Hebri Bi 9

Mawu jami ngɛ hiɔwe kɛ zugba

1 Kekleekle somi ɔ hɛɛ blɔ nya tomi nɛ a kɛ ma ja Mawu, kɛ he ko hulɔ nɛ adesa pee nɛ ngɛ klɔuklɔu nɛ a ma ja Mawu ngɛ.

2 ⓛ A ma bo tsu, nɛ a po mi enyɔ. A tsɛɛ bo tsu ɔ he nɛ a guu kɛ sɛɛ mi ɔ he klɔuklɔu. Kane tso, kɛ okplɔɔ kɛ e nɔ abolo klɛdɛɛ ɔ ngɛ lejɛ ɔ.

3 ⓜ A tsɛɛ tsu mi pomi bo enyɔne ɔ se bo tsu ɔ he klɔuklɔu pe kulaa.

4 ⓝ Níhi nɛ ngɛ tsu nɛ ɔ mi ji tsopa kɛ e he via sami la tɛ nɛ a kɛ sika tsu pee ɔ, somi daka a nɛ a kɛ sika tsu ha he ɔ kɛ e mi sika tsu kplu ɔ nɛ mana a ngɛ mi ɔ, Aaron dɛma tso ɔ nɛ tsɛ̃ ba be ko ɔ, kɛ tɛ tɛtlɛɛ enyɔ ɔmɛ nɛ a ngma mlaa amɛ ngɛ a nɔ ɔ.

5 ⓞ Kerubhi nɛ tsɔɔ Mawu hɛ mi nyami ɔ daa si ngɛ somi daka nya nɔ́ ɔ nɔ, nɛ a gbɛ a pɛlihi a mi ngɛ he nɛ a kɛ tɔmi paa ngɛ ɔ. Se wa be nyɛe ma gba níhi a mi fitsofitso amlɔ nɛ ɔ.

6 ⓟ Ke a to níhi blɔ nya kikɛ nɛ ɔ, osɔfo ɔmɛ yaa kekleekle bo tsu ɔ mi daa ligbi ya tsuɔ a jami blɔ nya ní.

7 ⓠ Se bo tsu enyɔne ɔ lɛɛ osɔfo nɔkɔtɔma pe kulaa a pɛ lɛ yaa lejɛ ɔ si kake ngɛ jeha mi. Pohu ja e hɛɛ lohwe muɔ kɛ ya ngɛ yayami nɛ lɛ nitsɛ e pee, kɛ yayamihi nɛ ma a li a he be nɛ a pee ɔ a he.

8 Nɔ́ nɛ Mumi Klɔuklɔu ɔ ngɛ tsɔɔe ngɛ blɔ nya tomi nɛ ɔmɛ a mi ji kaa be abɔ nɛ kekleekle bo tsu ɔ maa si kɛ mwɔɔ ɔ, lɛɛ a na we nɛ a bli blɔ nɛ a guu kɛ yaa he klɔuklɔu pe kulaa a lolo.

9 Enɛ ɔ tsuo ji okadi nɛ kɔɔ mwɔnɛmwɔnɛ ɔ si himi he. E tsɔɔ kaa nike níhi, kɛ bɔ ɔmɛ nɛ a sãã kɛ haa Mawu ɔ be nyɛe ma ha nɛ nɔ nɛ ma Mawu jami ɔ tsui mi ma tsɔ bɔ nɛ sa;

10 ejakaa niye ní, kɛ dã, kɛ he tsumi kusumihi pɛ a he nɛ e kɔɔ. Enɛ ɔmɛ tsuo ɔ, he lo blɔ fa mi níhi nɛ maa hi si kɛ yaa si be nɛ Mawu maa pee níhi tsuo ehe kɛkɛ.

11 Se Kristo ba kaa osɔfo nɔkɔtɔma pe kulaa kɛ ha blɔ nya tomi kpakpa nɛ wa na nɛ ɔ. Bo tsu nɛ e sɔmɔɔ ngɛ mi ɔ kle, nɛ e hi kɛ pi si. Pi adesa nɛ pee, nɛ tsɔɔ kaa pi je nɛ ɔ mi níhi nɛ a bɔ ɔ eko.

12 Benɛ Kristo gu bo tsu ɔ mi kɛ ya sɛ he klɔuklɔu pe kulaa a, e pee nɔ́ nɛ ɔ si kake nyɔngloo. Pi to, loo na muɔ nɛ e kɛ sã bɔ ɔ; mohu ɔ, e ngɔ lɛ nitsɛ e muɔ ngɔ ha, konɛ e kɛ he wa yi wami kɛ ya neneene.

13 ⓡ To kɛ na muɔ, kɛ na bi nɛ a sã a la zu ji níhi nɛ a kɛ fĩaa nihi nɛ ble a he ɔ a nɔ, nɛ a kɛ tsuɔ a nɔmlɔ tso ɔ he ngɛ he lo blɔ fa mi.

14 Ke enɛ ɔmɛ ngɛ mi niinɛ ɔ, lɛɛ Kristo muɔ nɛ e gu Mumi Klɔuklɔu nɛ ngɛ daa a nɔ nɛ e kɛ pue si ɔ tsu ní kulaa pe jã. Bɔ ɔ nɛ Kristo nɛ sé ko be e he ɔ ngɔ e he kɛ sã, nɛ e gbo ngɛ wa he ɔ ma ha nɛ wa ma je wa hɛ kɛ je kusumihi nɛ a he be se nami ɔ a he, nɛ wa ma sɔmɔ Mawu hɛ kalɔ ɔ.

15 Nɔ́ nɛ Kristo tsu nɛ ɔ tsɔɔ kaa lɛ Kristo ɔ ji nɔ nɛ ha Mawu kɛ e ma a so somi he ɔ, konɛ nihi nɛ Mawu tsɛ mɛ ɔ, a nine nɛ su neneene gbosi ní nɛ Mawu wo he si ɔ nɔ. Ejakaa benɛ a kɛ kekleekle somi ɔ ngɛ ní tsue ɔ, nɔ ko ba gbo nɛ e kɛ kpɔ nihi tsuo nɛ pee yayami jamɛ a be ɔ.

16 Loko a maa ngɔ nɔ ko gbosi ní yemi he blɔ nya tomi womi kɛ tsu ní ɔ, e hia kaa a ye odase kaa niinɛ nɔ ɔ be je mi hu.

17 Ejakaa ke nɔ ko ngɛ je mi ɔ, gbosi ní yemi blɔ nya tomi womi nɛ e pee ɔ, a kɛ tsu we ní; ja e gbo.

18 Enɛ ɔ he je nɛ kekleekle somi ɔ po muɔ a kɛ ma nɔ mi ɔ nɛ.

19 ⓢ Kekleekle ɔ, Mose tsɔɔ ma a mlaa amɛ tsuo nɛ Mawu wo ɔ kaa bɔ nɛ mlaa a nitsɛ tsɔɔ ɔ. Lɔ ɔ se ɔ, e ngɔ nga nɛ a fi kɛ bla kaa bɛ, kɛ jijɔ he bwɔmi tsutsuu kɛ sɔ na kɛ to muɔ, kɛ nyu, nɛ e kɛ fĩa womi kpo ɔ nitsɛ, kɛ ma mluku ɔ tsuo a nɔ.

20 Benɛ e ngɛ nɔ́ nɛ ɔ pee ɔ, e de ma a ke, “Somi nɛ Mawu kɛ nyɛ so ɔ, muɔ nɛ a kɛ sɔu nya ji nɛ ɔ nɛ.”

21 ⓣ Bo tsu ɔ, kɛ kplu ɔmɛ nɛ a kɛ jaa Mawu ɔ, Mose ngɔ muɔ kɛ fĩa mɛ tsuo a nɔ jã nɔuu.

22 ⓤ Niinɛ, ngɛ mlaa a nya a, muɔ ji nɔ́ nɛ tsuɔ níhi tsuo a he; nɛ ke a pue we muɔ si ɔ, a kɛ yayami pɛ.

Kristo ngɔ e he kɛ sã bɔ kɛ je wa he yayami

23 Lɔ ɔ he ɔ, je nɛ ɔ mi níhi nɛ ji hiɔwe ní ɔmɛ a henɔ ɔ lɛ e sa kaa a peeɔ kusumi kaa jã kɛ tsuɔ a he. Se hiɔwe ní nitsɛnitsɛ ɔmɛ lɛɛ e hia kaa a pee kusumi nɛ hi pe ja kulaa nɛ a kɛ tsu a he.

24 Ejakaa Kristo ɔ, pi he klɔuklɔu pe kulaa nɛ a kɛ nine pee, nɛ ji nɔ́ nitsɛ ɔ henɔ kɛkɛ ɔ mi nɛ e ya. Mohu ɔ, hiɔwe nitsɛnitsɛ nɛ e ho; nɛ amlɔ nɛ ɔ, e ngɛ lejɛ ɔ ngɛ Mawu hɛ mi ngɛ wa he.

25 Yuda osɔfo nɔkɔtɔma pe kulaa a yaa he klɔuklɔu pe kulaa a daa jeha kɛ muɔ nɛ pi lɛ nitsɛ e nɔ. Se Kristo ya lejɛ ɔ, pi nɛ e ngɔ e he ya sã bɔ si abɔ.

26 Kaa jã a, jinɛ kɛ je be nɛ a bɔ je ɔ, amanehlu sɔuu Kristo maa hi nae kpitikpiti. Mohu ɔ, amlɔ nɛ ɔ nɛ je mi nyagbe miɔ nɛ e maa su ɔ, Yesu ba je e he kpo si kake nyɔngloo. E ngɔ e he kɛ sã bɔ kɛ je wa he yayami.

27 Mawu to kaa adesa nɛ gbo si kake, nɛ lɔ ɔ se ɔ, a kojo lɛ.

28 ⓥ Jã nɔuu Kristo hu a ngɔ lɛ kɛ sã bɔ si kake pɛ, konɛ e kɛ je adesa he yayami. E maa ba si enyɔne ɔ, pi nɛ e ba tsu yayamihi a he ní hu, se mohu e ma ba he nihi nɛ ngɛ lɛ blɔ hyɛe wawɛɛ ɔ a yi wami.