Hebri Bi 10

1 Yuda bi ɔmɛ a mlaa a ngɛ kaa ní kpakpahi nɛ hi kɛ pi si nɛ maa ba hwɔɔ se ɔ a nini kɛkɛ, pi ní ɔmɛ nitsɛmɛ. Lɛɛ kɛ a maa pee kɛ gu kikɛmɛ a bɔ kake too nɛ a hii sãe nɔtonɔto daa jeha a nɔ kɛ tsu nihi nɛ baa Mawu ngɔ ɔ a he nɛ a hi kɛ pi si kɛɛ?

2 Nihi nɛ jaa Mawu ɔ, kaa a je a he yayami ɔmɛ niinɛ ɔ, a he nile be mɛ fɔ bue ngɛ a he yayami he hu, nɛ e be hiae kaa a sã bɔ hu.

3 Se anɔkuale mi ɔ, bɔhi nɛ a sãã daa a haa nɛ a kaiɔ a he yayami ɔmɛ mohu.

4 Ejakaa na muɔ, kɛ to muɔ be nyɛe ma je yayami gblegbleegble.

5 ⓦ Enɛ ɔ he je ɔ, benɛ Kristo ma je ɔ mi ɔ, e de Mawu ke, “Bɔ nɛ a sãã, kɛ nike ní ɔ, o hla we, se o ha mi nɔmlɔ tso.

6 Sami bɔ, kɛ yayami pami bɔ ɔ, o bua jɔɛ he.

7 Kɛkɛ nɛ i de ke, ‘Mawu, ne mi! I ba konɛ ma ba pee o suɔmi nya ní kaa bɔ nɛ ngmami ɔ deɔ ngɛ ye he ngɛ mlaa womi ɔ mi ɔ.’ ”

8 Kekleekle ɔ, Kristo de Mawu ke, “Bɔ, kɛ nike ní ɔ, o hla we; sami bɔ, kɛ yayami pami bɔ ɔ, o na we he bua jɔmi.” E de enɛ ɔ, pohu bɔhi nɛ a sãã a, mlaa a nya a sãã ngɛ.

9 Jehanɛ hu, e de ke, “Mawu, ne mi! I ba, konɛ ma ba pee o suɔmi nya ní.” Lɔ ɔ he ɔ, bɔhi tsuo nɛ a sãã blema a, Mawu po mi, nɛ e ngɔ Kristo nɔ́ ɔ kɛ to nane mi.

10 Yesu Kristo pee Mawu suɔmi nya ní; e ngɔ e nɔmlɔ tso ɔ kɛ sã bɔ si kake too nyɔngloo, nɛ e kɛ je wɔ tsuo wa he yayami.

11 ⓧ Yuda osɔfo tsuaa Yuda osɔfo ɔ, e ní tsumi ji kaa e sã bɔ kake too ɔ si abɔ daa ligbi; se bɔ ɔmɛ nyɛ we nɛ a jeɔ yayami gblegbleegble.

12 ⓨ Se Kristo lɛɛ bɔ kake too e ngɔ e he kɛ sã kɛ je yayami kɛ yaa neneene, nɛ e ya hi si ngɛ Mawu hiɔ nɔ.

13 Lejɛ ɔ nɛ e ngɛ mlɛe ngɛ kɛ yaa si Mawu maa ngɔ e he nyɛli ɔmɛ kɛ pee nɔ́ nɛ e kɛ e nane maa nɔ.

14 Enɛ ɔ tsɔɔ kaa bɔ kake too ɔ nɛ Kristo ngɔ e he kɛ sã a ha nɛ nihi tsuo nɛ Mawu tsu a he ɔ hi kɛ pi si kɛ yaa neneene.

15 Mumi Klɔuklɔu ɔ hu yeɔ enɛ ɔ he odase. Kekleekle ɔ, e de ke,

16 ⓩ “Be ma nɛ i kɛ ye ma a maa so somi nɛ ɔ: Ma ngɔ ye mlaa kɛ to a tsui mi, nɛ ma ngma kɛ wo a juɛmi mi.”

17 ⓐ E de hu ke, “A he yayami ɔmɛ, kɛ mlaa nɔ tɔmihi nɛ a pee ɔ, i be kaie hu.” Nyɔmtsɛ ɔ lɛ de.

18 Lɔ ɔ he ɔ, ke Mawu ngɔ nihi a he yayami kɛ pa kikɛ nɛ ɔ, e he hia we hu kaa a sã bɔ kɛ je yayami hu.

Nyɛ ha waa hɛ wɔ kɛ su Mawu he

19 Ye nyɛmimɛ, kɛ gu Kristo gbenɔ ɔ nɔ ɔ, wa ngɛ he blɔ faa nɛ wa yaa he klɔuklɔu pe kulaa a.

20 Yesu gu tsu mi pomi bo nɛ ji lɛ nitsɛ e nɔmlɔ tso ɔ mi nɛ e bli blɔ he nɛ yaa wami mi ha wɔ.

21 Wa ngɛ osɔfo nɔkɔtɔma pe kulaa nɛ hyɛɔ Mawu we ɔ nɔ.

22 ⓑ Lɔ ɔ he ɔ, nyɛ ha nɛ waa ngɔ tsui nɛ mi tsɔ, kɛ hemi kɛ yemi nɛ pi si kɛ hɛ wɔ kɛ su Mawu he. Nyɛ ha a tsu wa tsui he bɔ nɛ wa he nile be wɔ fɔ bue, nɛ́ waa pee kaa nihi nɛ a kɛ nyu nɛ mi tsɔ heii du a he.

23 Nɔ́ nɛ wa ngɔ wa hɛ ngɔ fɔ nɔ, nɛ wa yeɔ he odase ɔ, nyɛ ha waa pɛtɛ he nɛ wa nɛ wa ko mimiɛ, ejakaa Mawu nɛ wo si ɔ, anɔkualetsɛ ji lɛ.

24 Nyɛ ha waa kɛ hɛdɔ nɛ susu he bɔ nɛ sa, nɛ waa suɔ wa sibi, nɛ waa pee wa sibi kpakpa.

25 Nyɛ ko ha wa jɔɔ wa he nya buami kaa bɔ nɛ ni komɛ hlaa peemi ɔ. Mohu ɔ, nyɛ ha waa ya nɔ nɛ waa wo wa sibi he wami wawɛɛ, titli ɔ, akɛnɛ nyɛ le kaa Nyɔmtsɛ ɔ bami be ɔ su ta a.

26 Amlɔ nɛ ɔ nɛ wa na le anɔkuale ɔ nɛ kɔɔ sane kpakpa a he ɔ, ke wa je blɔ ngɛ yayami pee kɛ mwɔɔ ɔ, bɔ kpa ko be nɛ a maa sã kɛ je yayami ɔ.

27 ⓒ Mohu ɔ, waa kɛ gbeye yemi nɛ hyɛ kojomi nɛ ma a, kɛ la gegeege nɛ ma kpata nihi nɛ teɔ si kɛ siɔ Mawu a hɛ mi ɔ blɔ.

28 ⓓ Ke nɔ ko tɔ Mose mlaa a, nɛ a da ni enyɔ, loo etɛ a we odase nɔ kɛ bu lɛ fɔ ɔ, a nɛ́ lɛ mɔbɔ; pe a gbeɔ lɛ.

29 ⓔ Lɛɛ nɔ ko nɛ hia nane kɛ si Mawu Bi ɔ, nɛ Kristo muɔ nɛ a kɛ sɔu somi ɔ nya kɛ tsu e he ɔ, e buu lɛ kaa yaka nɔ́ ko kɛkɛ, nɛ jehanɛ hu, e wo Mawu mumi ɔ mi mi la a, kɛ a maa pee lɛ kɛɛ? Anɛ e sɛ́ kaa a gblaa e tue wawɛɛ pe jã lo?

30 ⓕ Ejakaa wa le kaa Nyɔmtsɛ ɔ lɛ de ke, “Ma ye ye he lue! Ma gbla a tue ngɛ yayami nɛ e pee ɔ he.” Lɛ nɔuu lɛ e de ke, “Ma kojo ye ma a.”

31 Nɔ nɛ Mawu hɛ kalɔ ɔ nine maa gbe lɛ ɔ, musu tloo lɛ!

32 Nyɛ kai bɔ nɛ nyɛ hi si sa a. Benɛ nyɛ ba le Mawu ɔ, nyɛɛ kɛ hɛ mi miami na amanehlu babauu.

33 Be komɛ ɔ, a jɛɔ nyɛ, nɛ a peeɔ nyɛ nisɛ ní ngɛ ma hɛ mi; nɛ be komɛ hu, a buu nyɛ kɛ piɛɔ nihi nɛ a ngɛ mɛ yi mi wae ɔ a he.

34 Niinɛ, nyɛ mi mi sã nyɛ ngɛ nihi nɛ a wo mɛ tsu ɔ a he; nɛ benɛ a ngɛ nyɛ níhi tsuo kpɔe ngɛ nyɛ dɛ pani nya a, nyɛɛ kɛ bua jɔmi ngmɛɛ he ha mɛ faa. Ejakaa nyɛ le kaa nɔ́ nɛ nyɛ nine su nɔ ɔ hi kulaa pe lɔ ɔmɛ, nɛ e ngɛ kɛ yaa neneene hulɔ.

35 Lɔ ɔ he ɔ, nyɛ kɔni mi ko jɔ̃ ngɛ nɔ́ nɛ nyɛ ngɔ nyɛ hɛ ngɔ fɔ nɔ ɔ he, ejakaa nyɛ nine maa su hiɔwo agbo ko nɔ.

36 E hia kaa nyɛɛ to nyɛ tsui si, nɛ nyɛɛ pee Mawu suɔmi nya ní, konɛ nɔ́ nɛ e wo he si ɔ, nyɛ nine nɛ su nɔ.

37 ⓖ Ejakaa Nyɔmtsɛ ɔ de ke, “E piɛ bɔɔ pɛ nɛ nɔ nɛ ma a ma ba su si; e be kɛe kulaa.

38 Ye ma a, nihi nɛ peeɔ nɔ́ nɛ da, nɛ a heɔ mi yeɔ ɔ, mɛɛ a yi ma na wami. Se nɔ nɛ kpaleɔ e se ɔ, i be e he bua jɔmi nae.”

39 Nihi nɛ kpaleɔ ngɛ Mawu se, nɛ a hɛ mi kpataa a, pi mɛ ji wɔ. Wɔɔ lɛɛ wa piɛɔ ni nɛmɛ nɛ hɛɛ hemi kɛ yemi ɔ mi ɔ a he, nɛ a he wa yi wami.