Manyadali 10

Tola

1 Abimelek gbenɔ se ɔ, Pua binyumu Tola, Dodo bibi ɔ ba he Israel yi wami. Tola je Isakar wɛtso ɔ mi, nɛ e hi Shamir ngɛ Efraim yo ɔmɛ a nɔ.

2 E da Israel ma a nya jeha nyingmi enyɔ kɛ etɛ. Nɛ e gbo, nɛ a pu lɛ ngɛ Shamir.

Yair

3 Tola se ɔ, Yair, Gilead no ɔ ba. Lɛɛ e da Israel ma a nya jeha nyingmi enyɔ kɛ enyɔ.

4 E ngɛ binyumuhi nyingmi etɛ nɛ a hii teji nyingmi etɛ a nɔ. Jehanɛ, a ngɛ ma nyingmi etɛ ngɛ Gilead zugba a nɔ; nɛ kɛ ba si mwɔnɛ ligbi nɛ ɔ, biɛ nɛ a kɛ tsɛɔ ma amɛ ji Yair kɔpehi.

5 Yair ba gbo, nɛ a pu lɛ ngɛ Kamon.

Yefta

6 Israel ma a pee yayami kɛ si Yawɛ ekohu. A ya sɔmɔ Baalhi, Ashtarot, kɛ Siria, Sidon, Moab, Amon, kɛ Filisti bi ɔmɛ a mawu ɔmɛ. Se Yawɛ nitsɛ lɛɛ a kua lɛ, nɛ a kpa lɛ sɔmɔmi.

7 Enɛ ɔ he je ɔ, Yawɛ mi mi fu Israel, nɛ e ngɔ mɛ kɛ wo Filisti bi ɔmɛ, kɛ Amon bi ɔmɛ a dɛ mi.

8 A hao Israel bi tsuo nɛ ngɛ Amor bi a zugba a nɔ, ngɛ Yordan pa a se, ngɛ Gilead ɔ wawɛɛ nitsɛ, nɛ a wa mɛ yi mi jeha nyɔngma kɛ kpaanyɔ sɔuu.

9 Jehanɛ se hu, Amon bi ɔmɛ po Yordan pa a, nɛ a kɛ Yuda, Benyamin, kɛ Efraim wɛtso ɔmɛ ya hwu ta. Nɔ́ nɛ ɔ ha nɛ Israel yi fi wawɛɛ nitsɛ.

10 Kɛkɛ nɛ Israel ma a fa kue ha Yawɛ, nɛ a de ke, “Wa pee mo yayami; ejakaa wa si mo, wa Mawu ɔ, nɛ wa ya sɔmɔ Baalhi.”

11 Yawɛ de Israel ma a ke, “Egipt, Amor, Amon, Filisti,

12 Sidon, Amalek, kɛ Maon bi ɔmɛ wa nyɛ yi mi be ko nɛ be ɔ, nɛ nyɛ fa kue ha mi. Anɛ i je we nyɛ kɛ ji a dɛ mi lo?

13 Se nyɛɛ lɛɛ nyɛ kua mi, nɛ nyɛ ya sɔmɔ mawu kpahi. Enɛ ɔ he je ɔ, imi hu i be nyɛ yi wami hee hu.

14 Nyɛɛ ya nɛ nyɛ ya kpa ngmlaa kɛ tsɛ mawu ɔmɛ nɛ nyɛ hla kɛ ha nyɛ he ɔ; nyɛ ha nɛ a he nyɛ yi wami ngɛ nyɛ we amanehlu be nɛ ɔ mi!”

15 Se Israel ma a de Yawɛ ke, “Wa pee yayami! Moo lɛɛ moo pee nɔ́ tsuaa nɔ́ nɛ o suɔ; wa kpa mo pɛɛ, mo he wa yi wami mwɔnɛ ligbi nɛ ɔ!”

16 Lɔ ɔ he ɔ, a je mawu kpa amɛ kɛ je a kpɛti, nɛ a sɔmɔ Yawɛ. Amanehlu nɛ Israel bi ɔmɛ ngɛ nae ɔ hao Yawɛ.

17 Jehanɛ, Amon bi ɔmɛ dla a he kɛ ha ta hwumi, nɛ a ya bua a he nya ngɛ Gilead. Israel bi ɔmɛ hu ya bua a he nya ngɛ Mizpa.

18 Lejɛ ɔ lɛ Israel ma a, kɛ ma nikɔtɔma amɛ bi a he ngɛ ke, “Mɛnɔ maa da ta a nya kɛ kpee Amon bi ɔmɛ?” A ya nɔ nɛ a de ke, “Nyumu nɛ ma nyɛ pee nɔ́ nɛ ɔ, lɛ ji nɔ nɛ ma ba da Gilead ma a tsuo nya.”