Hebri Bi 7

Osɔfo Melkizedek

1 Melkizedek ɔ, Salem matsɛ, kɛ Mawu Ope ɔ we osɔfo ji lɛ. Be ko ɔ, Abraham kɛ matsɛmɛ komɛ ya hwu ta, nɛ e ye a nɔ. Benɛ e kpale kɛ ma a, e kɛ Melkizedek ba kpe, nɛ Melkizedek gbaa lɛ.

2 ⓓ Abraham hu ha lɛ ta yibu ní tsuo nɛ e na a mi mi dlami nyɔngma mi kake. Kekleekle ɔ, e biɛ Melkizedek ɔ sisi ji, “Matsɛ nɛ yeɔ dami sane.” Jehanɛ hu, Salem matsɛ ji lɛ; lɔ ɔ he ɔ, e biɛ ɔ tsɔɔ kaa e ji, “Matsɛ nɛ e kɛ tue mi jɔmi baa.”

3 A wui Melkizedek tsɛ, loo e nyɛ ta; e weku kpa ko be ɔ, be nɛ a fɔ lɛ, kɛ be nɛ e gbo hu nɔ ko li. E ngɛ kaa Mawu Bi ɔ, nɛ e ngɛ osɔfo yee kɛ yaa neneene.

4 Nyɛɛ hyɛ nɔmlɔ nɛ ɔ we agboje! Abraham, wa nɛ̃ nɛ he biɛ ɔ po ha lɛ ta yibu ní ɔ nɛ e na ngɛ ta mi ɔ tsuo mi mi dlami nyɔngma mi kake.

5 ⓔ Levi nina a, ni nɛmɛ nɛ hɛɛ osɔfo blɔ nya a, mlaa tsɔɔ kaa a he mi dlami nyɔngma mi kakaaka ngɛ mɛ nitsɛmɛ a nyɛmimɛ Israel fɔfɔɛ ɔmɛ a dɛ, pohu a nyɛmimɛ ɔmɛ ɔ, mɛ hu Abraham nina ji mɛ.

6 Melkizedek ɔ, pi Levi nina ji lɛ, se e he mi dlami nyɔngma mi kake ɔ ngɛ Abraham, nɔ nɛ lɛɛ Mawu wo lɛ si ɔ dɛ, nɛ e gbaa lɛ.

7 E fɔɔ si paa kaa nɔ nɛ nɔ kuɔ lɛ gbaa nɔ nɛ ngɛ e sisi.

8 Hiɛ ɔ, ni nɛmɛ nɛ heɔ mi dlami nyɔngmanyɔngma mi kakaaka a, nimli adesahi kɛkɛ ji mɛ, nɛ a gboɔ. Se ngɛ he ko lɛɛ nɔ nɛ a ye e he odase kaa e maa hi si kɛ maa ya neneene ɔ, lɛ nɛ he.

9 Lɛɛ wa ma de ke kɛ gu Abraham nɔ ɔ, a he mi dlami nyɔngma mi kake ɔ ngɛ Levi nɛ jinɛ lɛ nɛ heɔ mi dlami nyɔngmanyɔngma mi kakaaka a hu e dɛ.

10 Ejakaa benɛ Abraham kɛ Melkizedek kpe ɔ, Levi ngɛ e nɛ̃ Abraham mi mi kɛ mwɔɔ.

11 Kaa Levi, nɛ e yi nɔ a wo mlaa a, e nina nɛ yeɔ osɔfo ɔ tsu ní bɔ nɛ sa a, jinɛ e he be hiae kaa osɔfo kpa ko kaa Melkizedek nɛ pi Aaron nina ji lɛ kulaa a nɛ ba.

12 Ejakaa ke a tsake osɔfo yemi blɔ nya tomi ɔ, lɛɛ e hia kaa a tsake mlaa a hulɔ.

13 Jehanɛ hu, nɔmlɔ ɔ nɛ a de ní nɛ ɔmɛ ngɛ e he ɔ, wɛtso kpa kulaa mi no ji lɛ; nɛ nɔ ko ji jamɛ a wɛtso ɔ mi nɛ e ba sɔmɔ ngɛ bɔ sami la tɛ ɔ he gblee.

14 Wa Nyɔmtsɛ ɔ, wa le kaa Yuda wɛtso ɔ mi nɛ e je; nɛ Mose de we nɔ́ ko kɛ kɔ Yuda wɛtso ɔ osɔfo yemi he.

Osɔfo nɛ ngɛ kaa Melkizedek

15 Amlɔ nɛ ɔ, nɔ́ nɛ wa ngɛ dee ɔ mi tsɔ paa, ejakaa osɔfo kpa ba nɛ ngɛ kaa Melkizedek.

16 Mawu lɛ wo lɛ osɔfo; pi ngɛ adesa mlaa nɛ tsɔɔ weku mi nɛ e je ɔ nya. Se mohu wami nɛ ngɛ daa, nɛ nɔ ko be nyɛe ma kpata hɛ mi ɔ he wami nɔ nɛ a gu kɛ wo lɛ osɔfo.

17 ⓕ Ejakaa ngmami ɔ deɔ ke, “Osɔfo ji mo kɛ yaa neneene kaa Melkizedek pɛ.”

18 Lɛɛ mlaa momo ɔ nɛ he wami be mi, nɛ he be se nami hulɔ ɔ, a po mi.

19 Ejakaa Mose mlaa a nyɛ we nɛ e pee nɔ́ ko nɛ hi kɛ pi si. Se nɔ́ nɛ wa ngɔ wa hɛ kɛ fɔ nɔ jehanɛ ɔ hi saminya; nɛ wa nyɛɔ wa hɛɛ kɛ suu Mawu he.

20 Mawu ka kita hu kɛ ma enɛ ɔ nɔ mi; ni komɛ lɛɛ benɛ a wo mɛ osɔfo ɔ, Mawu ka we kikɛmɛ a kita nɛ ɔ.

21 ⓖ Se Yesu lɛɛ, Mawu ka kita nɛ e kɛ wo lɛ osɔfo. Mawu de lɛ ke, “I ngɛ mo kita kae, nɛ i be ye nya se kpalee. ‘Osɔfo ji mo kɛ yaa neneene.’ ”

22 Slɔɔto nɛ ngɛ mi ji Yesu ba pee nɔ nɛ a gu e nɔ kɛ so somi nɛ hi pe kulaa.

23 Slɔɔto kpa hu nɛ ngɛ ji kaa jamɛ a osɔfo ɔmɛ a he hiɛ babauu, ejakaa gbenɔ ha we nɛ a se nɛ kɛ nɛ a kɛ tsu ní.

24 Se Yesu lɛɛ e ngɛ kɛ yaa neneene, nɛ e we osɔfo yemi ɔ se pui gblegbleegble.

25 Lɔ ɔ he ɔ, nihi tsuo nɛ maa gu e nɔ kɛ ba Mawu ngɔ, amlɔ nɛ ɔ jio, hwɔɔ se jio, e ma he a yi wami. Ejakaa e ngɛ kɛ yaa neneene, nɛ e ngɛ Mawu pɛɛ kpae ha mɛ.

26 Lɛɛ Yesu ji osɔfo nɔkɔtɔma pe kulaa nɛ sa wɔ. E ngɛ klɔuklɔu; sé ko be e he ɔ, e pee we yayami hulɔ. E je e he kɛ je yayami peeli a he, nɛ a wo e nɔ kɛ po mi kɛ ho hiɔwe tɔɔ ya.

27 ⓗ Osɔfo kpahi nɛ ye osɔfo nɔkɔtɔma pe kulaa a, e be kaa mɛ. E hia we kaa daa ligbi ɔ, e sã yayami pami bɔ ngɛ lɛ nitsɛ e yayami he kekle, loko e ba sã ngɛ ma a tsuo nɔ́ ɔ he. Benɛ e ngɔ lɛ nitsɛ e he kɛ sã bɔ ɔ, blɔɔ e sã bɔ ɔ tsuo si kake nyɔngloo.

28 Mose mlaa a nya a, nihi nɛ a wo mɛ osɔfo nɔkɔtɔma pe kulaa a, sé ngɛ a he. Se si nɛ Mawu wo nɛ e ka kita ngɔ fɔ nɔ ngɛ Mose mlaa a se ɔ, lɔ ɔ a kɛ wo Mawu Bi ɔ nɛ hi kɛ pi si kɛ yaa neneene ɔ osɔfo nɔkɔtɔma pe kulaa.