Manyadali 15

1 Pee se benɛ ngma kpami be su ɔ, Samson ya nɛ e ya slaa e yo ɔ. E hɛɛ apletsi bɔbɔyoo ko kɛ to e dɛ kaa nike ní. E de e ngatsɛ ɔ ke, “Ma ya ye yo ɔ ngɔ ngɛ se tsu ɔ mi.” Se e ngatsɛ ɔ ngmɛ́ lɛ blɔ nɛ e sɛ tsu ɔ mi.

2 E de Samson ke, “Jinɛ i susu kaa o sume yo ɔ hu, lɔ ɔ he ɔ, i ngɔ lɛ ngɔ ha o huɛ ɔ. O yo ɔ senɔ ɔ po he ngɛ fɛu pe lɛ. I kpa mo pɛɛ nɛ o ngɔ lɛ ngɔ to nɔkɔtɔma a nane mi.”

3 Samson de ke, “Jehanɛ lɛɛ ke i pee Filisti bi ɔmɛ yayami ko ɔ, a musu be mi tlooe.”

4 Kɛkɛ nɛ Samson ho nɛ e ya nuu kɔkɔbo lafa etɛ. E tsa enyɔ tsuaa enyɔ hlemi kɛ bla, nɛ e kɛ jatɛ hɔɔ kpɔ ɔmɛ a mi.

5 Lɔ ɔ se ɔ, e su jatɛ ɔmɛ, nɛ e ngmɛɛ kɔkɔbo ɔmɛ a he kɛ wo Filisti bi ɔmɛ a ngma ngmɔ ɔmɛ a mi; nɛ ngma nɛ a bua nya kuu, kɛ ní nɛmɛ nɛ daa si, kɛ oliv tso abɔɔ ɔmɛ tsuo kulaa sã.

6 Benɛ Filisti bi ɔmɛ bi si ke, “Mɛnɔ lɛ pee nɔ́ nɛ ɔ?” a de ke, “Samson lɛ pee; ejakaa e ngatsɛ, Timna no ɔ ngɔ Samson yo ɔ ngɔ ha Samson huɛ ɔ.” Lɔ ɔ he ɔ, Filisti bi ɔmɛ ho nɛ a ya sã yo ɔ kɛ e tsɛ ɔ tsuo.

7 Samson de mɛ ke, “Ke kikɛ nɛ ɔ nyɛ peeɔ nyɛ níhi ɔ, lɛɛ i na Mawu kaa imi hu ja i pee nyɛ ngɔ to nya loko ma kpa.”

8 Samson ya tua mɛ, nɛ e gbe mɛ pɛsɛpɛsɛ. Lɔ ɔ se ɔ, e ho nɛ e ya hi Etam tɛ sa puɔ ɔ mi.

Samson ye Filisti bi ɔmɛ a nɔ

9 Pee se ɔ, Filisti bi ɔmɛ ya bua a he nya ngɛ Yuda, nɛ a je lejɛ ɔ kɛ ya tua Lehi.

10 Yuda bi ɔmɛ bi mɛ ke, “Mɛni he je nyɛ ba tua wɔ ɔ?” Nɛ a he nɔ ke, “Wa ba Samson fimi nɛ wa ya pee lɛ kaa bɔ nɛ lɛ hu e pee wɔ ɔ.”

11 Kɛkɛ nɛ Yuda nyumuhi akpe etɛ pue nɔ kɛ ho Etam tɛ sa puɔ ɔ he ya nɛ a ya bi Samson ke, “Anɛ o li kaa Filisti bi ɔmɛ lɛ a ngɛ wa nɔ yee lo? Mɛni o pee wɔ nɛ ɔ?” E de mɛ ke, “Bɔ nɛ a pee mi ɔ, ja imi hu i pee mɛ ɔ nɛ.”

12 A de lɛ ke, “Wa ma mo fimi nɛ waa ngɔ mo ya wo Filisti bi ɔmɛ a dɛ mi.” Samson de mɛ ke, “Nyɛ ka mi kita kaa nyɛ nitsɛmɛ nyɛ be mi nɔ́ ko pee.”

13 A de lɛ ke, “Dɛbi, wa be mo gbee. Pe wa maa fi mo kɛkɛ nɛ waa ngɔ mo ya wo a dɛ mi.” Kɛkɛ nɛ a ngɔ tangme he enyɔ kɛ fi lɛ, nɛ a kɛ lɛ je tɛ sa a mi kɛ ba.

14 Benɛ e ba su Lehi ɔ, Filisti bi ɔmɛ he ose kɛ ba na lɛ. Tlukaa a, Yawɛ mumi ɔ ba e nɔ wawɛɛ nitsɛ, nɛ e tsɔ tangme ɔmɛ nɛ blaa e nine ɔ pue si kaa doti nɛ la sɛ mi.

15 Kɛkɛ nɛ e na teji ko nɛ gbo kɛ we tsitsa mi wu. E ba si nɛ e kɛ̃, nɛ e kɛ gbe nyumuhi akpe.

16 Nɛ Samson de ke, “I ngɔ teji tsitsa wu kɛ gbe nyumuhi akpe; i ngɔ teji tsitsa wu kɛ tsɔtslɔɔ a mi pue si.”

17 Benɛ e tu munyu ɔ ta a, e sake tsitsa wu ɔ ngɔ fɔ he. Nɛ a wo lejɛ ɔ biɛ ke Ramat Lehi.[4]

18 Jehanɛ, kuma ba ye Samson wawɛɛ nitsɛ; nɛ e fa kue ha Yawɛ nɛ e de ke, “O tsu manye ní tsumi nguaa nɛ ɔ kɛ gu o tsɔlɔ ɔ nine nɔ. Anɛ kuma nɛ gbe mi, nɛ mɔmlɔtɔtsɛmɛ nɛ ɔmɛ a nine nɛ su ye nɔ lo?”

19 Kɛkɛ nɛ Mawu bli muɔ nyafii ko nɛ ngɛ Lehi ɔ nya, nɛ nyu je mi kɛ ba. Benɛ Samson nu nyu ɔ, e hɛ mi tsɔ lɛ; nɛ e na he wami ekohu. Lɔ ɔ he ɔ, a wo lejɛ ɔ biɛ ke Hakore,[5] nɛ e ngɛ Lehi kɛ ba si mwɔnɛ ɔ.

20 Samson da Israel ma a nya jeha nyingmi enyɔ be mi nɛ Filisti bi ɔmɛ ngɛ zugba a nɔ yee ɔ.