moab nɔ kunimi jamɛ a ligbi ɔ. Nɛ zugba a nɔ jɔ jeha nyingmi kpaanyɔ.

Shamgar

31 Ehud se ɔ, Anat binyumu Shamgar ba. Lɛ hu e kɛ na tsɔmi tso gbe Filisti bi lafa ekpa, nɛ e kɛ he Israel yi wami.